Matʉyo 17
17
Pětro, Zhakə pú Zhâŋ zhʉ́ Yěsô ndzɔ́ʼɔ́ ghɛ́ɛ́ Mboʼmve
(Máá 9:2-9; Lúk 9:28-36)
1Njʉ́ zhyémve péntóó kɛ záʼ nɛ́, Yěsô yɔ́ɔ́ Pětro, Zhakə pú mɔ́ŋmɛ́ ye Zhâŋ pwɛ pɔ́b paʼ, ŋgú kɔ́ʼɔ́ ndúŋú taʼ ŋkə́ŋ sesɛ. 2Mbéne mé sɛ́rɛ́ síŋ pɔ́b: Záŋ ye tsʉ́ʼ nʉyí nʉyí njʉ́ ménab nɛ́, ndzwé pé fʉ́ʉ́ kaʼatɛ nʉyí nʉyí. 3Pɔ́b ghɛ́ mvuwɛ́ Mǔsê pú Elya, ŋgaŋatsɔ́kpaŋató Mboʼmve mô, pwɛ pɔ́b tsé səŋɛ. 4Néré, Pětro tsɔ́ pwó Yěsô ŋgâ: «Ntsɛɛpɔŋ, a pú ŋgâ piŋi pɛ́ ghaŋ. A pɛ́ɛ́ yɛ́ wo kʉyě nɛ́ mə ŋkwód ntab yíkyéd ghaŋ. Taʼ ye pwó wo, cyó taʼ ye pwó Mǔsê ne cyó taʼ ye ŋkʉ́rʉ́ pwó Elya.» 5Njʉ́ a kɛ tsé ntsɔ́ nɛ́, taʼ pfuŋ yɛ́ a fʉ́ʉ́ kaʼatɛ nyʉ̌nyʉyí nɛ́, kubɔ wɔ́b. Pɔ́b zóʼ, taʼ ndzəb ntsɔ́ ndzóʼó ŋgâ: «Yɔŋ Mɔ́ŋ ya wɛ́ mə kʉ́yé kaʼatɛ nɛ́, mə ntsɔ́ʼɔ́ wé pe ne nkʉyéne máá. Puŋ zóʼó wé!» 6Ŋkhoʼyɛ́ ŋgíŋgye pé péré kɛ zóʼ néré nɛ́, pɔ́b vɔ̂ syé kúbú záŋ pɔ́b náá syé, ŋgɛmbɛ vod kəkwéʼe gbáá wɔ́b. 7Yěsô kʉ́yó pfúŋɔ pɔ́b, kɛ́bɛ́ wɔ́b, ntsɔ́ ne pɔ́b ŋgâ: «Puŋ ŋǎ syé! Kii puŋ ndɛ tsé ntsɛ́ʼɛ́ pɔ́ɔ́.» 8Pɔ́b ghɛ́ ŋaʼa míí mɔ́b ke njʉ́ʉ́ ndaʼ Yěsô ne ndúŋ yé. 9Njʉ́ pɔ́b kɛ shʉ̂ ŋkə́ŋ nɛ́, Yěsô sú ntəŋé mɔ́b ŋgâ: «Kii puŋ ntsó no yɛ́ a záʼa siŋ puŋ nɛ́ pwó ŋɔŋ, kaʼatɛ Mɔ́ŋ ŋɔŋ zhʉyɛ́ ne vó.»
Yěsô ntsó pɛ meno ŋkyé Elya
(Máá 9:11-13)
10Ŋgíŋgye pé pfirɛ wé ŋgâ: «A zhyɛ́ kɔ́ ghaŋákeʼekaŋ ntsɔ́ ŋgâ Elya mbě ŋkʉ́yó ŋkɔ́ŋ?» 11A pɔ́rɔ́ ne pɔ́b ŋgâ: «Ɔ́ŋɔ́, a sísíŋ ŋgâ Elya mbě ŋkʉ́yó, ne ntéŋéne ŋkɔŋɔ meno náá tíí. 12Ntsʉʼmbé, mə səŋɛ wúŋ ŋgâ Elya kɛ́rɛ náʼá ŋkʉ́yó, pɔ́b kirí mbzyɛ́ne wé, ŋgyɛ́ ŋkɔŋɔ yɔ́b yɛ́ pɔ́b kɛ kʉ́yé náá nɛ́ mbəb yé. Pɔ́b náʼá ke ŋgyɛ́ tómbəb Mɔ́ŋ ŋɔŋ zhʉ́ ŋgəʼo pe néré.» 13Néré ŋgíŋgye pé zóʼ ŋgâ a tsɔ́ɔ́ no Zhâŋ ŋgaŋafɛ́ kpênse.
Yěsô pɛ́d taʼ Mɔ́ŋ wɛ́ á kɛ́ vɔ̂ tó nɛ́
(Máá 9:14-29; Lúk 9:37-43)
14Njʉ́ pɔ́b kɛ páŋa pfúŋɔ́ pɔŋ zááme nɛ́, taʼ ŋɔŋ kʉ́yó mvɔ́ ne kpee Yěsô ntsɔ́ pwó ye ŋgâ: 15«Ntsɛɛpɔŋ, tséʼé tsaaghəghəŋ ŋkyé Mɔ́ŋ ya! A tsé mvɔ́ tó. A záá wé ne ŋgəʼo kaʼatɛ, ŋgyɛ́ pecyó ŋkhoʼ a vɔ́ ndzɔ́ʼɔ́ mɔ́ɔ́, kii ŋgâ a ndzɔ́ʼɔ́ nse. 16Mə kɛ yɔɔ wé ŋkʉ́yó ne yé pfúŋɔ́ ŋgíŋgye po, n ntsʉʼmbé pɔ́b pe kúʼɔ́ ne ŋgyɛ́ne a fwó pó.» 17Yěsô yɔ́ɔ́ ntsó, ntsó ŋgâ: «Puŋ, ŋgɔbɔ́ ŋumésɔŋ ndzebe, kii tséʼé psyɛ́ndzɔʼ, mbó ŋgyɛ́ meno fáátó. Piŋi mbɔ́rɔ́ tsóó fuʼ níŋ? Mə mbó gbáá ndzɔʼ ŋkyé wúŋ kɛ́ɛ́ yíkɔ́ puŋ pɔ́rɔ́ mbzyɛ́ ya mɔɔ? Kʉ́yó ne Mɔ́ŋ wo ghaŋ fɛ́ ne mo.» 18Yěsô mǐ zhʉye kəpɔŋ, a twɔ́ mbəb Mɔ́ŋ wéré. Kpaʼ ŋkhoʼ yéré mbəb ye fwó. 19Néré, ŋkhoʼyɛ́ Yěsô kɛ pé pwɛ ŋgíŋgye pé ne ndúŋ pɔ́b nɛ́, pɔ́b kʉ́yó pfúŋɔ́ ye mvírɛ́ wé ŋgâ: «A zhyɛ́ kɔ́ psi pé kúʼɔ́ ne ndzǔne wé pɔɔ?» 20A tsɔ́ ne pɔ́b ŋgâ: «Á zhyɛ́ no yɛ́ psyɛ́ndzɔʼ yúŋ khóó nɛ́. Kpaʼ sísíŋ mə ntsɔ́ ne puŋ, a pɛ́ɛ́ taʼ zhyémve puŋ tséʼé psyɛ́ndzɔʼ a ghɛ́ɛ́ njʉ́ míí mbɛrɛ̂tɛ́ nɛ́, mbǒ tɛɛmbɛ puŋ tsɔ́ pwó ŋkə́ŋ səsɛ yɔŋ ŋgâ: “ŋǎ ghaŋ ŋgú ghiŋ!” A ke ŋǎ néré. Cyó yɔ́b yɛ́ tɛɛmbɛ a pó ntsɛ́ɛ́ wúŋ nɛ́ pe pé ŋkʉ́rʉ́ pó. 21Ké mbó mbé, tɛɛmbɛ yɔŋ mbziʼe zhʉye kəpɔŋ pe twɔ́ kii ke mbɛ́ɛ́ ne ntsɛ́ʼɛ́ Mboʼmve pú zɛ̌nse pó.»
Yěsô kémbó ntsó ŋgəʼo yɛ́ a njʉ́ mbɔ́rɔ́ njʉyɛ́ ne vó nɛ́
(Máá 9:30-32; Lúk 9:43-45)
22Njʉ́ pɔ́b kɛ tɛ́rɛ ndzó pɛ́rɛ́ ŋgɔŋ Galílya nɛ́, Yěsô tsɔ́ pwó ŋgíŋgye pé ŋgâ: «Pe ŋkʉ́yó fi Mɔ́ŋ ŋɔŋ ndzó pwó pumésɔŋ, 23pɔ́b nɔ́ʼ wé. Ŋkhoʼyɛ́ pe nɔ́ʼɔ́ wé nɛ́, zhyémve pekyéd ghɛ́ ndzáʼa, a zhʉyɛ́ ne vó.» Pɔ́b ntsuŋi kaʼatɛ.
Yěsô pú Pětro péé sebe
24Njʉ́ pɔ́b kɛ tsé mbáŋa Kapɛɛnawum nɛ́, ghaŋákpêsebe ne tíí Ndáméted kʉ́yó pfúŋɔ́ Pětro mbzirɛ́ wé ŋgâ: «Kéʼeyáŋ wúŋ tsé mbé péé sebe yɛ́ pe fú ne didraʼmə nɛ́ pɔɔ?» 25A ntsó ŋgâ: «Ɔ́ŋɔ́.» Ŋkhoʼyɛ́ Pětro kɛ páŋa ndáb nɛ́, Yěsô tsɔ́rɔ́ wé, ntsɔ́ pwó ye ŋgâ: «Símo, wo kpaŋa yo pe níŋ? Péfɔŋ ndúŋú tsetsáʼ kpéé taŋsə kii sebe pe pwó mbɛ́kɔ́? Pwó púpɔ́b kii pwó pushʉyɛ?» 26Njʉ́ a kɛ pód ŋgâ: «Pwó pushʉyɛ̂» nɛ́, Yěsô tsɔ́ pwó ye ŋgâ: «Njʉ́ a kɛ́ʼɛ́ nɛ́, pupé ntsɛ́ʼɛ́ ŋgʉŋine. 27Mbɛ néré, ne ŋgyɛ́ne ŋgâ kii pɔŋ pé ké nɛ́ ndɛ shaŋa, ghú lepaanse, máʼ mbaʼ, sɔ́ ndíí ssó yɛ́ wo gbáá nɛ́, ŋaʼ ntswee yé: wo njʉ́ taʼ mbób yɛ́ pe fú ne Setatɛɛ#17:27 Setatɛɛ: mbəb yɛ́ a didraʼmə yíkwa nɛ́.. Tubɔ, ŋgú fɛ́ ne pɔ́b ne yáʼa sebe.»
လက္ရွိေရြးခ်ယ္ထားမွု
Matʉyo 17: XMG
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ