Mata 12
12
Yesu ana ma ndza aha vah ta nəp
(Mrk 2.23-28; Luk 6.1-5)
1Ma vah watsa Yesu a kaciwir a ŋge a la ndiri, ma vah ta nəp, magəli tə aagi ara mintish akas, dəba aagi asahw ndiri, azha aa tsa kaɓamə. 2Ndə Farisa aagi gəra ya, dəba aagi azlapanə a Yesu, aagi iŋgaya: «Taŋzə səkən ndə magəli kwa aagi kaɗalə, səkən ndə ma ma garagar takwa a ŋkula ji, tazhiva a ɗal ma vah ta nəp səku.» 3Yesu zhin a zhinatana, iŋgaya: «Huni tava a yazə səkən ndə Dawda a va a ɗalə aka wəra? Sha tə abə həji ma səbar aagi tiɗa ndə, mintish a kadzata aka wəra? 4Peteŋ a jak ataa Bizlaf azha, sha tə abə həji ma ndza aska ma kasəbar aagi, dəba aagi azəm mavəy səkən zəm ndə həji vəlanə a Bizlaf. Ama avəli, təf ta zəm tə ara təmta aka səku, ma ma garagar takwa ci, maɗal kwakus Bizlaf aagi gagagha ana ndə a pəlatana təf a zəmə səkən watsa. 5Aka səku zhana, huni tayazə a ma ma garagar ataa Musa aka wəra? Ma vah ta nəp, maɗal kwakus Bizlaf aagi a jak kwakus, aa taji a njin ma ma garagar ataa vah ta nəp, ci aa tagwar a ɗa həji ma gəy ma aagi səku wəra? 6Azha, sa kazlapahuni, səkən ma dəy aha jak kwakus a ɗi aka. 7Andza huni tazlima ma ma ndza a zlap watsə ndə, iŋgaya: Ma Bizlaf, ma kazlap: Hahər ma təwah ana ndə sa kamayə, mba takun ta ɗal abə səkən ŋgas aagi ka, huni kaaji a zhinaktana ha a həji ma ŋkula gəy ma aagi akas. 8Ara ndə a ɗa, Mbə həji ma dəgnak, ana madagal ma ndza aha vah ta nəp,» iy.
Ala ndə ra tə a gəy tə
(Mrk 3.1-6; Luk 6.6-11)
9Yesu tsaa kanda tə a bəza a tsutsa, aska a nda jak ta tarha Yahuda aagi. 10A tsutsa ala minja aka, ra tə tagəy tə. Farisa aagi, aa kamay a tək ma ata Yesu, sha ana ndə aa kaɗiwzə, aagi iŋgaya: «Ma ma garagar takwa tapəlaŋkwa təf ta mbəl ala dawər ma vah ta nəp vəw?» aagiy. 11Azha, Yesu zhin a zhinatana, iŋgaya: «A taba kuni, ma ndza abə ŋcemek ŋtaguleŋ, azha ŋcemek tə watsa, tandəv tə a tarakw ma dagal ma vah ta nəp ya, a kaaji a daazə a bəza səku, vaya? 12Azha, həji ma dəgnak dəy aha ŋcemek aka səku! Mbara azha, ma ma garagar takwa tapəlaŋkwa təf a ɗal təwah ana ala ma vah ta nəp.» 13Yesu zlap a zlapanə ana ala ndə ra tə a gəy tə watsa: «Dəɗə ra kwa,» iy. Dəɗ a dəɗ ra tə watsa ya, mkpir a dəɗ tə andza ra guva minja. 14Farisa aagi tsaa kanda ta, dəba aagi agas wirwir ta mbəla Yesu a dzə ka a mci.
Yesu, ala ma ɗal zlən ndə Bizlaf a mayə
15Ama, ndə Yesu a zlima ma watsa, tsa kanda tə a bəza ata la watsa, dəba ŋgaɓa həji aagi asəbarə. A kakwaleŋatana dawər a həji ma kadawər aagi tiwtiw. 16Ama dəba a aŋgəzata, ara ndə aa kaghalanə ka kwa a vaye aska aagi a zlap a heɗe. 17Aska a ɗal andza ndə a ghalaya a ɗal ana ma ala ma ɗaf ma ndə a zlimazə ara Bizlaf Isaya, ndə a zlap, iŋgaya:
18 Tsakwa ana ala maɗal zlən naka ndə sa mayə,
sha ana madaraf naka ndə, sa kamayə abə ɓas.
Miɗ naka ma ghwaɗeɗe tatsaya ata ala watsa,
azha a aghalatana ma ma dəlili a manahayak tiwtiw.
19 A kaagas səbakw a dza abə ala akas, zhana a kaadza wəla akas.
Kwa ala a kaazlima ma a gwar a ŋge a zal təf a vas ma akas.
20 A kaazhin a hwahwash bəlam ma dəɓəs tə ka akas,
zhana a kaadza kwahu ka ata patərla ndə kwahu a kaɗiw a mca tə a heɗe akas.
A aɗalə ikwa a gwar ata ndə a kaalima ɓas ata dəlili bəza.
21 Azha, həji ma ndza a manahayak aagi tiwtiw, aagi deŋ a heɗe.
Tiw Yesu abə Belzebul
(Mrk 3.20-30; Luk 11.14-23)
22A tsutsa, leŋ aa daanə ala minja, tawələf tə, zhana taŋtəɗ tə, ara ndə miɗ ma gamak a kasanə yaka. Yesu takwaleŋ dawər ataa ala watsa bəza, a kagəra la, a kazlap. 23Həji ma ndza a tsutsa aagi, hak aa ghərəŋ ta, azha tiwtiw aa kazlap: «A kaaɗa Mbə ataa Dawda aka səku azha vəw?» 24Ndə Farisa aagi aa zlima ma watsa, aagi iŋgaya: «Yesu meni, a ɗa Belzebul a zlikusəm tə, bay : miɗ ma gamak aagi ma kavəlanə ɓərɓər ta gam miɗ ma gamak a ha həji aagi,» aagiy.
25Ama ndə, Yesu a sən deŋ ŋkwaɓ ta bəza, dəba a azlapatana azha, iŋgaya: «Kala hayak bay, ma dza kusəm abə hayak bay minja zhana, a kəɗaŋ abə ghurəm tə.» Kwa hayak ma dzamadzam aka səku həji ma ndza a gi ma ŋtaguleŋ aagi, ma kadza kusəm ata ha ta aagi, jak watsa aka səku hayak watsa a kaandza atama akas. 26Andza Gətili a gam Gətili, a dza kusəm abə ha tə ya, bay tə watsa a sən a zhin a ndza avaŋga? 27Andza sa, sa gam miɗ ma gamak abə ɓərɓər ataa Belzebul ya, huni azha, ma kavəlatana ɓərɓər a həji kuni aagi, a gam yəm azha vaya? Sha ana ndə a ɗa, təmta ana ma kaaɓin dzam guma ata huni. 28Ama andza abə Miɗ Bizlaf ma ghwaɗeɗe abə sa kagam miɗ ma gamak, watsə ya, la ndza bay Bizlaf gwar ara huni tiw. 29Kwa ala ma kaɗa kula a nda a gi ala ma ɓərɓər a kwaranə səkən tə aagi bəza, andza tagwar a dzaw ala watsa bəza akas? Andza ala watsa tadzawaya, kula a kwar səkən tə aagi andza ndə ꞌunəf tə a kamayə. 30Ala ma ŋkula ji nja naka, a ɗa ala jaga naka, azha ala ma ŋkula lamzaka a dzamə səkən, a ɗa ala ma kawiɗi səkən.
31«Sha ana ndə sa kazlapahuni: mpət həji aagi tiwtiw abə dahalay ndə aa kara Bizlaf tiwtiw, mpət ta, a apəl tə. Ama , ala ma ra dahalay ata Miɗ ma ghwaɗeɗe, a kaalima pəl mpət tə tep səku. 32Ala ma zlap ma ma gamak ata Mbə həji ma dəgnak, mpət tə a apəl tə. Ama ala ma zlap ma ma gamak ata Miɗ ma ghwaɗeɗe, mpət tə a kaapəl kwa a manahayak ma ndza akacihwa, kwa a manahayak ma ndza atama.»
Mpi abə mbə tə
(Luk 6.43-45)
33«Andza mpi təwah ya, a mbəw mbə tə təwah. Andza mpi gamak, a mbəw mbə tə gamak. Ara ndə a ɗa, həji sən mpi ma ŋtan ata mbə tə ndə, a kambəwə. 34Wəzhi ŋkuraslə aagi. Huni asən a ghalə səkən ma təwah, huni tə ya, huni həji ma gamak aagi avaŋga? Ara ndə a ɗa, ma ma kazlapha ata madedizh ma, a nda a bəza a ꞌunəf tiwtiw. 35Ala ma təwah meni, səkən ma təwah ana ndə, a kadaazə, ama ala ma gamak, səkən ma gamak yəm ana ndə a kadaazə. 36Sha ana ndə sa kazlapahuni: Ma vah guma meni, həji aagi aghal ma ndə, aa zlapata ma gamak, ndə aa ɗalata aagi tiwtiw a Bizlaf. 37Ara ndə a ɗa, aska zlap kwa abə Bizlaf a azla guma kwa, hwa ala ma gəy ma, aka səku ala ma ŋtan.»
Tsaɓan ataa Yunas
(Mat 16.1-4; Mrk 8.11-12; Luk 11.16, 29-32)
38Azha, masərək ma ma garagar aagi tiwtiw abə Farisa ndiɓi aagi, dəba aagi azlapanə a Yesu, aagi iŋgaya: «Masərək, ni may aska a ni a gəra səkən tsaɓan.» 39Yesu zhin a zhinatana, iŋgaya: «Həji ma ndza akacihwa ma gamak aagi abə həji mazheref aagi ara Bizlaf, aa may a gəra səkən tsaɓan, ama kwa səkən tsaɓan ŋtaguleŋ, a kaalimahuni akas, səy ataa ala ma ɗaf ma ndə a zlimazə Bizlaf Yunas. 40Andza ikwa yəm, abə Yunas, a vah pish mahkaɗ abə wan mahkaɗ a bəra bay ŋkilif, azha ikwa yəm, Mbə həji ma dəgnak a avah pish mahkaɗ abə wan mahkaɗ a hayak. 41Həji ma ndza a hayak Niniwe, ma vah ta zla guma, aagi agar ta a wəzəm tiwtiw ata nja həji ma ndza akacihwa aagi, aagi aghem həji ma ndza akacihwa aagi ara ndə aa mbaɗ landza ta bəza, tiɗa aa zlima ndə Yunas a kaghal ma Bizlaf. Ama a ɗi anawatsə, ala ma dəy aha Yunas aka. 42Ma vah ta zla guma, bay wala ma ndza a wəzaha a nduŋ a agar tə a wəzəm, abə həji ma ndza akacihwa aagi, a aghemata, ara ndə a ndaha a wəzaha gədək ata nduŋ manahayak, aska a ndaha a teh sən səkən ataa Suleymanu. Ama a ɗi, ala ma sən səkən ma dəy aha Suleymanu aka.»
Zhinha miɗ ma gamak
(Luk 11.24-26)
43«Ndə miɗ ma gamak a nda tə bəza a zlikusəm ataa ala minja, tsaa kanda azha tsaa katəwər a ŋge a damə ata dərzləm, a gas la ndza, ama talima akas. 44Dəba a azlap a ha tə, iŋgaya: “Galaɓa sa zhin naka a ŋkif naka,” iy. Ndə a ndaha, a gəra kwa səkən a mən akas, tazlaɗaya, azha talamaya katkadək. 45Azha, miɗ ma ŋtaɗ watsa, tsaa kanda tə a yaha miɗ ma gamak ndiɓi aagi zhana ŋshiliɗ ma gamak, ma dəy aha aagi. Tsaw aa ndaha tiwtiw, aha gi watsa, dəba aagi andza. Ama dawər ala watsa a kavasanə a guɗaŋ dəy aha ma ndza amcana ata diw tə. Azha, a apew ikwa ara həji ma gamak ma ndza akacihwa aagi.»
Mana Yesu abə zliŋgin aagi
(Mrk 3.31-35; Luk 8.19-21)
46Ndə Yesu a kazlapatana ndza tə kwagwa a ŋgaɓa həji aagi, mamən abə zliŋgin aagi kagar a bəza, aa gasə a zlapanə. 47Ala minja zlap a zlapanə a Yesu, iŋgaya: «Tiw matsuh abə zlinahw aagi a bəza, aa kamay a zlapahu,» iy. 48Yesu zhin a zhinanə ana ala watsa, iŋgaya: «Ma ɗa mana abə zlina aagi vaya?» 49Dik a dik ra ata magəli tə aagi, iŋgaya: «Tsakwa ana mana abə zlina aagi, a ɗi. 50Ara ndə a ɗa, ala ma kaɗal səkən ndə Vana ma ndza a wəzəm a wəzlaf a kamayə, ala watsa ana zlina sha ana həla mana, aka səku sha ana mana,» iy.
လက္ရွိေရြးခ်ယ္ထားမွု
Mata 12: GOU
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ