Mateyu 22
22
Anwuma Maanle ne sɔhovolɛ
1-2Gyisɛse bule mrɛlɛ dɔɔnwo vale hilele kɛ Anwuma belemgbunli maanle ne si de la. “Ndonwo a le ɛhye” Ɔse, “Anwuma belemgbunli maanle ne le kɛ belemgbunli bie mɔɔ liele atɔfolɛ kpole bie maanle ɔ ra nrenyia la. 3Ɔdole ɛsalɛ ɔvɛlɛle menli dɔɔnwo, na mɔɔ ɛkponledolɛ ne dwule zo la, ɔzoanle ye ɛzoavolɛma ne mɔ kɛ bɛhɔbɔ awie biala amaneɛ kɛ yedwu mekɛ mɔɔ awie biala fa ba a. Na bɛ muala bɛkpole kɛ bɛkɛra! 4Ɛhye ati ɔzoanle ye sonvolɛma ne mɔ bie noko kɛ bɛhɔze bɛ kɛ, ‘Debie biala di munli; mehu me nlankɛ nee me nyɛmoa. Ɛhye ati bɛha bɛ nwo bɛrɛla atɔfolɛ ne abo!’
5“Na menli ne mɔ mɔɔ ɔdole ɛsalɛ ɔvɛlɛle bɛ la zelele ye ala na bɛhɔle bɛ gyima ɛyɛlɛ, ko hɔle ye ɛya nu, ko noko hɔle hɔnleanle ye efiade; 6bie mɔ noko bolɛ ye ɛzoavolɛma ne mɔ kpalɛ na bɛguale bɛ nyunlu nyiane aze, na bɛhunle bie mɔ bɔbɔ.
7“Akee belemgbunli ne nyianle ɛya; na ɔzoanle ye sogyama ne ɔmaanle bɛhɔhunle ahodiawu ɛhye mɔ, na bɛyelale bɛ suakpole ne wee kpalɛ. 8Akee ɔzele ye sonvolɛma ne mɔ kɛ, ‘Atɔfolɛ ɛkponledolɛ mekɛ ne ɛdwu, na menli noko mɔɔ mendole ɛsalɛ menvɛlɛle bɛ la anwo ɛmfɛta zɛhae anyunlunyia ɛhye. 9Ɔti bɛhɔ awɔlɔne ne mɔ azo na bɛvɛlɛ awie biala mɔɔ bɛkɛnwu ye la bɛmaa ɔrɛla ɛkponledolɛ ɛhye abo.’
10“Yemɔti sonvolɛma ne mɔ yɛle ɛhye, na bɛvɛlɛle awie biala mɔɔ bɛnwunle ye la, kpalɛ nee ɛtane muala; na ɛkponledolɛ ne abo yɛle nyɛvole ngome. 11Na mɔɔ belemgbunli ne rale kɛ ɔbanlea nyɛvolɛ ne mɔ la, ɔnwunle nrenyia bie mɔɔ yemɔ ɔnwula atɔfolɛ tɛladeɛ ne mɔɔ bɛvale bɛmaanle ye la a. 12Ɔbizale ye kɛ, ‘Agɔnwolɛ, na kɛ ɔyɛ mɔɔ wɔmɔ ɛnwula atɔfolɛ tɛladeɛ ne bie ɛ?’ Na nrenyia ne dɔle mumule.
13“Akee belemgbunli ne zele ye boavolɛma ne mɔ kɛ, ‘Bɛkyekye ɔ sa nee ɔ gyakɛ na bɛvuandi ye bɛdo awozinli kabikabi ne anu, ɛlɛka ne mɔɔ ɛzunlɛ nee egyelehwinlɛ wɔ la.’ 14Ɔluakɛ, bɛvɛlɛle menli dɔɔnwo, na nuhua ekyi bie yɛɛ bɛkpale bɛ a.”
15Akee Falasiima ne mɔ yiale nu vale adwenle kɛ ɔkɛyɛ na bɛ sa aha Gyisɛse bɛahye ye wɔ ye ɛdendɛlɛ nu la. 16Ɔlua zo bɛzoanle bɛ menli ɛdeɛ ne bie nee belemgbunli Hɛlɔdo asa azo ne mɔ bie kɛ bɛhɔbiza ye zɛhae kpuyia ne: “Yɛmenle, yɛze kɛ wɔmɔ ɛdi nɔhalɛ bɔkɔɔ, na ɛkilehile nɔhalɛ ne na ɛnzulo ɔ nzi edwɛkɛ biala, ɛnzulo ɛhwee yɛɛ ɛnzulo ɛnyelɛ noko. 17Akee ka kile yɛ, ɔfa adenle nu kɛ yɛkɛdua adwule yɛkɛmaa Siza anzɛɛ ɔnva adenle nu ɔ?”
18Gyisɛse nwunle bɛ adwenle na ɔdeanle nu ɔzele kɛ, “Bɛmɛ Adalɛ nabalabama! Nwane a bɛkpondɛ kɛ bɛfa bɛ agyiba kpuyia ɛhye mɔ bɛyɛ ye koasea a? 19Bɛva adwule ezukoa ne bie bɛhile me.” Na bɛvale kapɛlɛ ko bɛmaanle ye.
20Ɔbizale bɛ kɛ, “Nwane nvoninli a wɔ zo la? Yɛɛ nwane duma a wɔ nvoninli ne abo a?”
21Bɛbuale ye kɛ, “Siza ɛdeɛ ɔ.” Ɔzele bɛ kɛ, “Saa ɔle zɔhane ɛdeɛ a, ɛnee mɔɔ ɔle Siza ɛdeɛ la, bɛva bɛmaa ye, yɛɛ debie biala noko mɔɔ ɔle Nana Nyamenle ɛdeɛ la, bɛva bɛmaa ye.”
22Ye nyelebɛnloa ne yɛle bɛ azibɛnwo totohyia na ɔlua zo bɛvile ɛkɛ ne bɛhɔle.
23Na kenle ko zɔhane ala, Sadusiima ne mɔ bie, mɔɔ se kɛ ewuledwazolɛ ɛnle ɛkɛ la, rale ɔ nwo ɛkɛ na bɛrabizale ye kɛ, 24“Awulae, Mosisi hanle kɛ, saa nrenyia mɔɔ gya raalɛ la wu na yeangyakyi mralɛ a, ɔwɔ kɛ ɔ diema nrenyia gya kunlavolɛ raalɛ ne amaa bɛ ngakula ne mɔ asa aha nrenyia ne mɔɔ wule la agyapadeɛ ne. 25Saa ɔle zɔhane ɛdeɛ a ɛnee yɛlɛ abusua bie mɔɔ mediema mrenyia nsuu a wɔ nu la. Mɔɔ lumua lɛ gyale raalɛ ne na ɔ nee ye anwo yɛɛ ɔwule a, ɛhye ati ye kunlavolɛ raalɛ ne yɛle ɔ diema ne mɔɔ li ɔ nzi la deɛ. 26Adiema ɛhye noko nee ye anwo yɛɛ ɔwule a, na raalɛ ne yɛle bɛ diema ne mɔɔ doa bɛ la aye, na bɛlɛ ye zɔ dedee la ɔyɛle bɛdabɛ mediema nsuu ne ko biala aye. 27Na akee raalɛ ne ɔdaye ɔwule. 28Ɛnee nwane a bagya zɛhae raalɛ ne wɔ ewudwazo mekɛ ne anu a? Ɔluakɛ mediema nsuu ɛhye nuhua ko biala gyale ye bie!”
29Gyisɛse buale bɛ kɛ, “Bɛvo, ɔluakɛ bɛnze Nyamedwɛkɛ ne nee Nana Nyamenle ye tumi ne. 30Ɔluakɛ, wɔ ewudwazo ne anu agyalɛ biala ɛnle ɛkɛ; awie biala bayɛ kɛ anwumabɔvolɛma ne mɔɔ wɔ Anwuma belemgbunli maanle ne anu la. 31Na mɔɔ fale ewudwazo ne anwo la, bɛtɛkengale mɔɔ Nyamedwɛkɛ ne ka ye wɔ Nwolɛ la ɔ? Bɛngakye edwɛkɛ ne mɔɔ Nana Nyamenle hanle zile bɛ nyunlu kɛ, 32‘Mame a le Ebileham, Ayezeke nee Gyekɔbo Nyamenle ne la ɔ?’ Nana Nyamenle ɛnle mɔwuamra Nyamenle, emomu ɔle menli mɔɔ de aze la bɛ Nyamenle.”
33Menli dɔɔnwo ne nyianle ye nyelebɛnloa ne mɔ anwo ahomeka totohyia 34-35noko akee tɛ Falasiima ne mɔ ɔ! Mɔɔ bɛdele kɛ ye nyelebɛnloa ne ɛdudu Sadusiima ne mɔ ahonle la, bɛdwenlenle bɛdabɛ bɛ kpuyia ɛdeɛ fofolɛ nwo mɔɔ bɛfa bɛabiza ye a.
36Bɛ nuhua ko mɔɔ le lɔya la bizale kɛ: “Awulae, mɛla ne boni a hyia kpole kpalɛ wɔ Mosisi mɛla ne mɔ anu a?”
37Gyisɛse buale ye kɛ, “Fa wɔ ahonle ne, nee wɔ sonlabaka ne nee wɔ adwenle ne amuala kulo wɔ Awulae Nana Nyamenle.” 38-39Ɛhye a le mɛla ne mɔɔ lumua na eza ɔhyia kpole kpalɛ a. Mɔɔ tɔ zo nwiɔ mɔɔ ɔdaye ɔhyia na ɔdaye noko ɔngakyi kpole biala la a le ɛhye: “Kulo ɛ gɔnwo kɛ ɛdawɔ ɛ nwo la.” 40Mɛla ne mɔ mɔɔ ɛha la amuala nee ngapezoma ne mɔ ɛdeɛ ne mɔ amuala abo vi mɛla nwiɔ ɛhye mɔ anu. Di ɛhye mɔ ala azo na ɛbanwu kɛ ɛlɛdi mɛla ne mɔ mɔɔ ɛha la azo.
41Akee mɔɔ Falasiima ne mɔ bɔle ye mgbɔlɛka yiale la, ɔbizale bɛ kpuyia ɛhye: 42“Na Ngoanedievolɛ ne noko ɛ? Nwane ara a le ye?” Bɛbuale ye kɛ, “Devidi Ara ɔ.”
43Gyisɛse bizale bɛ kɛ, “Ɛnee akee duzu ati a Devidi, ɔlua Sunsum Nwuanzanwuanza ne anwosesebɛ zo ɔtendɛ la ɔvɛlɛle ye ‘Awulae’ ɛ? Ɔluakɛ Devidi zele kɛ,
44“ ‘Nana Nyamenle zele me Awulae kɛ, Tɛnla me sa fema ne azo, kɔkpula mekɛ mɔɔ menwɔva wɔ akpɔvolɛ amuala menwɔwula ɛ gyakɛ abo la.’ 45Na saa Devidi vɛlɛle ye ‘Awulae’ a, ɛnee kɛ ɔyɛ mɔɔ ɔkola ɔyɛ ɔ ra ɛ?” 46Bɛannyia nwolɛ nyelebɛnloa biala bɛammaa ye. Na ɛhye anzi, awie biala bɔbɔ ambiza ye kpuyia bieko.
လက္ရွိေရြးခ်ယ္ထားမွု
Mateyu 22: ONEN
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Biblica® Open Nzema Word of Life Gospels and Psalms™
Copyright © 1984 by Biblica, Inc.
“Biblica” is a trademark registered in the United States Patent and Trademark Office by Biblica, Inc. Used with permission.