1 Kɔlɛntiɛ́ŋ 2
2
Pólo gúdúmbenyi ndág ya nsɔ́m ya Kilíse Kɔlɛ́nt
1Belimen bám, anɛ́ mmóol aganuá gá gúsinúdámbɔ́nɛ́n ubú Gɔdányá mɔ́ɔsɛ́g, ndɛmamba ká nuɔ́yɔ ká inyɛ mbány ya egéligél ta ɔ́g ká inyɛ na gɔlɛns giod. 2Gágual ká, anɛ́ mmóol aganuá, iyasɔ́mb ká ta buanda ndiguɔ́yɔ, asiá ubú búlɛ́ŋaná Yésu Kilíse uwɔ́ bámáadɔ́ŋ. 3Buád buanda mmóol aganuá na buyɛgɛl bám, na buwa na bɛdagɛmɛn. 4Gugál na gufúnyifunyi gám dɛmabá gá nsiŋi ká ínúyódi. Ɛsámb yá Mefúny imáabá yíndiyényi bese ne bese buand yɔyɔnɔ́. 5Buád buanda guádáb gán diíléníné agá nsiŋi yá mɔnd, gúgúlenin agá bugaga bá Gɔdányá, ɔwɔ́ wéŋeniné nsiŋi.
Nsiŋi yá Gɔdányá
6Ta anaány gigúl dígálaná gá beédéb bányá bagúninán agá guádáb, digúfúnyifunyi bɔ́ nsiŋi. Iyɛ́ yaád idiábá yá gus egue, ta ya bigúmín bá band bá gus egue bányá band bábaná agá bunyím. 7Nsiŋi ɛyɛ́ Gɔdányá mɔ́ɔsɛ́g, band ta guɔ́b yɛ́, iyɛ́ difúnyifunyé. Umayɛ́ŋán nsiŋi iyaány gus maányɛ gúdɛ́bɛ́lɔ́ŋ ká dɛ́bá agág gá nugúm. 8Nsiŋi iyaány, bigúmín bá band bá gus egue dɛgɔ́lɛnsan yɛ́, bálɛ́nsán yɛ́, gesí bádɛmadɔ́ŋ Ɔgúnɔ́ unyá na nugúm gidigid. 9Búnyɛ́ buɔ́ŋɔ́n gɔ́g ká: Ubú mɔnd mabásaná udián ta ká umɔɔ́b, ubú gíliíndié gá mɔnd mabásana gɛ́dɛ́bɛ́dágɛ́d, Gɔdányá mayɛ́ŋánan mɔ́ góbúsió bá ebe bébílénené wɔ́. 10Basuá, Gɔdányá medídíyé buand ubuány agá nŋili ya Ɛsámb yá Mefúny, gágual ká, ɛgɔ́lɛnsan gúsigúsié wa buand gidigid agá onsúm ta cúluúme wa Gɔdányá. 11Ányá unyá bágɔ́lɛ́ns buand búbɛ́dɔ́mbaná nagadá wa sɔ́gɔ́ e, gúmén gudɛ́bá ɔdɛm wá mɔnd uwaány ɔwɔ́ eŋényé? Anaány sɔ́n mɔnd diálɛ́nsáná buand búlɛ́ŋaná Gɔdányá, gúmén gudɛ́bá Ɛsámb yá Mefúny yá Gɔdányá ɛ́yɛ́ eŋényé. 12Basuá dɛdɛmabia ɛmbɛ́dágɛ́dɛ́n sá gus egue, dɛmabia gíliíndié gíleniné aga Gɔdányá ká dɛ́lɛns buanda umáadɛ́fá agá bese waga. 13Diguɔ́yɔn band moóny amaány, saá na gugál gúleniné agá nsiŋi yá mɔnd wa gus ufúnyifunyé. Búnyɛ́ Ɛsámb yá Méfúny yá Gɔdányá ínyá gudífúnyifunyi mɔ́, buád buanda basuá difúnyifunyé meliŋítas má Gɔdányá aga ebe bábiananá Ɛsámb yá Mefúny yág. 14Mɔnd udiábá na Gɔdányá dɛgɔ́gɛ́ndɛgan ubú búleniné agá Ɛsámb yá Mefúny yá Gɔdányá. Agá mɔnd uwaány, buál ubuány. Udɛbá na magɛ́nda mágɔ́lɛns ɔ́gɔ búnyɛ́ bese ta ɔ́gɔ ká bɔbɛ. Gáguál ká Ɛsámb yá Mefúny gusúg ínyá wégudúgún mɔnd uwaány ká usɔ́ŋɔ́n. 15Ewe unyá na Ɛsámb yá Mefúny gɔ́lɛnsan buand gidigid búnyá bese ɔ́gɔ ká bɔbɛ́, mɔnd dɛbá bégúgéli wɔ́. 16Gɔɔ́gɔ anyɛ́ búnyá buɔ́ŋɔ́n agá Musámb má Imbɔbɔnɔ ká: Ányá umáalɛ́ns mbɛ́dágɛ́dɛ́n yá Ɔgúnɔ́, uwéŋín Ɔgúnɔ́ waád ɛsɔ́m e#2.16 Alɛ́ŋɛ́d Es 40.13; Lom 11.34? Basuá gɔg digúbianan mbɛ́dágɛ́dɛ́n yá Kilíse.
လက္ရွိေရြးခ်ယ္ထားမွု
1 Kɔlɛntiɛ́ŋ 2: MMU2
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ