Matié 8
8
Yésus mééŋuki ekúnúkun
(Mál 1.40-44; Lúk 5.12-14)
1Aná Yésus meésélén kɔ́ ɔkɛ́l, kitɔɔt kí pɛɛnd kíɔŋ kɛ́ɛ́yɛ́. 2Ekúnúkun weepísíítin wɔ, weesukin wɔ́ tunuu, wɔ́ kɛ́ɛ́yɛ́ ɛ́ɛ́: «Ɔkɔ́n, índɛ ɔɔ́kɔɔyɔ, anyi kunsukɔn.» 3Yésuse waatál wɔ ɔmbɔ́k, ukanyi kɛ́ɛ́yɛ́ ɛ́ɛ́: «Yɔɔ́kɔɔyɔ páá asukúná!» Nɔ niɔ́kɔ́tɔ́n iŋún yaaman. 4Yésuse kɛ́ɛ́yɛ́ ɛ́ɛ́: «Atitíán tɛ mɔɔnd, maná kepítíínyí ku afunúfɔn, éékí pipíák epí Moyíis mɔɔ́pɔ́k: kɔ́ɔkɔ́ páányípianɛ́ pulinsí ɛ́ɛ́ emééŋúk.»
Kuátap kú ɔkɔ́n u melúse etín átáánɔ
(Lúk 7.1-10; Isŋ 4.46-54)
5Yésus mepíkén Kafalanawúum ɔkɔ́n u etín átáánɔ omotí weepísíítin wɔ́ woopísókolonyi wɔ́ téééé, 6ukanyi kɛ́ɛ́yɛ́ ɛ́ɛ́: «Ɔkɔ́n, eŋélí puólí waamɛ nyɛ apítímán á nuyá no pukóndi, wɔɔ́kɔɔ́pikɔn puólíkóolí.» 7Yésuse kɛ́ɛ́yɛ́ ɛ́ɛ́: «Yeékeéŋukesi wɔ́.» 8Maná ɔkɔ́n u etín átáánuɛ kɛ́ɛ́yɛ́ ɛ́ɛ́: «Ɔkɔ́n, indipá ewú ɛnyɛɛ́ kupíkin kɛ́ɛ́yɛ́ á kiansi: kálɛ́t kukálɛt kɔ́ɔ́m eŋélípuólí waamɛ kaná kuéŋuk. 9Á kiákí ɛ́ɛ́ iiŋú kákáámɛ inyɛ á kipia kí pɔkɔ́n páámɛ, yoond imbian mélúse mɛnyɛɛ́ ɛ́ɛ́ indían ewe ɛ́ɛ́: óló, wool, yɔɔyitɛn owúnóo ɛ́ɛ́: apá, wɔɔp, ké eŋélípuólí waamɛ: ɛlɛ́ epue, wɛɛl.» 10Yésus ɔ́ɔ́pɔn tukál tukáánɛ́, wɔɔ́p peseé nɛɛyɛ́, ukanyi é péépé pɔ́mɔɔ́ŋɔ́n kɛ́ɛ́yɛ́ ɛ́ɛ́: «Kémuémue, yɔɔ́núɔ́yɔn ɛ́ɛ́, ɔ́ kitɔŋ kí Ísilayɛ́ɛl kitikit imanyi indiɛ́n mɔɔnd áátapan anɛ. 11Andíkɛ́k yɔɔ́núɔ́yɔn ɛ́ɛ́ táásɛ óónyólinon á nipálɛ́n nɛ nisɛ́ndɛ́n ní ɔɔ́nyí ɛ́ɛ́ póólon ɔ́ putɔ́mbí na Ápilaháam ni Ísak na Yákɔp é Pufuŋ pú mɛnɛ́mɛnɛ́ɛ, 12kɔ́ɔkɔ́ pɛɛ́tí kiséé kí Pufuŋ pú Támbák péényémenyé pɔ́ kí imbíne yi ɔɔ́nd: kɔ́ɔkɔ́ páányípaŋanɛ́ póond pápípanda eŋíŋ.» 13É kélém akáánɛ́ Yésus kanyi kɔ́ ɔkɔ́n u etín átáánɔ ɛ́ɛ́: «Ondó kuawɔ! Ɛ́nyɛɛ́ púpíɛlɛ aná ámányaátáp.» Á kiátákáánɛ́ kikulɛ́, eŋélípuólí weéŋuk.
Yésus mééŋúkí isɔm yéŋiní í Píɛl
(Mál 1.29-31; Lúk 4.38-39)
14Yésus mɛɛlɛ́ upíken á kiansi kí Píɛl, wɛɛ́n isɔm yéŋiní í Píɛl ipɛ́t nɔ ɔsɔ́l. 15Weepíkííki yɛ́ɛ kɔ́ ɔmbɔ́k, ɔsɔ́l wááman, yáatukɛn yóond ɛ́ kukɛnɛkɛn nɔɔpɔ́.
Kiéŋukie na kukúúŋa pilɔk pí piliínditíe
(Mál 1.32-34; Lúk 4.40-41)
16Kisɛ́ndɛ mɛɛlɛ́ kíasiáman, póólínon Yésuse ne kutek kú pɛɛnd pamaápá nɔ pilɔk pí piliínditíe. Waakúúŋa pɛ́ɛ na nukál núɛ́yɛ́, weéŋukesi epé kitikit pámaánúma, 17yá anakáánɛ́ epú eŋémímekélíe má Támbák, Isayí, mɔɔ́yɛ́t, móónyípíwóónyi, umɛɛlɛ́ ɛ́ɛ́: no mokóndí máásɔ́ na manúma máásɔ́, wɔ́ úmányipítúúkɛ́n mɔ́ɔ.
Ɔ́ kuɔŋ é Yésus
(Lúk 9.57-60)
18Yésus mɛɛlɛ́ wɛ́ɛ́nɛn kitɔɔt kí pɛɛnd mɔ́pɔŋɔ́ wɔ, ukanyi ó popíónyí pɛ́ɛ́yɛ́ ɛ́ɛ́: Ónúóló tutápɔk asaá nakúnɛ. 19Emenyí pikotí omotí weepísíítini Yésuse, wɔ́ kɛ́ɛ́yɛ́ ɛ́ɛ́: «Oŋónyóonyi, iŋgɔŋɔn kááwɔ kɔɔ́mɔ kitikit áányípáánɛ́.» 20Yésuse kɛ́ɛ́yɛ́ ɛ́ɛ́: «Pisan ápian mapɛl, mononí píana aŋana, maná kɔk niiŋú Muɔ́nɔ́ u mɔɔnd indipá na nitálín ɛtɔ́.» 21Opíónyí omotí kɛ́ɛ́yɛ́ ɛ́ɛ́: «Ɔkɔ́n, ímfá pukaaka ɛ́ɛ́ ínsíɛl kuonyoó taatɛ́ɛ.» 22Maná, Yésus kanyi kɛ́ɛ́yɛ́ ɛ́ɛ́: «Aŋúɛ ɔŋɔ́ káámɛ, yapá peekúén pónyoonon pikú píɔ́p.»
Yésus mélúŋí kiɔ́nimbúnye
(Mál 4.31-41; Lúk 8.23-25)
23Yésuse waamákat ó kitóóŋ no popíónyí pɛ́ɛ́yɛ́. 24Pɛ́mɛɛlɛ́ pakanyɛɛ́ ayuukan, kiɔ́nimbúnye kíond é kufúke ká asaá, kuám aká moomb má asaá móondó é kupíken ó kitóóŋ. Á kíátakáání kisikɛl Yésus pítiman. 25Popíónyí pɛ́ɛ́yɛ́ péépísíítin wɔ́, péenyi wɔ, pɔ́ kɛ́ɛ́yɛ́ ɛ́ɛ́: «Ɔkɔ́n túɔ́kɔ́, tumékú.» 26Wɛɛnyɔk, ukanyi kɔ́ɔ́p ɛ́ɛ́: «Kiákí nupianɛ́ɛ puwaá, pɛɛnd pá kuátap kuayɔ́?» Akáánɛ́ kɔk, weetélimit waánsitɛn emfúnu na asaá, kuɔ́mɔ kúésíen siímbílíkítíkítí. 27Pɛɛnd péésímile, pɛ́ɛ́lɛ ɛ́ɛ́: «Kasí pú puundɛ ewe, na asaá ne emfún ɔ́ɔ́pinɔnɛ́ wɔ́!»
Pɛɛnd pɔ́ pílɔk pí piliínditíe páandɛ́ ɔ́ kitɔŋ kí Katalá
(Mál 5.1-20; Lúk 8.26-39)
28Aná pɛ́mɛɛ́lɛ́ páámán nakúnɛ, ɔ́ kitɔŋ kí Katalá, pɛɛnd pɔ́ pilɔk pí piliínditíe páandɛ́ ááminan ɔ́ mukɔ́ɔ́ é kuesiluméne ne Yésus; pámapá ɔyúkɔ́ kuám ɛ́ɛ́ tɛ mɔɔnd utimapá wɛɛndɛn kí iŋilí ikáánɛ́. 29Póond á kuánsa, pɛ́ɛ́lɛ ɛ́ɛ́: «Muɔ́nɔ́ u Támbák, aátúamba na kiákí? Oól ɛ́ɛ́ éésitúpuéŋítényí kati á kisikɛl á?» 30Kɔ́ɔk á masiá mɔ́ kɔɔ́mɔ akáánɛ́, embúl ú iŋunɛ́p mapá únyáan kɔ́ ɔkɛ́l. 31Pilɔk pí piliínditíe píópísókoliti Yésuse, píkányi kɛ́ɛ́yɛ́ ɛ́ɛ́: «Índɛ aátúkúúŋa, tútɔ́m kí iŋunɛ́p esínée.» 32wɔ́ á pɛ́ɛ ɛ́ɛ́: «Ánuupɔ́!» Píákaám píényepíkín kí iŋunɛ́p; siim síányaatɔ́k kɔ́ ɔkɛ́l, síósipíómbón ká asaá, síékúénin ó moomb. 33Pekííkí iŋunɛ́p pɔ́ɔ́pínɔ, pááyɔɔk á pálɛ́k, páátíánan pɛɛnd epú kitikit púmɛɛ́píɛ́lɛ́ ne epú púmaámɛ́n pɛɛnd pámaápián pilɔk pí piliínditíe. 34Akáánɛ́ pálɛ́k kitikit waám é kuelumén ne Yésus; pɛ́ɛ́nɛn wɔ́, póópísókoliti wɔ́ ɛ́ɛ́ wáátɔk kɔ́ɔ́p ɔ́ kitɔŋ.
လက္ရွိေရြးခ်ယ္ထားမွု
Matié 8: yav
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2026, CABTAL