Sáŋa 11
11
Nigú ná Lasála
1Mɔnd ɔfɛ́n ká Lasála manɔ́ma. Umabá ugɛ́ga Betani, gɛdɔŋ gá Maliá na endimen waga Máta. 2Maliá nyɛ agánd uméesugúneén Ɔgúnɔ́ megud má ɔlɔf agá bɛ́gɔnd uwond uwofuóno bɛ́ na iŋide ság. Lasála umáanɔ́má mabá endimen waga. 3Belimen abagánd abaány ebédúmínyi Yésu nsɔ́m ká: «Ɔgúnɔ́, ogúl wɔw gúnɔ́ma.»
4Yésu máal na guɔ́b anaány, uganyɛ ká: «Gunɔ́ma uguány dɛbá gá nigú, gúnyɛ ká gúdíye band budúumé bá Gɔdányá na ká, band án agá gunɔ́ma uguány, anyɛ́ Gudányá éŋené Mɔɔn waga nugúm.» 5Yésu mebíléné Mata na Maliá na Lasála. 6Umáal na guɔ́b ká Lasála gúnɔma, uwand gugind medug mándɛ kɔɔ́m umáabá. 7Agá gélem ány, uganyɛ gá bafɔ́nɔfɔ́n bág ká: «Nsɛ́ diónd Yudé.» 8Bágányɛ gág ká: «Éheé Ofúnyifúny, buɔ́s ebúné Beyúdɛn maál bɔ́guɔ́n na adany; ánd guond kɔ́ e?» 9Uwondinyi bɔ́ ká: «Buɔ́s gidigid nyɛ na bɛsɛgɛl biát na biándɛ ɔgɔ́ ɔ? Mɔnd maánda na buɔ́s, udigúbúbénen gágual ká, gise gá buɔ́s nyɛ kɔ́. 10Mɔnd maánda gɔg agá mbíne, ugúbúbénen gágual ká ugúbúdubud.»
11Umáal na guɔyɔ anaány, uganyɛ ká: «Ogúl wasɔ Lasála nyɛ gá dunɔ́, yɛɛ́b guényi wɔ́.» 12Bágányɛ gág ká: «Ɔgúnɔ́, ɔ́gɔ usabɛ́dɛ́mɛn, ugeéŋúg.» 13Yésu mambá guɔyɛd ká Lasála segú, bafɔ́nɔfɔ́n bág ɔbɔɔ́b ány ká Lasála nyɛ gá dunɔ́. 14Uwegúsín bɔ́ ká: «Lasála segú. 15Nguɔ́bɔɔn bese gágual ká ndɛɛ́gɔbá kɔ́, buád buanda nuganɔ́fɔ́nɔfɔɔn guágaan ɛdɛm saán agamia. Ubuány gidigid nyɛ besé gán góbusió, nsɛ́ dɛɛ́b agág gá masiá nɛ́nuán.» 16Ádiány, Tómasia, bámáabá bábɛ́laan sɔ́n ká Didime, ganyɛ gá bɔsɔ́gɔ́ bafɔ́nɔfɔ́n ká: «Nsɛ́ basuá sɔ́n dɛɛ́b diégú ɔlɔŋ na Ɔgúnɔ́ wasɔ.»
Yésu nyɛ gusɔ́d
17Yésu máal na guege uwɔfuɔgɛn ká bómonyó Lasála ínen medug méní. 18Betaní nyɛ egúy na Yelúsalɛm buand bá bakílomɛ́ta bádadɔ. 19Buád buanda Beyúdɛn móol giod agá Mata nɔbɔ na Maliá gá ɛmɛn ya nigú. 20Anyɛ́ Mata mɔ́ɔb ká Yésu ganyɛ kɔ́, uwɔb gá guogólí wɔ́, gɛsɛgɛl igiány Maliá mabá ilukié agá gians. 21Mata ganyɛ gá Yésu ká: «Ɔgúnɔ́, ímábá águbá kɔ́ gesí endimen wám diígugú. 22Ta nɛ́nuán ewe, ngúlɛnsaan ká, buanda ogogúnuófún Gɔdányá, ugagúgufá bɔ́.» 23Yésu ganyɛ gág ká: «Endimen wɔw gaguányɔg aga ebeguén.» 24Uwondinyi ká: «Ngúlɛnsan ká uganyɔg aga ebeguén gá gúman gá gus.» 25Yésu ganyɛ gág ká: «Inyɛ ewe wenyugenyé bɛlɔŋ weŋeén bɛ́ gusɔ́d. Mɔnd wuŋádábaná gɔsɔ́dɔɔn ta ubá eguén. 26Mɔnd mɔ́sɔ́dɔɔn wond wuŋádabaán, ta buɔ́s udiínugú, aguádábaan nɔ e?» 27Mata guondinyi Yésu ká: «Nguelumenyi Ɔgúnɔ́, nguadábaan ká anyɛ Kilíse Mɔɔn wá Gɔdányá ubiananá ká wuúl egegus egue.» 28Mata máal úmágála anaány, uwadɔ́mb. Uwabɛ́lɛ́gɛn Maliá endimen waga uganyɛ gág nŋúsié nŋúsié ká: «Ofúnyifúny másiám, ugúgubɛ́laan.» 29Maliá máal na guɔ́b anaány, uwedúmbi gɔb aga Yésu. 30Nánié Yésu mabá umányɛ udibíŋín agá gɛdɔŋ; umabá umányɛ kɔɔ́m Máta móogólí wɔ́. 31Beyúdɛn bámáabá agá gians ɔlɔŋ na Maliá bófuogonyi wɔ́ ɔdɛm, masiánɛ́n gág gá gúnyɔ́dɔ́g, uwaám. Ebelúbúg gá gúládaan wɔ́, bábɛ́dága ká ugɔ́baan agá gɛbɛl gá guabaŋá. 32Maliá máal na guege kɔɔ́m Yésu máabá, uwaguɛn wɔ́ agá bɛgɔnd uganyɛ gág ká: «Ábá aya Ɔgúnɔ́, gesí endimen wám diígugú.» 33Anɛ́ Yésu máan Maliá na Beyúdɛn bámáaládaán wɔ́ baŋa, ubuébísíd wɔ́ agá ɔdɛm, ubuébueŋidi wɔ́. 34Uwófún ká: «Núgunyo wɔ́ nány e?» Obóndinyi ká: «Ɔgúnɔ́ ólo gasián.» 35Yésu uwabaŋɛd. 36Beyúdɛn ganyɛ ká: «Ánuáná anyɛ́ unyá gubá ubíléne wɔ́.» 37Gɛdam gá Beyúdɛn gímodió mɔyɔ́ ká: «Saá uwɔ́ uméeŋúgí eŋís yá obúdobudo e, údiígubá bágual ká Lasála digu e?»
Yésu ményúgi Lasála agá nigu
38Ubuánd gubísíd Yésu agá ɔdɛm, uwɔ́ gɔb agá gɛbɛl gɛ́máabá gidimén agá gɛdany, mfɔ́gilɔ iyaány mabá ifuúgén na gianta gá nɛdany. 39Uganyɛ gɔg ká: «Énuélí nɛdany.» Mata endimen wá gɛlɔŋ ganyɛ gág ká: «Ɔgúnɔ́, uganyá gúnufe bɔbɛ, gágual ká búgány ínen medug méní unyá aya.» 40Yésu guondinyi wɔ́ ká: «Ndimɔ́guɔyɛdɛn ká, ámádáb, agaguán nugúm ná Gɔdányá e?» 41Ebéli gɔg nɛdany. Yésu uwedugi eŋís ugumuana uganyɛ ká: «Babá mmágufá giod gá bese gágual ká ɔmɔɔ́b mbísógól yám. 42Ngúlɛnsaan ká agany ɔ́bɔɔn mbísógól yám bɛsɛgɛl gidigid, nŋuɔ́yɔ bú gɔg gobusió bá giŋi gá band ebe bɔ́nbɔŋɔnɔ́ ká bádáb ká amandɔ́m.» 43Umáal wɔyɔ anaány, uwansɛ́d ekelu magɔ́gɔ́n ká: «Lasála ámá ány!» 44Gɛlɔŋ gá Lasála guám, bɛgɔnd na ɛmbɔ́g bɔŋɔ́ bɔŋɔ́ na biéns bá ndɔ́mb, busió bufúgén na giéns gá gɛla. Yésu ganyɛ gá band ká: «Ónuolúnó wɔ́ nútɛɛ́n wɔ́ údɔ́mb.»
Bagɔn guóŋoon Yésu ɛdɔg
(Mat 26.1-5; Mál 14.1-2; Lúk 22.1-2)
45Giod gá Beyúdɛn agá ɔlɔŋ wá ebe bómóol aga Maliá máan ubú Yésu máal, ebéŋin ɛdɛm sɔ́b agagá. 46Bómodió ɔgɔ́b gá ɔlɔŋ mɔnɔ́fuɔ́gɛ́n bafalisiɛ́ŋ, ɔbɔ́yɔɔn bɔ́ buand ubú Yésu máal. 47Bɔgógɔ na bafalisiɛŋ abád gubɛ́gɔ́sɛ́d agá nɛgál ɛnɛgɔn bágányɛ ká: «Diál gɔg nanyá e? Gágual ká, mɔnd ewe guála bisey giod! 48Dɛ́mánɛɛn ká wúbaan nobusió na guala anaány, giod gá band gágaán ɛdɛm sɔ́b agagá, Balomɛ́ŋ gagaŋɛmɛd bagád ɔnyɛb wá Gɔdányá, bónd befúfi nigúl nás!» 49Ɔgɔ́b gá ɔlɔŋ, mɔnd omoom ɔfɛ́n ká Kayífe, umáabá ɔgɔn wa bɔgɔ́gɔ yɔŋ iyaány ganyɛ gɔ́b ká: «Nudiguɔ́bɔɔn ta ɔnkól gá bú! 50Nudɛguánɔna ká búnyɛ gán gá bese ká mɔnd omoom gú góbusió bá nigúl e, igiány gigúl gɛdɔŋ dɛfɔ́f e?» 51Udimɔbiɔ́yɔɔn moóny amaány na ɛmbɛ́dágɛ́dɛ́n yág yá muát. Anyɛ́ umáabá gɔg ɔgɔ́n wa bɔgɔ́gɔ yɔŋ iyaány, uwagálɛ́d anyɛ ibús, ká Yésu mabiánaán ká úgú góbusió bá nigúl ná Beyúdɛn, 52saá gɔɔ́gɔ gá nigúl iniány gusúg, gá gúgɔ́sɛgan sɔ́n kɔɔ́m gómoom baan bá Gɔdányá banyá mɔkɔɔ́m, mɔkɔɔ́m. 53Gubanyɛg buɔ́s ubuány, befuŋ bá Beyúdɛn abásɔ́mb ká bɔɔ́n Yésu. 54Buádɛ́n buanda Yésu mɔ́ɔdɔ́mb gɔ́dɔ́mbɔdɔ́mb agá eŋís yá Beyúdɛn. Uwɔbígɔ́gɛ́d giáy gá giéns gá gus gínyá egúy na giɔ́ndɔ́, agá tísɔn unyá ɔfɛ́n ká Efaláyíme, uwɔlɔbɛn kɔ́ na bafɔ́nɔfɔ́n bág.
Gɛnyáŋɔna gá Betaní
(Mat 26.6-13; Mál 14.3-9; Lúk 7.36-38)
55Budɔ́mb bá pásíka mabá búgányɛ egúy, band bá gɛdɔŋ giod mabaán Yelúsalɛm gá guabɛ́sɔ́gɔ́ná budɔ́mb maányɛ búdɛ́bányɛ́g. 56Bámabá agá ɔnyɛb nágadá bámba Yésu, bóbiófoon bɔ́bɔ́ na bɔ́bɔ́ ká: «Nugúbɛ́dága ká nanya e? Ugeguúl e, udigeguúl e?» 57Bɔgɔ́gɔ na bafalisiɛ́ŋ méeŋín mbɛ́dɛ́na ká, mɔnd málɛnsaan kɔɔ́m Yésu nyá, wɔyɛd báb guádɛ́gɛ́n wɔ́.
လက္ရွိေရြးခ်ယ္ထားမွု
Sáŋa 11: MMU2
အေရာင္မွတ္ခ်က္
မၽွေဝရန္
ကူးယူ

မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ