Mattuw 3
3
Yohana sá Yesu Batisma
1Yiifu dédē li Yohana wàyi sá Batisma lá bē ma yi dádɔ̀ yii sáchɔ́ àwu Yahudiya. 2u yi zɛ̀ la, <<Ni me wúwàbɛbɛ'ni ní, dizyi Àchɔ̀ wà yii Dɔ lò bē bàdì!>> 3Yohana waa Ishaya ándówyapyɛ̀ zɛ̀zyí ishina'a la,
<<Apazu yi dákito yii sáchɔ́,
<ni mbyā nyàshɔ àwu Adando,
ni mbyā'u nyàshɔ wàndāfā.>>>
4Átúkpá wàyii dì Yohana lá wa mbyā'u wa áhwɛ̄dì wēwànárī, u dɛ̀ vyù gàhwɔ̄ shèkwà fyū'a, áwúzyī'a yi bàkūdú wa zyàdɛ. 5Apanku zū Urushelima wa sásá vozyoku Yahudiya bē bé'a, wa sásá zyoku wàbàbà wa numgbe Jodan lá. 6Wa zɛ̀ wúwàbɛbɛ'wa, u sá'wa batisma yii numgbe Jodan.
7Waa Yohana wya Áwáfaris ndàbè wa Áwásadus hwoi be bé'a mazyi ú sá'wa batisma lá, u zɛ̀ yí'wa la, <<Awuni shīkwā wusu wàbɛbɛ! Ánɔ̄ bwà'ni vo wàlò shè yiibe fyì àwu Shidɔ wàyi bēèbē lá ní? 8Ni sá wú wàyi tà la, ni hwo vēkà yiibe wúwàbɛbɛ'ni kàsɛ bà Shidɔ. 9Mazyi ni káwa gàzyíhwɛ̀ la, ni hwoi nwàzū yiibe fyì lá wa zyí waa ni hwoi zɛ̀ la, Ibrahim yi dako'ni àwu mbùkú wa ángyèké lá yɔ̀. M ngyi zɛ̀ yí'ni la, Shidɔ bā gba wàlò gɔ́ hwoila kà zyēdēkpéndū àwu Ibrahim! 10Tàma ákē kɛ́pyɛ̀ jā yiibe dúfyī wà lò'u gé kwèkwè, sásá fyī wà ma nwā ngyì wàsàsà yɔ̀ ní, wa lò'u yi gé tá wè pyù. 11<<Ami yi sá'ni batisma wa lape wàyi tà la ni lò vēkà yiibe wúwàbɛbɛ, dedee ándó wàyi bē gbá lá yi sá'ni batisma wa Nidi Wànyɛnyɛ, wa pyù. U bā gba kā'm ní, m kē wàpà'uvo yiibe tābá'a yɔ̀. 12U bā bírí wàlò yiibe'a wàlò zá sásá vé. U lò áwá'a yi hwo kwazɔ yi wè fu vā'a, dedee ma lò kpátāfú yi sōpyù yiifu pyù wà yi dɛ yɔ̀ lá.
Yohana sá Yesu Batisma
13Yiifu dédē li Yesu zū Galili bē Jodan bé Yohana mazyi ú sá'u batisma. 14Dedee Yohana ngā mazyi ú lò'u nwú'a lòdɔ yii ní, ma zɛ̀ la, <<Ami gbaa yi ndó wàyi fú mazyi ó sá'm batisma ní, dedee o kà bē bé'm!>>
15Yesu zɛ̀'undɛ̀ ní la, <<Ú yí mamá tàma. Dizyi yii nyàshɔ lá waa i hwoi sá wú waa Shidɔ yi fú lá ní.>> Yimamala Yohana lò zɛ̀ndɛ̀.
16Nikiwaa Yesu lò baptisma sá yiibe Yohana, ma mbàámbàní ma lò zumyɛ yii lape lá, ādɔ lò pòfā yí Yohana, u wya Nidi Shidɔ yi tòli sáyìna ndàkpò wa bēyá yii ishina Yesu. 17Yiibeli àhuna zɛ̀zyí zū dɔ la, <<Ango'm waa m ngyi shó lá gbaa yiinì, dizyi áhu gbaa yi sá wú wàvyā'mdì ní.>>
လက္ရွိေရြးခ်ယ္ထားမွု
Mattuw 3: WBTP
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The Word for the World International and The Word for the World Nigeria