Hechos 13
13
U Bernabé rich'il u Saulo xikmaj kb'e xib'e che ub'ixik utzij Dios
1Iy'o ajb'il utzij Dios rich'il ajtojnel chikxo'l qachlal kojnel che iy'o chpam tinmit Antioquía. Ke, jare u Bernabé, rich'il u Simón che soq kb'ix Negro che, rich'il u Lucio kpi chpam tinmit Cirene, rich'il u Manaén che jnam xik'iysax ruk' u Herodes che xikje che atb'altzij chla' Galilea. Soq o u Saulo kuk'. 2Xuriq jun ij, kiyitjin ke kikkoj u'ij Qajaw, soq iy'o p'ayuno. Ena xch'aw Tyoxlaj Uxlab'xel y xub'ij chke: «Chitsa pnoq u Bernabé rich'il u Saulo chwe, mal o jun kchak kinya'o che nisk'im che u'anik», che chke.
3Ena echi' xk'is ayuno y xk'is u'anik ch'ab'al ruk' Dios kmal, xikya k'ab' pkijlom keb' qachlal, tik'ri xikjach b'ik y xiktaq b'ik.
U Bernabé rich'il u Saulo xikb'ij utzij Dios chpam un lyar Chipre
4Tik'ri u Bernabé rich'il u Saulo xikmaj kb'e xib'ek, itqom b'i rmal Tyoxlaj Uxlab'xel. Xa jala', xiqaj b'i chpam tinmit Seleucia. Echi' iy'o chik chla', xiyok chpam un barco y xib'e chik chpam ch'qap ulew o nk'aj mar che Chipre kb'ix che. 5Echi' xiyo'pan Chipre, xiyel b'i chpam un barco chpam tinmit Salamina che o chuchi' mar. Tik'ri xikmaj ub'ixik utzij Dios ptaq nk'aj rchoch Dios, chla' jachi kikmol kib' nk'aj aj Israel. Soq b'enaq u Wan kuk' che soq kb'ix Marcos#Hch 12:12,25; 13:13; 15:37-38; Col 4:10. che rech kyuto' che u'anik kchak.
6Xikb'inb'ej runjel jumpa ch'qap ulewi', ast retal xiyo'pan chpam tinmit Pafos. Chla' xikriq wi jun aj Israel, Barjesús ub'i'. Nachi le', jare ajb'nal itz. Re kub'ij che jare jun ajb'il utzij Dios, per jare taj, xa ch'anik kub'ij. 7Nachi ri' o ruk' un nim atb'altzij che Sergio Paulo ub'i', che mas o un'oj. Ena xutaq ksik'xik u Bernabé rich'il u Saulo, mal jare kraj re kutatb'ej utzij Dios. 8Per nu Barjesús che Elimas kilwi chpam jun chik tzij xu'atij uwuch ktzij u Bernabé rich'il u Saulo, mal kraj taj che kikjon un nim atb'altzij che utzij Dios. 9Per ni qachlal Saulo che soq kb'ix Pablo che, o uchu'ab' Tyoxlaj Uxlab'xel ruk'. Ena, ko xuka'yej najb'nal itz. 10Tik'ri xub'ij che:
—¡At atitzel ajsub'nel, atralk'al nitzel, xa at ajch'oj chrij runjel jumpa utz! ¿Suche che katu'xan taj che u'anik jech' che runjel jumpa saqlaj taq tzij rech Qajaw? Nk'aj saqlaj tziji' jare sk'umlaj b'e. 11Chewa chanim, ri Qajaw Dios kuk'ejsaj awuch, katu'on potz'. Keb' uxib' ij, katikun taj kawil upximb'al ij, —xche che.
Ena mismo chanim xkanaj kan chpam jun tzatzlaj qu'm. Xaq kmalmat chik ptaq qu'm, y kutzkuj chin jun kuch'elej b'ik mal kuril t chub'e. 12Echi' xuril un nim atb'altzij che jala x'antjik, tik'ri k'ut qatz xukoj utzij Dios. Mas xumiyma nk'aj k'utb'al che xuta chrij Qajaw Jesús.
U Pablo rich'il u Bernabé xikb'ij utzij Dios chpam tinmit Antioquía o pukwent Pisidia
13U Pablo rich'il nk'aj rich'il xiyel b'i chpam tinmit Pafos, xiyok chpam un barco y xib'e chpam tinmit Perge che o pukwent un lyar Panfilia. Per nu Wan, che soq kb'ix Marcos che xyuya kanoq, xitzlij loq re chpam tinmit Jerusalén. 14Tik'ri k'ut xiyel chub'i chpam tinmit Perge, y xib'e chpam tinmit Antioquía che o pukwent un lyar Pisidia. Echi' iy'o chla', xuriq jun ij rech uxnb'al ij, xiyok chpam rchoch Dios y xiyikb'e' chla'. 15Echi' xk'is usik'xik uwuch wuj utz'ib'am kan u Moisés, rich'il wuj ktz'ib'am kan nk'aj ajb'il utzij Dios ujer, o nk'aj achjab' nmaq keqle'n chpam rchoch Dios xiktaq ub'ixik chke u Pablo rich'il u Bernabé, xikb'ij chke:
—Qachlal qach ajtinmit, we o jun tzij kiwaj kib'ij rech kipixb'ej nk'aj mnaqi', o mow kixch'aw loq, —xiche chke.
16Ena xwa'laj u Pablo xitk'e'ik. Tik'ri xuk'ut u'ab' chikuch rech k'utb'alre che xa mich'aw chik. Tik'ri xub'ij chke:
—Ix qamnaq ixaj Israel, rich'il ix ixaj Israel taj che nim kiwil wi ri Qajaw Dios, chitatb'ej wari' che kimb'ij chiwe: 17Ri qaDios qo'j ujaj Israel, jare xyuchay qati' qamam ujer, y xu'on chke che mas xik'irik, xu'on jun nimlaj tinmit chke, miskini' xa kchilb'em kib' chpam tinmit Egipto. Tik'ri k'ut xyuresaj chuloq chla' ruk' nimlaj uchu'ab'. 18Tik'ri', ri Qajaw Dios kawnaq (40) jnab' xikje kuk' chla' chpam un lyar che xa chqi'j ulew. Xuch'ijo sutaq kk'asnmal xik'an chla', xaq xukuy kmak. 19Xa jare xusach uwuch jqub' (7) tinmit che iy'o pukwent un lyar Canaán, y xujach uwuch klew chikuch qati' qamam, echb'alke rech kración.
20»Tik'ri k'ut xukoj nk'aj atb'altzij che jueces kb'ix chke, rech kiyitk'e' pkijlom. Kjeb' ciento jnab' ruk' nk'aj ciento jnab' chik (450) xik'an atb'altzij pkijlom. Un k'isb'al atb'altzij jare najb'il utzij Dios che Samuel ub'i'. 21Tik'ri ni qati' qamam xikta jun chik mnaq o reqle'n, che rey kb'ix che, rech kitk'e' pkijlom. Xa jala', ri Qajaw Dios xukoj u Saúl che rey; kawnaq (40) jnab' xu'on atb'altzij pkijlom. U Saúl jare uk'jol u Cis. Nu Cis jare iyachlal kuk' nk'aj ri'y umam u Benjamín. 22Tik'ri k'ut, ri Qajaw Dios xuresaj u Saúl che atb'altzij, jare xukoj chkan u David che uk'xel. Ena xub'ij: “Xinriq u David uk'jol u Isaí, che mas utz kinwilo. Jnam ranma' re peche wanma' In; ku'on na runjel sutaq kwaj In”. Jala xub'ij Dios.
23»Jun chke nk'aj ri'y umam u David ri', jare Qajaw Jesús. Jare Re xchay rmal Qajaw Dios, rech kyuresaj nk'aj aj Israel chpam k'ax, jare kyuto'o, jala peche ub'im loq ujer che ruk' saqlaj tzij ku'on na. 24Echi' mja kumaj uchak Qajaw Jesús, u Wan xyupixb'ej kunjel mnaq iyaj Israel, xub'ij chke che nmister kikk'ex kchomnik chpam kanma', kikya kan u'anik kmak, y k'an qasna' chke. 25Echi' xa ch'in chik kraj che kuk'is uchak u Wan, xub'ij chke mnaq: “¿Nchin in che kib'ij ix? In taj ri ajTo'liwe che iwi'em. Re trin loq chwij in. In tqal t chwe kinchke' qajoq rech kintur uwuch uxjab', rmal mel mas nim u'ij chinwuch in”, xche u Wan chke.
26»Xa jala' qachlal che ixri'y umam qari'jal Abraham, soq rich'il ix che ixaj Israel taj che soq kikoj u'ij Qajaw Dios, chitampe wari': jare chqo'j nimlaj qunjel che tqom loq ub'ixik un utzlaj rsoni' che kub'ij che kujesax chpam k'ax. 27Nk'aj mnaq iyaj Jerusalén rich'il nk'aj che itk'al pkijlom, kit'am taj chin Jesús. Xikch'ob' taj jumpa tzij tz'ib'tal chpam Tyox Wuj che kisk'ix uwuch chpam rchoch Dios ptaq uxnb'al ij, che ktz'ib'am kan nk'aj ajb'il utzij Dios ujer. Jala xelwi peche tz'ib'talik che xa jare ke mismo xikkamsaj Jesús. 28Miskini' ot su kri' jun umak xikriq chrij che we tqal che kkamsxik, per xikta che u Pilato che kutaq ukamsxik. 29Echi' x'antaj kmal runjel jumpa tz'ib'tal kan chrij Qajaw Jesús, tik'ri xikqasaj loq chjuch un cruz y xkimqu kanoq. 30Per ni Qajaw Dios xuk'suj Jesús chikxo'l nk'aj kamnaq. 31Tik'ri, k'i ij xutaqej Qajaw Jesús che kok'il xuk'ut rib' chikuch nk'aj rich'il che ib'enaq ruk', echi' xel b'i Galilea x'e chpam tinmit Jerusalén. Ni le', jare chik ke kiyitjin che ub'ixik chke mnaq chin Jesús y su uchak unom.
32»Chewa chanim, qo'j kujtjin che ub'ixik chiwe jumpa utzlaj taq rson che ub'im kan Qajaw Dios chke qati' qamam ruk' saqlaj tzij. 33Jare qo'j ujri'y kmam kan qati' qamam, ni le' xqilo che qtzij x'antjik su ub'im kan Qajaw Dios jare chi' xuk'suj Jesús chikxo'l nk'aj kamnaq. Jala x'antjik peche tz'ib'tal kan chpam ukab' capítulo rech Tyox Wuj che Salmos ub'i'. Chla' tz'ib'tal wi che Dios xub'ij:
“Chewa chanim atniy'om chikuch mnaq
rech kkit'amaj che at puro atniK'jol”, kcha'. (Sal 2:7)
34Ri Qajaw Dios xub'ij che kuk'suj na ri Jesús chikxo'l nk'aj kamnaq rech k'ay taj ub'qil chpam ulew. Jala kub'ij utzij Dios jachi tz'ib'tal wi che kub'ij:
“Kinya na ri nimlaj utzil chiwe
peche ximb'ij che u David che ruk' saqlaj tzij kinya na”, kcha'. (Is 55:3)
35Xa rmal che jawa kub'ij chpam jun chik Salmo ri':
“Lal kya t kan la che nib'qil che k'ay chpam ulew”, kcha'. (Sal 16:10)
36Qtzij k'ut che qari'jal David xu'on uchak che kilik mnaq che ik'as chpam tiempo echi' k'as re, jala peche xub'ij Qajaw Dios che. Tik'ri k'ut xkamik, y xmuq chla' jachi imqul uri'jal y x'ay ub'qil chpam ulew. 37Per ni Qajaw Jesús che xuk'suj Dios chikxo'l nk'aj kamnaq, x'ay taj ub'qil Re. 38Qachlal, chiwit'amaj b'ari', che xa rmal Qajaw Jesús che kb'ix chiwe che kiriq kuyb'al mak ruk' Qajaw Dios. 39Kunjel jumpa mnaq che kiyikjon che Qajaw Jesús, kikriq kuyb'al mak ruk' Qajaw Dios. Xa rmal su xu'on Qajaw Jesús, per chanim kikriq kuyb'al mak che nab'e kanoq kkuytaj taj rmal su tz'ib'tal chpam upxab' u Moisés. 40China kwent iwib', rech xa miriq iwe peche su xiktz'ib'aj kan nk'aj ajb'il utzij Dios ujer; ke jawa xiktz'ib'aj kanoqi' che xub'ij Dios:
41“Chiwlampe ix, chintaq xa kitij tze' che saqlaj tzij.
Chimiyma' y chsachtaj iwuch,
mal In nDios kin'an na nmaq taq k'utb'al chu'ij saq.
Per ni ix kikoj taj, miskini' o jun kub'ij chiwe”. (Hab 1:5)
—Jala xub'ij u Pablo chke che tz'ib'tal kan chpam Tyox Wuj.
42Echi' xiyel loq u Pablo rich'il u Bernabé chpam rchoch Dios, xipi nk'aj mnaq xikta pawor chke che kiyitzlij jun b'welt chik kuk' chpam jun chik semana echi' kuriq ij rech uxnb'al ij, rech kiktaqej ub'ixik utzij Dios chke. 43Echi' xikjach kib' mnaq chpam rchoch Dios, ik'i chke xiyitrij b'i chrij u Pablo rich'il u Bernabé. Iy'o nk'aj aj Israel, soq rich'il nk'aj chik aj Israel taj che jnam kkinmirsaj u'ij Dios kuk'. Ena xich'aw keb' qachlal kuk' nk'aj mnaqi', xikpixb'ej rech kiyitjinik kikkub'a kk'u'x chrij Qajaw, che jare Jun che uy'om jun nimlaj utzil chke.
44Echi' xuriq uxnb'al ij chpam un chik semana, kunjel mnaq chpam un tinmit xikmol kib' che utayik utzij Qajaw. 45Per echi' xkil nk'aj aj Israel che mas mnaq kirqom kib' chla', mas k'ax xikna'o, xiktz'ej uwuch u Pablo y xkik'le'lej utzij. 46Ena ko xich'aw u Pablo rich'il u Bernabé, o jun kowlaj k'u'x chke, xa jala' xkix'ej t kib', xikb'ij:
—Jare nmister che nab'e kqab'ij utzij Dios chiwi'x ixaj Israel. Per kiwaj taj kikojo, k'utb'alre che tqal taj chiwe kiriq ik'asnmal ruk' Dios che ot uk'isik. Xa rmal che le', kuj'e chik kuk' nk'aj mnaq che iyaj Israel taj rech kqab'ij utzij Dios chke ke. 47Mal jarela xujutaq Qajaw Dios che u'anik, Re xub'ij chqe:
“Atnikjom peche jun ajk'mal b'e kutzuk'ej a'
chikuch mnaq iyaj Israel taj, rech kikkil kb'e,
y soq xa awmal at kikriq na jun kk'asnmal che ot uk'isik
kunjel jumpa mnaq iy'o chi' chuchlew,
ast retal ko'pan chpam nk'aj uk'isb'al taq tinmit o chi' chuchlew”. (Is 49:6)
Jala xub'ij Dios chqe, —xiche chke nk'aj mnaq.
48Echi' xikta nk'aj mnaq che iyaj Israel taj, che jala xb'ix chke, mas xiki'ktik y xikmaj ub'ixik che mas utz lo'laj utzij Qajaw; ena kunjel jumpa mnaq che ichaytajnaq chik rmal Dios rech kikriq jun kk'asnmal che ot uk'isik, xiyikjon che Qajaw Jesús.
49Xa jala' xtix utzlaj taq rson chrij Qajaw Jesucristo chpam runjel jumpa tinmit o pukwent un lyari'. 50Per ni nk'aj aj Israel xikkoj kk'u'x nk'aj ixqib' nmaq keqle'n che kkinmirsaj u'ij Dios chla'. Soq xikkoj kk'u'x nk'aj achjab' che nmaq keqle'n chpam tinmit. Jala xik'ano rech kikyak kib' chkij u Pablo rich'il u Bernabé, y xikkesaj b'i chpam tinmit xikkoqtaj b'ik. 51Per ni ke, echi' xiyel b'i chla', xiktota kan ulew che kqan, k'utb'alre che ustaj kinom mnaq chla' mal xa o kmak. Tik'ri k'ut xib'e chpam tinmit Iconio. 52Xa jala', kunjel qachlal ajkojnel che iy'o chpam tinmit Antioquía, mas xiki'ktik, alaj che nojnaq kanma' che Tyoxlaj Uxlab'xel.
လက္ရွိေရြးခ်ယ္ထားမွု
Hechos 13: qucSAS
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
El Nuevo Testamento
en K'iche' de San Andrés Sajcabajá
© 2024 Asociación Educativa y Cultural Maya (AECM)
en colaboración con SIL Global