Mateyu 11
11
1Mɔɔ Gyisɛse wiele mɛla ɛhye mɔ fa maa ye ɛdoavolɛma bulu nee nwiɔ ne mɔ la, ɔhɔle azua mgbole ne mɔ mɔɔ bɛvale bɛziele bɛ nyunlu kɛ bɛkɔ zo la azo na ɔhanle Nyamenle edwɛke ne.
Gyisɛse maanle Dwɔn akɛnrazilɛ
2Dwɔn Sɔnevolɛ, mɔɔ ɛnee la efiade la, dele Ngoanedievolɛ ne nwanwanendeɛ ne mɔ mɔɔ ɔlɛyɛ la amuala, ɔti ɔzoanle ye ɛdoavolɛma ne mɔ ɔmaanle bɛrabizale Gyisɛse kɛ, 3“Amgba ala wɔmɔ a le ahenle ko ne mɔɔ yɛlɛkendɛ ye la ɔ, anzɛɛ yɛhɔ zo yɛnlea ahenle ne adenle ɔ?”
4Gyisɛse zele bɛ kɛ, “Bɛzia bɛ nzi bɛhɔha bɛhile Dwɔn wɔ nwanwane ninyɛne ɛhye mɔ mɔɔ bɛdabɛ bɛnwu ye kɛ melɛyɛ la 5anyezinliravolɛma mɔɔ meyɛ bɛ ayile, ɔ nee abuburavolɛma mɔɔ ɛnɛ bɛkola tia mɔɔ bɛnva kpɔma la, nee kokobɛvolɛma mɔɔ bɛ nwo ɛza, nee anzodiliravolɛma mɔɔ bɛde edwɛkɛ, ɔ nee mɔwuamra mɔɔ medunwue bɛ memaa bɛra ngoane nu; na bɛha Nyamenle edwɛkɛ ne mɔɔ mehilehile ehyiavolɛma na bɛde la bɛboka nwo. 6Bɛva nrɛlaleɛ ɛhye bɛmaa ye kɛ: ‘Nyilalɛ ɛha bɛdabɛ mɔɔ bɛdie me bɛdi la.’ ”
7Na nzinlii mɔɔ Dwɔn ɛdoavolɛma ne mɔ hɔle la, Gyisɛse bɔle ɔ bo kɛ ɔka Dwɔn anwo edwɛkɛ yeahile menli dɔɔnwo ne. “Mekɛ mɔɔ bɛvindele bɛhɔle kɛ bɛkanlea Dwɔn wɔ ɛsɛlɛ ne azo la, duzu a bɛ adwenle zele bɛ kɛ ɔkɛzɔho ye a? Ɛhonle mɔɔ anwoma ɛlɛbɔ ye amaa yeadeda la anzɛɛ? 8Na duzu ati bɔbɔ yɛɛ bɛvindele a, kɛ bɛkanlea sonla mɔɔ heda selekye la anzɛɛ? Nea, bɛdabɛ mɔɔ bɛheda selekye la wɔ suakunlu. 9Ɛnee duzu ati bɔbɔ a bɛhɔle a? Kɛ bɛkanlea Awulae Nyamenle kapezonli anzɛɛ? Nɔhalɛ nu mese bɛ kɛ ɔle kpole ɔtɛla kapezonli bɔbɔ. 10Ɔluakɛ, Dwɔn a le nrenyia ne mɔɔ bɛha ɔ nwo edwɛkɛ dɛba wɔ Nyamedwɛkɛ Buluku ne anu a, ɛzoavolɛ mɔɔ balumua me nyunlu, na yeabɔ me maleɛ ne anwo nolo, na yeaziezie adenle ne anu yeamaa bɛalie me la.
11“Nɔhalɛ nu, menli mɔɔ bɛwo bɛ la amuala ko bɔbɔ ɛnle ɛkɛ ne mɔɔ le kpole tɛla Dwɔn Sɔnevolɛ ne a. Noko akee Anwuma belemgbunli maanle ne anu akɛlɛ bɔbɔ le kpole tɛla yemɔ! 12Na ɔvi mekɛ ne mɔɔ Dwɔn Sɔnevolɛ ne bɔle Nyamedwɛkɛ ɛhanlɛ nee menli ɛzɔnenlɛ bo mɔɔ ɛrakpula ɛnɛ la, menli dɔɔnwo ne ala anye ɛbolo kɛ bɛbikye Anwuma belemgbunli maanle ne, 13ɔluakɛ mɛla ne nee ngapezoma ne mɔ, amuala anye la Ngoanedievolɛ ne ade. Na akee Dwɔn yele ɔ nyunlu, 14na saa bɛdie bɛto nu a ɛnee Dwɔn a le Yilaegya ne, mɔɔ ngapezoma ne mɔ hanle kɛ ɔbara wɔ Anwuma belemgbunli maanle ne mɔlebɛbo ne la. 15Ɔti saa bɛyɛ anwomoalɛ na bɛkulo kɛ bɛdie bɛto nu ɛdeɛ a, ɛnee bɛdie ye kɛkala!
16“Duzu ɛdwɛkɛ a mebaha mɔɔ fale maanle ɛhye anwo a? Menli ɛhye mɔ le kɛ ngakula mɔɔ ɛlɛdi nwɔhoa wɔ gua zo, na bɛse bɛ gɔnwo mɔ kɛ, 17‘Yɛliele atɔfolɛ, na bɛannyia nwole ahomeka, ɔti yɛyɛle ɛzɛne, noko bɛ rɛle ambɔ.’ 18Kɛmɔ Dwɔn Sɔnevolɛ ne ɛnno nwanye bɔbɔ, na mekɛ dɔɔnwo ne ala ɔkye ɛhɔne la ati, bese ‘Ɔle abɔnsam.’ 19Na Mame, Sonla Ra ne, yemɔ meto ɛkponle na meno nza, noko bɛse me kɛ mele ‘adidikpokuvo na eza mele nzanovo, na me nee ɛtanevolɛma yɛɛ atu a!’ Noko akee nrɛlɛbɛvolɛ biala nyɛleɛ a maa bɛkola bɛnwu ye sonla holɛ a!”
Kɔkɔbɔlɛ nee ɛvɛlɛlɛ
20Na akee ɔbɔle ɔ bo kɛ ɔtea azua mgbole ne mɔ mɔɔ yeyɛ ye nwanwane ninyɛne ne mɔ dɔɔnwo wɔ zo la, ɔboalekɛ bɛangakyi bɛ sa anloa na bɛandoa Nana Nyamenle abo zo.
21“Munzule ɛha ɛdawɔ, Koleezen, munzule ɛha ɛdawɔ Bɛteseeyeda! Ɔluakɛ saa menyɛle nwanwane ninyɛne ne mɔɔ menyɛle ye wɔ bɛ awɔlɔne ne mɔ azo la wɔ Taya nee Saedɛn amumuyɛ maanle ne mɔ anu a anrɛɛ menli ne nlunle bɛ nwo dɛbadɛba wɔ anyiemgba nee mɛlɛbɛnwoaze nu. 22Nɔhalɛ nu, mese bɛ kɛ, wɔ Ndɛnebualɛ Kenle ne anu akɛvuanyi Taya nee Saedɛn! 23Kapɛnayɛm bɔbɔ, mɔɔ bɛwula ye anyunlunyia kpole la bahɔ abɔnsam senle ne anu! Ɔluakɛ, saa Sodɔm yɛɛ menyɛle nwanwane ninyɛne mgbole ɛhye mɔ mɔɔ menyɛle ye wɔ bɛ nu ɛke la wɔ a anrɛɛ ɛnɛ nee ɛnɛ ala ɔtɛbɔ ɛke. 24Nɔhalɛ nu, ɔbavuanyi Sodɔm wɔ Ndɛnebualɛ Kenle ne anu yeadɛla bɛ.”
25Na mekɛ ne anu Gyisɛse hanle kɛ: “O Egya, Anwuma nee aze bɛ Awulae, yɛyɛ wɔ mo kɛ wɔva nɔhalɛ ne Wɔvea bɛdabɛ mɔɔ bɛdwenle kɛ bɛze nrɛlɛbɛ la, na emomu, wɔye wɔhile ngakula ngyikyi ngyikyi la. 26Ɛhɛe, Egya, ɔluakɛ, ɔzɔle ɛ nye kɛ ɛkɛyɛ ye zɛhae!”
27“Me Ze ɛva debie biala ɛwula me sa. Selɛ ne angomekye yɛɛ aze Ralɛ ne a, yɛɛ ɔlua Ralɛ ne anwo zo noko a yɛnwu Selɛ ne a, yɛɛ bɛdabɛ mɔɔ Ralɛ ne kɛye Selɛ ne kɛhile bɛ la. 28Bɛ muala bɛrɛla me nwo ɛke, bɛmɛ mɔɔ bɛlɛyɛ gyima na bɛvɛ, na bɛzoa bɛ adesoa ɛnlomboɛ a, na mebamaa bɛ ɛnwomenlelielɛ. 29-30Bɛrɛla na bɛrazoa me adesoa ne ɔluakɛ, ɔle kpalɛ ɔmaa bɛ kɛ bɛkɛzoa, ɔboalekɛ medi me nwo eni na mebɛlɛ me nwo aze wɔ ahonle nu, na bɛbanyia ɛnwomenlelielɛ bɛamaa bɛ ɛkɛla ne mɔ; ɔluakɛ, me adesoa ɛdeɛ ne ɛnyɛ ɛnlomboɛ.”
လက္ရွိေရြးခ်ယ္ထားမွု
Mateyu 11: ONEN
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Biblica® Open Nzema Word of Life Gospels and Psalms™
Copyright © 1984 by Biblica, Inc.
“Biblica” is a trademark registered in the United States Patent and Trademark Office by Biblica, Inc. Used with permission.