2 Kɔlɛntiɛ́ŋ 9
9
Gɔdányá gúbíléne band béŋené na ginɔg gá ɔdɛm
1Giáy gɛ́lɛ́ŋaná gidúgune gá beédéb bá Yelúsalɛm, ndɛguánd gubianan buanda bɔ́gúnuɔ́yɛdɛn. 2Ngúlɛnsan ká nugúbianan binɔ́g bá ɛmbɛ́dágɛ́dɛn gá buóny ubuány; ngúbiɔ́yɔ gán góbusió aga beédéb bá Maseduán gá bú. Díguɔ́yɔ gɔ́b ká, belimen bás bá giéns gá gus bábɛ́laná ká Akayí mabɛ́dábɔ́n feké yɔŋ iyíné ká béŋin. Gubiéŋin gán uguány gudóndonyi giod gá beédéb. 3Imánɔ́dɔ́mɛ́n belimen bás abaány ká ubú dɛnyá guɔyɔ gán dɛguá agá madɛ́ga. Búguófoon ká buánɛ́g ká nuganyɛ babɛ́dábɔ́nán na bɛbiág baán gɔɔ́gɔ anyɛ́ imɔ́ɔyɛ́d. 4Ndɛguámba ká belimen bás bá Maseduán méndílígin aganuá, buánɛ́g ká nudibá babɛ́dábɔ́nan. Búgaal ká ɔduɔ́ gɔnɔ́ diádɛgɛn, ta banuá sɔ́n. 5Buád buanda inyá guán ká mbísógólidi belimen bás abaány ká bákɛn aganuá béndenyi bɔsɔ́m bá muonyi numáadán ká nugagɔ́sa. Anyɛ́ nganúsiáma, muonyi umuány gabá múgányɛ mugɔ́sɛ́gánan. Búgedíye ká nuseéŋin na ɔdɛm wá bese, saá na gɛgɔ́da.
6Ánɔlɛns ká:
Mɔnd ugúnaná magɔ́nɛd siɔdɛd,
gúbianan siɔdɛd
ewe ugúnaná giod,
gúbianan sɔ́n giod # 9.6 Alɛ́ŋɛ́d nsab 22.8 !
7Nsɛ́ sig mɔnd a éŋin anyɛ́ ɔdɛm wág ɔ́yɔnɔ́, saá na mɔgɔ́dɔ́d, ta na gɛgɔ́da. Gágual ká Gɔdányá gúbíléne mɔnd wéŋené agá bɛdɔdɛn. 8Gɔdányá nyɛ bégúnuéŋin anama yá manda mómodió gúdúmbídenyi moónd mábág. Anaány ká núbianan bɛsɛgɛl gidigid buanda búnuófoninó, ká nuála manda má bese. 9Musamb má Imbɔbɔnɔ guɔyɔ ká:
Uguáfa, wéŋeen basɔ́gasɔaga giod,
Unyɛ ndényé nabaánamana # 9.9 Alɛ́ŋɛ́d Sóm 112.9 .
10Gɔdányá wéŋené magɔ́nɛd gá mɔnd ugúnaná, wéŋeen sɔ́n buanda bágúnyá, ugenuéŋin sɔ́n magɔ́nɛ́d mónuófoninó. Ugegumenyi mɔ́ ká busi bán éŋin masamɔ giod. 11Ugaal ká núbá ɛnɔ́m gá manda gidigid, ká nuéŋenin ta bɔ́guɔyɔ. Band gɔg géŋeen Gɔdányá nukany giod gá manda nuganúdɛ́fá ká diéŋín bɔ́. 12Gágual ká buól bágɔ́gɔ́sa muonyi ubuány digúbianan ká búdúgúne beédéb gusúg, búguála sɔ́n ká béŋeén Gɔdányá nukany giod. 13Agá nɛnama ná guéŋin iniány, beédéb gakanya Gɔdányá gágual ká núgual Ndág ya Nsɔ́m ya Kilíse nŋɔ́bɛnɔ, unuond unuafa manda mán nɔbɔ, na band gidigid. 14Bógobísógólonyi gán góbusió, nuán ká bégúnúbíléne gá giant gá bese Gɔdányá nyá gunúfá. 15Nukany bá na Gɔdányá unyá gudɛfá manda má kand nugedie, anaány.
လက္ရွိေရြးခ်ယ္ထားမွု
2 Kɔlɛntiɛ́ŋ 9: MMU2
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ