Matʉyo 15
15
Fiʼ ndúŋú nuŋú pɛ tɛd
(Máá 7:1-13)
1Néré pɛ Farízya pwɛ ghaŋákeʼekaŋ twɔ́ Yerʉ́salɛm ŋkʉ́yó pfúŋɔ́ Yěsô mvirɛ wé ŋgâ: 2«A zhyɛ́ kɔ́ ŋgíŋgye pó vɔ̂ kaŋ tɛd tɛd piŋi? Pɔ́b zɔ mɔ́b kii sǒ mbwó.» 3Yěsô pɔrɔ́ ne pɔ́b ŋgâ: «Ŋgɛ ŋkú ne puŋ, a zhyɛ́ kɔ́ puŋ yǎ ndúŋú núŋu yuŋ, mvɔ́ kaŋ Mboʼmvé? 4Ntsʉʼŋgɛ mbɛ Mboʼmvé ntsó ŋgâ: “Ghúʼɔ́ tɛd wo pú mɛ́ wo.” Ké mbó ntsó ŋkʉ́rʉ́ ŋgâ: “Ŋɔŋ wɛ́ a niŋi ndɔŋ tó tɛd ye kii mɛ́ ye nɛ́, pe nɔ́ʼɔ́ wé.” 5Ŋgɛmbɛ ne puŋ, pǔŋ tsɔ́ ŋgâ: “Ŋɔŋ wɛ́ a tsɔ́ pwó tɛd ye kii mɛ́ ye ŋgâ: yɔ́b yɛ́ a ghɛmbɛ mə ŋgɛ ŋgebe wo nuŋ nɛ́ pe nɔŋ, mbɛ́ɛ́ yɔ́b shʉ́ ye kiʼíme. 6Cyó yɔ́b tsé mbé tsiŋɛ wéré ŋɔŋ ne ŋgebéne tɛd ye ŋkʉ́rʉ́ pó.” Néré puŋ yɔ́ɔ́ núŋu yúŋ mbǒ ntsó Mboʼmvé núŋ. 7Pɛ pépwɔmíí! ŋgaŋatsɔ́kpaŋató Mboʼmvé Ezaya kɛ cʉ̌yi ntsó ŋkyé wúŋ ŋkhoʼyɛ́ a kɛ ntsɔ ŋgâ:
8“Pɔŋ pɔŋ ghuʼu ya pe ne kɔbɔntswee,
Ntsʉʼmbé ndzɔʼ yɔ́b pɛ́ɛ́ ywoʼɔ́nduŋ!
9Faʼ pɛ́ pɔ́b fáʼa ne fɛ́ne ŋgúʼune ne mo nɛ́, tséʼé ghebe pó,
Ŋkyé ŋgâ ntʉ́ʉ́ yɛ́ pɔ́b fɛ́ nɛ́, pɛ́ɛ́ ndaʼ nuŋú pumésɔŋ”.»
Yɔ́b yɛ́ a siŋɛ́ ŋɔŋ nɛ́
(Máá 7:14-23)
10Ndzáʼnéré, Yěsô fú pɔŋ, ntsɔ́ ne pɔ́b ŋgâ: «Puŋ nzwəʼé ntsʉyí ndzóʼ! 11A yɔ́b yɛ́ a ŋkúŋɔ́ ntswee ŋɔŋ nɛ́ siŋɛ́ wé pó. Ntsʉʼmbé, a yɔ́b yɛ́ a twɔ́ ntswee ŋɔŋ nɛ́, siŋɛ́ wé.» 12Néré, ŋgíŋgye pe súʼu mbəb yɔ́b fɛ́ pfuŋ ye, ntsɔ́ pwó ye ŋgâ: «Wo zé ŋgâ ŋkhoʼyɛ́ pɛ Farízya zóʼ ntsó wékénɛ́ nɛ́, a váʼá wɔ́b váʼ?» 13A pód ŋgâ: «Ŋkɔŋɔ tsí ntsó yɛ́ a pfé Tɛd ya wɛ́ a pépéé náá nɛ́ pó, pe náʼá ke sɔ̌ʼsɔ̂. 14Puŋ tee wɔ́b, a pɛ ffǒme nɛ́ ntyaŋa pɛ ffǒme. A pɛ́ɛ́ yɛ́ taʼ ffǒme tyáŋa taʼ ffǒme nɛ́, mbǒ pɔ́b pépáá kaa náá mvɔ́ ndzó píí!» 15Pětro yɔ́ɔ́ ntsó, ntsɔ́ pwó ye ŋgâ: «Ŋkee tsi nsó ywʉ́bíme wékénɛ́ ne psi.» 16Yěsô gháá: «Mbɛ puŋ, pǔŋ kɛ kɛrɛ yuŋ kii ntséʼé zé? 17Puŋ zɛ́ yuŋ ŋgâ ŋkɔŋɔ yɔ́b yɛ́ a kúŋɔ́ ntswee ŋɔŋ náá nɛ́, ghúú pfɔ̂ ye, ndzáʼa záʼá yóʼó ŋgú ndzó kɔrɔ pɔ̌ɔ? 18Ntsʉʼmbé yɔ́b yɛ́ a twɔ́ ntswee ŋɔŋ nɛ́, twɔ́ ndzó ndzɔʼ ye, a pó mbé yéré sɛrɛ ŋɔŋ a cʉ́ʼɔ́ ŋusíŋme. 19Pɛ kpaŋátó kəpɔŋ, nɔ̌ʼne ŋɔŋ, púbɔ́ ndáá, menoghóʼotó, ndzwə̌ne, tíípaŋ, pɛ ntó, twɔ́ ndzó ndzɔʼ ŋɔŋ. 20A meno pɛ́ a siŋɛ́ ŋɔŋ nɛ́. Ntsʉʼmbé ndzône mɔ́b kii sǒ mbwó tsé mbé siŋɛ́ ŋɔŋ pó.»
Psyɛ́ndzɔʼ Məŋgʉ́yé shʉyɛ̂
(Máá 7:24-30)
21Yěsô kɛ ŋǎ yóʼó, ŋgú ndzó pɛ́rɛ́ ŋgɔŋ Tii pú Sidɔŋ. 22Taʼ Məŋgʉ́yé ŋgɔŋ Kanahaŋ twɔ́ yóʼó ndzye ne ŋgéʼne ŋgâ: «Tséʼé tsaaghəghəŋ ya kɛ Ntsɛɛpɔŋ, Mɔ́ŋ fɔŋ Ndavíd! Zhʉye kəpɔŋ tsé nyʉ Mɔ́ŋ ya wé Məŋgʉ́yé kaʼatɛ.» 23Ntsʉʼmbé a pe pɔrɔ́ wé ne cyó no pó. Ŋgíŋgye pé suʼú mbəb yɔ́b fɛ́ pfuŋ ye, ntsɔ́ pwó ye ŋgâ: «Núʼɔ́ wé ŋkyé ŋgâ a ke ŋgéʼe ghéʼe nɛ́ ndzəb piŋi.» 24Yěsô pód ŋgâ: «Pe kɛ ke ntwɔ́ ya pe ndaʼ pfúŋɔ́ pɔ́ŋ Issayɛ pɛ́ pɔ́b pɛ̂ njʉ́ pɔ́ŋmvó pɛ́ pɔ́b pwó pwó nɛ́.» 25Ntsʉʼmbé Məŋgʉ́yé wéré kʉ́yó féd kweʼé mé síŋ ye ntsó ŋgâ: «Ntsɛɛpɔŋ, kʉ́yó kpee ya!» 26A pód ŋgâ: «A tsyɛ́ ŋgâ pe yɔ́ɔ́ mɔ́b pɛ Mɔ́ŋ máʼá pwó pɔ́ŋmvó khóyáá pó.» 27Məŋgʉ́yé wéré pód ŋgâ: «A sísíŋ kɛ Ntsɛɛpɔŋ! Mbó mbé sísíŋ ŋgâ pɔ́ŋmvó khóyáá zɔ mvuʼ mé mɛ́ a twɔ́ ndúŋú téépere tɛd wɔ́b mverɛ syé nɛ́.» 28Néré Yěsô pɔ́rɔ́ pwó ye ŋgâ: «Mɛ́nde, psyɛ́ndzɔʼ wo ghɛ́ɛ́! A pɛ pwó wo njʉ́ wo zɔŋɔ nɛ́!» Mbəb Mɔ́ŋ yé wé Məŋgʉ́yé ke fwóó kpaʼ ŋkhoʼyéré.
Yěsô pɛ́d ghaŋághɔŋ
(Máá 7:31)
29Yěsô ŋǎ yóʼó ŋgú ne gháánse Galílya. Kɔ́ʼɔ́ ndúŋú ŋkə́ŋ, mbáŋa yóʼó ŋgɔrɔ́ syé. 30Pɔŋ zááme kʉ́yó pfuŋ ye, ŋgɛmbɛ mbé pwɛ pɛ ŋkʉ́ŋʉ́, pɛ ffǒme, pɛ ghaŋáyɔ́ʼɔ́, pɛ móʼ ne pecyó mbziʼe ghaŋághɔŋ ŋkʉ́rʉ́, ŋkʉ́yó ne wɔ́b síŋ Yěsô, á pɛ́rɛ́ wɔ́b. 31Fǐme nɛ́, no ntsɛ́ɛ́ wɔ́b njʉ́ pɔ́b kɛ zhʉ́ pɛ móʼ ntsɔ́ no, pɛ ŋkʉ́ŋʉ́ fwó, pɛ ghaŋáyɔ́ʼɔ́ nyí ŋgerɛ́ŋged, pɛ ffǒme zhʉ́ ywoʼ nɛ́. Pɔ́b fɛ́ ŋgúʼune pwó Mboʼmvé pɛ Issayɛ.
Yěsô zhʉyí ŋkáb mbziŋí yíkwa
(Máá 8:1-10; Mat 14:13-21)
32Yěsô fú ŋgíŋgye pé ntsɔ́ ne pɔ́b ŋgâ: «Mə ntséʼé tsaa ghəghəŋ pɔŋ pɔŋ kaʼatɛ, ŋkyé ŋgâ a ŋkhoʼyɔŋ zhyémvé pekyéd njʉ́ pɔ́b ne ŋgə́ ya nɛ́, mbó mbé tséʼé yɔ́b yɛ́ pɔ́b ndzɔ̂ nɛ́ pó. Mə nuʼɔ wɔ́b núʼú yóʼó pɔ́b, mbǒ pɔ́b ntséʼé ntʉŋ ne nyǐne pó.» 33ŋgíŋgye pé pɔ́rɔ́ pwó ye ŋgâ: «Piŋi zhʉ́ mɔ́b pɛ́ɛ́ ndzó taʼ fób njʉ́ yɔŋ nɛ́ njʉ́yí ndɔŋɔ pɔŋ pɔŋ nuŋ kaʼatɛ pɔ́b zɔrɔ?» 34Yěsô ntsɔ́ ne pɔ́b ŋgâ: «Puŋ tséʼé mbré yíkɔ́ ghɛ́?» Pɔ́b pód ŋgâ: «Mbré yísambáá ne pɔ́ŋ ndii ssó.» 35A tsɔ́ pwó pɔŋ péré ŋgâ pɔ́b ghɔrɔ́ syé, 36ndɔ́ɔ́ mbré yísambáá yéré ne pɛ ssó, fɛ́ ŋgúʼune pwó Mboʼmve, póʼ fɛ́ pwó ŋgíŋgye pé, pɔ́b ghobɔ pwó pɔŋ. 37Ŋkɔŋɔ wɔ́b náá pfód ndzód. Pe yéré pfuʼ ye yɛ́ a kɛ tsʉ́ʼ nɛ́ a yuŋɔ́ ndzó túŋ yísambáá. 38Tsʉ́ʼ ŋgɛmbɛ, pɔŋ pɛ pɔ́b kɛ pfód nɛ́ pe ŋkáb mbziŋí yíkwa kii sí pěŋgyé pwɛ pɛ Mɔ́ŋ. 39Ŋkhoʼyɛ́ Yěsô kɛ nuʼɔ wɔ́b nɛ́, a kɔ́ʼɔ́ ndzó páŋ ŋgú pɛ́rɛ́ ŋgɔŋ Magadaŋ.
လက္ရွိေရြးခ်ယ္ထားမွု
Matʉyo 15: XMG
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ