Matʉyo Tó ntsó Ŋkəŋ sʉ́ʼʉ Yěsô Kristo yɛ́ Matʉyo kɛ ŋweʼe nɛ́
Tó ntsó Ŋkəŋ sʉ́ʼʉ Yěsô Kristo yɛ́ Matʉyo kɛ ŋweʼe nɛ́
Á Ŋkəŋ Sʉ́ʼʉ Yěsô yɛ́ Matʉyo kɛ ŋweʼe nɛ́, mbé sɔ́ póʼŋweʼe ndzó Kaŋ Ffé. Pe póʼ ntíí wé ne sɔ́ ye néré ŋkyé ŋgâ a nzwə́ré Ndzuŋ Kaŋ pú Kaŋ Ffé. Á taʼ póʼŋweʼe yɛ́ pé ncʉ́yí nyoʼ mbziʼe yɛ́ kpaŋató Mboʼmvé yɛ́ pé kɛ ntsó nɛ́, yúŋú nɛ́. Yéré pé ŋgâ, a pwó Matʉyo nɛ́, Yěsô pé ŋɔŋ wɛ́ a yuŋɔ́ tó meno pɛ́ pé kɛ cʉ́rɛ ndzó Ndzuŋ Kaŋ nɛ́. A zhyɛ́ yéré, a záá fû Kristo njʉ́ «Mɔ́ŋ fɔŋ Ndavíd» kii ŋgâ «Fɔŋ pɛ Yúda» nɛ́. Pé ŋweʼé pɛ meno pé ne ŋkaŋ njʉ́ a kɛ záʼ nɛ́ pó, ŋkyé ŋgâ a pɛɛ taʼ poʼŋweʼe khii pó. Tsʉʼ mbé, ŋkəŋ sʉ́ʼʉ Matʉyo fwɛ̌ pwɛ pecyó ŋkəŋ sʉ́ʼʉ pɛ Máákuusə kii Lúkaasə kɛ́ ŋweʼɛ yɔ́b nɛ́.
Ŋkhoʼyɛ́ pé zóʼ Ŋkəŋ Sʉ́ʼʉ Yěsô yɛ́ Matʉyo kɛ ŋweʼe nɛ́, tɛɛmbɛ piŋi ke ntsɛʼɛ ndebéne njʉ́ Yěsô kɛ máʼ ntsɛ́ɛ́ kəpɔŋ pú vó nɛ́. Néré, piŋi tee, a pé yé mbé ŋɔŋ wɛ́ a tyáŋa tsómvé yiŋi nɛ́.
A kɛ ŋweʼé wɔ̌ ŋweʼé Ŋkəŋ sʉ́ʼʉ Matʉyo?
A kɛ ŋweʼé Matʉyo ŋweʼe Ŋkəŋ Sʉ́ʼʉ yɔŋ ndzɔ́ʼɔ́ ŋgǒʼmvé ghúbmétóó pú ŋgǒʼmvé ghúbmétóó ne yítaŋ. Tíí kɛ pě mbɛɛ Levi. A kɛ pé ŋgaŋakpêsebe ŋkɔ́ŋ mbɔ́rɔ́ ntsʉʼɔ mékhó Yěsô.
A kɛ ŋweʼɛ pwó wɔ̌? A kɛ ŋweʼɛ ŋkyé kɔ́?
A ndzó Ŋkəŋ Sʉ́ʼʉ Yěsô yɔŋ yɛ́ Matʉyo kɛ ŋweʼe nɛ́, pé zhʉ́ meno zááme pɛ́ a kɛ pɛ́ ndzó Ndzuŋ Kaŋ nɛ́ ndzóó. A zhyɛ́ yéré pecyó pɔŋ kpaŋa yɔ́b ŋgâ a kɛ ŋweʼɛ, mbě kpaŋá pɛ Yúda. A ŋweʼɛ ne ŋgyɛ̌ne pɔ́b zé ŋgâ Kristo wɛ́ pɔ́b kɛ nzwəʼɛ nɛ́, a Yěsô, mbó mbé ŋgaŋakpêpɔŋ, Fɔŋ pɛ fɔŋ, Ntsɛɛpɔŋ pɛ ntsɛɛpɔŋ.
Pé tsɔ̌ ŋgâ kɔ́ ndzó poʼ ŋweʼe yɔŋ?
Matʉyo nyoʼó ŋgâ Yěsô taʼ Kéʼeyáŋ wɛ́ a tsɔ́ no yɛ́ Mboʼmvé zɔŋɔ nɛ́ pwó pǔkristo, ndzyěne féré ndzó Ndzuŋ Kaŋ, pe ne tʉ̌ŋ sáʼne ne mbziʼe ffé. A Yěsô mbé ŋgaŋakpêpɔŋ wɛ́ pɛ Yúda nzwəʼɛ nɛ́. Ntsʉʼmbé pɛ́ɛ́ ndaʼ wé pɛ Yúda pó, mbɛ́ɛ́ wé ŋkɔŋɔ mvémvé náá. A ndzó ŋweʼe Matʉyo, pe zhʉ pɛ ywoʼɔ ŋweʼe pɛ́ a tsɔ́ njʉ́ Yěsô kɛ pɛ́rɛ́ ghaŋághɔŋ nɛ́, njʉ́ a zhʉ̌yi kɛrɛ́ pɔŋ nɛ́, mbziʼe njʉ́ a tsɔ́ pɛ fuʼno pɛ́, a fɛ́ pɛ kpaŋató nɛ́, mbziʼe njʉ́ a mɛʼɛ ntswee pwɛ pɛ ntsɛ́ssó pɛ Yúda nɛ́.
Ŋgɛ ŋkhú ne Nofɔŋ Mboʼmvé pépéé, a tsɔ́ yɔŋ no ŋgâ: Mboʼmve Fɔŋ, tʉ̌ŋ mé kɛ pɛ́ ndúŋú tsetsáʼ. A zhyɛ́ Yěsô pumésɔŋ zé ŋgâ Mboʼmve yóʼó sísíŋ. Mbɛ ŋgâ tíí Emanwé!
Mbziʼe njʉ́ Matʉyo tsúŋú ŋweʼe ye nɛ́
Pé tsúŋú ŋweʼe Matʉyo pé kaʼa:
Mbziʼe njʉ́ pé kɛ pfɛ́ Yěsô mbó ntsúŋɔ wé ne faʼ ye nɛ́: 1:1–4:11
Nsó Yěsô pú pwófaʼ yé: 4:12–25:46
Vó Yěsô pwɛ njʉyɛ́ne mé ne vó: 26:1–28:15
Yěsô twɔ́ ŋgíŋgye pé: 28:16-20.
လက္ရွိေရြးခ်ယ္ထားမွု
Matʉyo Tó ntsó Ŋkəŋ sʉ́ʼʉ Yěsô Kristo yɛ́ Matʉyo kɛ ŋweʼe nɛ́: XMG
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ