Mateyu 13
13
Nyamenle Maanle ne anwo adawu adawu
1Kenle ko ne ala, mɔɔ ɛnee melɛ ne ɛhɔ bie la, Gyisɛse vile sua nu na ɔhɔle ɛnweanloa lɔ. 2-3Na yeangyɛ biala yɛɛ menli dɔɔnwo bie yiale ɛke ne a, Ɔvole ɔhɔle ɛlɛne nu na ɔhɔdɛnlanle aze wɔ nu na ɔhilehilele bɛ debie wɔ melɛ mɔɔ menli ne mɔ gyinlegyinlanle ɛnwea kpane ne azo bɛdiele ye la. Na ɔdendɛle dɔɔnwo ne ala ɔhilele bɛ wɔ mrɛlɛbulɛ nu ɔzele kɛ: “Ɛyazonlɛnli bie hɔluale ma wɔ ye ɛya nu. 4Na melɛ mɔɔ ɔkponde ma ne wɔ ɛya ne anu la, bie mɔ guale adenle ne anloa, na nloma rale rasusole. 5Bie noko guale awozaka nu, ɛleka mɔɔ azɛlɛ ekyi bie yɛɛ aheda awolɛ ne azo la; ma ne fifile nyinle wɔ azɛlɛ ɛhye azo, 6na ewia henlema ne bɔle bɛ maanle bɛnwosonle na bɛwule, ɔluakɛ bɛ ndinli ne mɔ anzo. 7Ma ne mɔ bie mɔ noko guale mbowule nu, na mbowule ne nyinle na ɔmiemianle bɛ. 8Bie mɔ noko guale azɛlɛ kpalɛ zo, na bɛzole ma dɔɔnwo. Bɛzole abulasa, abulasia nee ɛya mɔnwo mɔnwo ne ala kɛmɔ ɔkpondenle bɛ la. 9Mɔɔ lɛ ɛnzolɛ la ɛdie!”
10Ye ɛdoavolɛma ne mɔ rale na bɛrabizale ye kɛ, “Duzu ati a dahuu ɛtendɛ ɛkile bɛ wɔ mrɛlɛ zɛhae mɔ anu a?”
11Akee ɔhilele nu ɔhilele bɛ kɛ, bɛdabɛ ngomekye ala yɛɛ bɛmaa bɛ adenle kɛ bɛkɛde Anwuma belemgbunli maanle ne abo a, na tɛ menli mɔɔ bɛha la ɔ.
12-13Na ɔzele bɛ kɛ, “Mɔɔ lɛ bie la yemɔ a bɛbamaa ye bie dɔɔnwo a, na yeanyia ye molozo; na mɔɔ ɛnlɛ bie la, ekyi ne bɔbɔ mɔɔ ɔlɛ ye la, bɛbaza ye bɛalie. Ɛhye ati a metendɛ mekile bɛ wɔ mrɛlɛ nu la, amaa menli ade na bɛanwu ye, na emomu bɛnrɛde ɔ bo.
14“Ɛhye maa Ayezaya Kapezonli ne edwɛkɛ ne mɔɔ ɔhanle la yɛ ɛkɛ kɛ, ‘Bɛte, na bɛnde ɔ bo; bɛnea, na bɛnnwu ye! 15Ɔluakɛ bɛ ahonle ne mɔ ɛtilitili na bɛyɛ ɛnlomboɛ ɛnlomboɛ, bɛ nzo ne mɔ ɛdi kɛ bɛkɛdie, na bɛmuomua bɛ nye wɔ nafelɛ nu, 16ɛhye ati bɛnrɛnwu ye, na bɛade, na bɛanyia ndelebɛbo na bɛahakyi bɛ sa anloa bɛadoa Nana Nyamenle bieko, na bɛamaa meayɛ bɛ ayile.’ Emomu nyilalɛ ɛha bɛ nye ne mɔ, ɔluakɛ bɛnwu debie; ɔ nee bɛ nzo ne mɔ, ɔluakɛ bɛte edwɛkɛ. 17Ngapezoma dɔɔnwo ne ala nee tenlenema dɔɔnwo ne ala hulole kɛ bɛkɛnwu mɔɔ bɛmɛ bɛnwu ye la, na bɛade mɔɔ bɛmɛ bɛde la, noko akee bɛannyia ye zɔ.
18“Kɛkala akee adawu ne mɔɔ membɔle mɔɔ fale ɛyazonlɛnli ne nee ye ma ɛlualɛ ne anwo la abo ɛne: 19Adenle ketekete ne mɔɔ ma ne bie mɔ guale ye adehanle ne la gyi ɛkɛ ne maa sonla ahonle ne mɔɔ tie Adawu Kpalɛ ne mɔɔ fale Anwuma belemgbunli maanle ne anwo na ɔnde ɔ bo la; ɛhye ati akee Abɔnsam ba na ɔbasesa ma ne ɔfi ye ahonle ne anu. 20Azɛlɛ awozaka sɛhɛlɛɛ ne gyi ɛkɛ ne maa nrenyia ne mɔɔ fa fɛlɛko tie Nyamedwɛkɛ ne la ahonle ne, 21na kɛmɔ ɔdaye mumua ne ɔnzi pi wɔ ye ɛbɛla nu la ati, ma ne ɛnzɔ ndinli kpalɛ, ɔti saa nzinlii ɔnwu amaneɛ nee anwubɛnyunlu ɔlua ye diedi ti, na ye diedi wie a ɔtɔ, aze. 22Azɛlɛ ne mɔɔ mbowule ne wɔ zo la, gyi ɛkɛ ne maa nrenyia ne mɔɔ tie Nyamedwɛkɛ ne, na ewiade anu ɛbɛlabɔlɛ nee ye ezukoakpondɛlɛ kakyi mbowule miemia Nyamenle Edwɛkɛ ne na ɔte ye Nyamenle ɛzonlenlɛ ne azo ngyikyi ngyikyi la. 23Azɛlɛ kpalɛ ne gyi ɛkɛ ne maa nrenyia ne mɔɔ tie Nyamedwɛkɛ ne na ɔte ɔ bo, na ɔtwe menli mɔɔ kɛyɛ kɛ abulasa, abulasia anzɛɛ ɛya nee ɔ nzi ɔba belemgbunli maanle ne anu la.”
24Ɛrɛlɛ fofolɛ bieko mɔɔ Gyisɛse bule bɛ la ɛne: “Anwuma belemgbunli maanle ne le kɛ ɛyazonlɛnli mɔɔ ɛlɛdua ma kpalɛ wɔ ye ɛya nu la. 25Na kenle ko nɔɔzo ɔla ala la, ye kpɔvolɛ rale na ɔraluale adua wɔ ye abɛlɛ ne mɔ anu. 26Na mɔɔ abɛlɛ ne bɔle ɔ bo kɛ ɔnyi la, adua ne noko nyinle zɔhane ala.
27“Na ɛyazonlɛnli ne gyimayɛvoma ne rale razele ye kɛ, ‘Yɛmenle, ɛya ne mɔɔ ɛluale ma kpalɛ ne nu la adua ngome ɛva ye bɔkɔɔ zɛ!’
28“Ɔhilele nu ɔzele kɛ, ‘Kpɔvolɛ bie yɛɛ ɛye ɛhye a.’ Na bɛbizale ye kɛ, ‘Ɛnee yɛkɛdudu adua ne mɔ yɛkɛgua ɔ?’
29“Ɔzele bɛ kɛ, ‘Kyɛkyɛ, saa bɛtudu adua ne a abɛlɛ ne bie bazɛkye. 30Bɛmaa bɛ mu nwiɔ bɛgulu nu bɛnyi bɛhɔkpula aleɛbulɛ mekɛ ne na mebaze aleɛbuvoma ne meamaa bɛakpa adua ne bɛayela bɛ, na bɛava abɛlɛ ne bɛagua bonwole ne azo.’ ” 31-32Ɛrɛlɛ bieko mɔɔ Gyisɛse vale hilele bɛ debie la ɛne: “Anwuma belemgbunli maanle ne le kɛ dubinli ma bie mɔɔ bɛluale ye wɔ ɛya nu la. Yemɔ a le ma nretee kpalɛ wɔ ma kosooti anu a, na ɔnyi ɔyɛ kpole wɔ mbaka avinli, na eza ɔyɛ baka mɔɔ nloma kola tɛnla zo na bɛkpondɛ bɛ dabelɛ wɔ zo la.”
33Ɔvale ɛrɛlɛ ɛhye noko ɔyɛle ndonwo: “Yɛfa Anwuma belemgbunli maanle ne yɛto raalɛ bie mɔɔ yɛ kuma la anwo. Ɔsuzu abɛlɛ ɛdɔkɛ na ɔfa mgbɔvonle ekyii ɔfɔtɔ kɔkpula mekɛ mɔɔ ɔkɛde ɛdɔkɛ ne ɛlɛka biala la.”
34-35Mekɛ dɔɔnwo ne ala Gyisɛse bule mrɛlɛ ɛhye mɔ mekɛ biala mɔɔ ɔtendɛ yeahile menli dɔɔnwo ne la. Nɔhalɛ, ɔlua kɛ ngapezoma ne mɔ hanle kɛ ɔbabu mrɛlɛ dɔɔnwo la ati, yeandendɛ yeangile bɛ ɛlɛ mgbane wɔ mekɛ mɔɔ ɔmbu bɛ ɛrɛlɛ ko bɔbɔ a. Ɔluakɛ, bɛhanle bɛdole ye ɛkɛ ne dɛbadɛba kɛ, “Mebadendɛ wɔ mrɛlɛ nu; mebahile awozindeɛ mɔɔ vea mɔɔ sumunli mɔlebɛbo ne bɛtɛtele ɔ bo la abo.” 36Akee ɔgyakyile menli dɔɔnwo ne alie ne anwo, na ɔhɔle sua ne anu. Na ye ɛdoavolɛma ne mɔ zele ye kɛ ɔhile ɛrɛlɛ ne mɔɔ ɔbule mɔɔ fale adua ne nee abɛlɛ ne anwo la abo ɔhile bɛ.
37Ɔliele ɔdole nu na ɔzele bɛ kɛ, “Wioo, mede! Mame yɛɛ mele ɛyazonlɛnli ne mɔɔ dua ma kpalɛ ne la a. 38Ɛya ne a le ewiade ne, yɛɛ ma ne mɔ gyi ɛkɛ ne maa belemgbunli maanle ne anu menli ne; adua ne a le menli ne mɔɔ le Abɔnsam ɛdeɛ la. 39Kpɔvolɛ ne mɔɔ luale adua ne wɔ abɛlɛ ne avinli la a le abɔnsam ne; aleɛbulɛ ne a le ewiade ne awieleɛ ne; yɛɛ aleɛbuvoma ne mɔ noko a le anwumabɔvolɛma ne mɔ.
40“Kɛmɔ wɔ adawu ɛhye anu bɛkpale adua ne mɔ angome bɛyelale bɛ la, zɔhane ala noko yɛɛ bɛbayɛ ye wɔ awieleɛ mekɛ ne anu a: 41Mebazoa me anwumabɔvolɛma ne mɔ meamaa bɛakpa gyegyeravoma nee ɛtaneyɛvoma amuala bɛavi belemgbunli maanle ne anu, 42na bɛagua bɛ sendɔlera kpole ne anu bɛayela bɛ. Ɛzunlɛ nee egyelehwinlɛ bara. 43Na akee tenlenema bada kɛ sɛnzɛne ne wɔ bɛ Ze belemgbunli maanle ne anu. Bɛmaa bɛdabɛ mɔɔ bɛlɛ ɛnzolɛ la ɛdie!
44“Anwuma belemgbunli maanle ne le kɛ agyapadeɛ bie mɔɔ bɛvale bɛveale azɛlɛ bo mɔɔ nrenyia bie nwunle ye la. Ɔlua ye fɛlɛko molozo mɔɔ ɔyɛle ye la ati, ɔdɔnenle debie biala mɔɔ ɔlɛ ye la amaa yeanyia ezukoa dɔɔnwo mɔɔ sa azɛlɛ ne tɔ, la, na ɔ sa hanle agyapadeɛ ne noko!
45“Bieko, Anwuma belemgbunli maanle ne le kɛ agundeɛ guadivo bie mɔɔ anye dedɛdeda alie nwo kpondɛ agudeɛ ngɛnlɛma ngɛnlɛma la. 46Ɔnwunle bie mɔɔ ye bolɛ le kpalɛ, agudeɛ mɔɔ sonle bolɛ kpalɛ la na ɔdɔnenle debie biala mɔɔ ɔlɛ ye la na ɔvale ɔdɔle.
47-48“Bieko, Anwuma belemgbunli maanle ne le kɛ nwowie mɔɔ bɛdole ye nyevile nu bɛhyele fɛlɛ ngakyile la. Mɔɔ bɛhwenle bɛrale aze la, bɛkpale nuhua na bɛvale kpalɛ ne bɛguale ye ahyɛnze nu na bɛvuandinle ɛtane ne mɔ bɛguale. 49Kɛ awieleɛ mekɛ ne bayɛ la ɛne; anwumabɔvolɛma ne mɔ bara na bɛaraye menli amumuyɛvoma ne bɛavi tenlenema ne anu, 50na bɛavuandi amumuyɛvoma ne mɔ bɛagua senle ne anu. Ɛkɛ ne yɛɛ ɛzunlɛ nee egyelehwinlɛ bara a. 51Bɛde ɛhye mɔ amuala abo ɔ?” Bɛbuale ye bɛzele kɛ, “Ɛhɛe, yɛde ɔ bo.”
52Akee ɔvale ɔzɔle zolɛ kɛ, “Kɛlɛhɛlɛvolɛma mɔɔ bɛnyia ndetelɛ wɔ Anwuma maanle ne anwo la le kɛ aakomenle mɔɔ ɔfi ye ninyɛnezielɛ ɛleka ɔbaye ninyɛne dɛba nee fofolɛ kosooti ɔfinde la.”
Kapentanli Ra
53-54Mɔɔ Gyisɛse wiele mrɛlɛ ɛhye mɔ bu la, ɔziale ɔhɔle ye sua zo, Nazalɛte mɔɔ wɔ Galeli la, na ɔhɔhilehilele debie wɔ ɛkɛ ne ayialeka ne, na ye nrɛlɛbɛ ne nee ye nwanwane ninyɛne ne mɔ mɔɔ ɔyɛle la zinle awie biala anwo.
55Menli ne bizale kɛ, “Kɛ ɔyɛ mɔɔ ɔkola ɔyɛ ɛhye mɔ ɛ? Tɛ kapentanli ne ara ɔ? Tɛ ɔ nli a le Male ɔ? Yɛɛ tɛ ɔ mediema mrenyia a le Gyemise, Dwosefi, Saemɔn, nee Dwudase mɔ ɔ? 56Tɛ ɔ mediema mraalɛ a yɛ nee bɛ de la ɔ? Na kɛ ɔyɛ mɔɔ ɔkola ɔyɛ nwanwane ninyɛne zɛhae ɛ?” 57Na bɛnyianle ɔ nwo ɛya. Na akee Gyisɛse zele bɛ kɛ, “Kapezonli biala lɛ anyunlunyia wɔ ɛlɛka biala, na emomu, wɔ ɔdaye mumua ne ye maanle nu yemɔ ɔnlɛ anyunlunyia biala wɔ ɔdaye ye menli avinli bɔbɔ!” 58Ɛhye ati ɔyɛle nwanwanendeɛ ekyii bie ala wɔ ɛkɛ, ɔluakɛ bɛanlie ye bɛanli.
လက္ရွိေရြးခ်ယ္ထားမွု
Mateyu 13: ONEN
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Biblica® Open Nzema Word of Life Gospels and Psalms™
Copyright © 1984 by Biblica, Inc.
“Biblica” is a trademark registered in the United States Patent and Trademark Office by Biblica, Inc. Used with permission.