Matyáasa 16
16
Ndeme rá mutíndíkáná
(Már 8:11-13; Mat 12:38-39; Rúk 11:16; 11:29; 12:54-56)
1Va pariséne na vá sadusyeéne vá ma keréná Yésusu berebe kó vá ma me támbéná itámbó váye naá anáá a eŋga esimbá ájá á wó tihíyámó anáá Irɔŋgɔ ójó a ma me tómá. 2Kó a ma wó wundiyé anáá: Ará enéŋgá é húmámó no katámó járá anáá nemberi wusí wó váŋgámó onyeme, esene éyé máná e ámó boótoto. 3Kó ibeesí vinó anáá: Nowórá nó váŋgámó osowa esene éyé máná e hítámó. No ijímámó oráŋá motéé úmú mó húmánámó na máná ka je jembe oráŋá ndeme rá mutíndíkáná. 4Vato ává wusí owó vá ámó vambé vá rií hée na etú na Irɔŋgɔ, kó vá susámó esimbá. Wó je rií anáá vá ta né ená esimbá éndyé bɛ́ŋ ájá á ma húmáná ahúmíye maaró ojó Yonásá. Kó a ma enda o wó tyé hɔ́rɔ́.
Mboŋga ra va Pariséne na va Sadusyeéne
(Már 8:14-21; Rúk 12:1-6)
5Vihoóhóná vyá Yésusu ví ma caká mbóró ra esɔ́ ejomo kó vá ma béríhyé owɔ́rɔ́ ówó va beréte. 6Yésusu aye nawó anáá: «Vinó okéryé na mboŋga ra va Pariséne na va Sadusyeéne.» 7Kó vihoóhóná vyáa ví katé buŋgana anáá Yésusu a katé járá naná esene éyé vá ma béríhyé owɔ́rɔ́ ówó va beréte. 8Ará Yésusu a ma jembé anáá vá katé buŋgana náná, aye na awo anáá: «No ta timbé ŋgɔ́tééná! Wusó wá até kówo no mbuŋganámó anáá até éyé ŋgo ré járá é néménámó va beréte ává no mó béríhye owɔ́rɔ́? 9No arɔ́wɔ́ ká ova? No ta ne mbúŋge ámó ŋgo má toŋyé vato toosini isááno na va beréte vátááno kó pumbú íj í má cáná no má nwíyé visáŋgá víníí? 10No ta ne mbúŋge ámó ŋgo má toŋyé vato toosini iní na va beréte báráátó na umweesií? Kó pumbú íjí í má cáná no má nwíyé visáŋgá viníí? 11Kó até sɔ́ kéye no ta ová anáá noó ta katé járá maró wa va beréte ará ŋgo mó éŋga anáá: Vinó okéryé na mboŋga ra va pariséne na va sadusyeéne?» 12Ɔ́wɔ́ kówo vá ma ová anáá Yésusu a ta ma ré járá anáá vá kérye na mboŋgá éjé vá váámó na bereté, a ma ré járá anáá vá kéryé na ombé wa ehoóhona ójó vá pariséne na va sadusyeéne vá eréenanámó.
Pyéere a atɔ́wɔmó anáá Yésusu a ámó Mwaná Irɔŋgɔ
(Már 8:27-30; Rúk 9:18-21)
13Ará a ma nde humé na oŋgórá ójó na Cesaréyá na Fíripi, Yésusu a susámó vihoóhóná vyá anáá: «Na njáréná ra vato, áné ojó Mwaná moto?» 14Vá ma járá naá anáá: «Vato vámó vá ma járá anáá o ámó Yohánese adwe vato, ávámó vá járá anáá o ámó Eríyasa ójó Ahúmíye maró, véndyé hée vá járá anáá o ámó Ahúmíye maró ójó Yeremíya, ávámó hée vá tɔ́ŋɔ́ anáá o ámó ahúmíye maro omo.» 15A járámó nawó anáá: «Kó vinó nó járámó anáá ndo ámó ané?» 16Símono Pyéere a wundyámó anáá: «O ámó Etómá yá Irɔŋgɔ, Mwaná Irɔŋgɔ ojó a hwénámó.» 17Kó Yésusu a ma wɔrɔ́ enjárá ayé naá anáá: «O ámó wusi, Símono ombwene rá Yónasa, eséné wó ta ámó moto wa ncono na miné kójo a mó wo tíhíye wandá mwané wó ámó Tetáŋgá ójó na máná. 18Kó njárámó nɔɔ anáá: O ámó Pyéere kó na máná ra itááné mwané, ŋgo né nuumiyámó Noyómó ná ava vá ŋgátɔ́wɔmó, kó ŋguru ra nugwé e ta né eŋga wandá na Noyómó mwané. 19Ŋgo né wo hwámó mubune mwá Edɔŋgɔ éyé na máná, wimé ówó o né atɔ́wɔmó na cí wó né atɔ́wɔvenámó na máná, kó wimé ówó o né váráŋgámó na cí wó né váráŋgavenámó na máná.» 20Kó Yésusu a ma riŋgááná vihoóhóná vyá anáá vá mwané ka ojana moto anáá a ámó Etómá yá Irɔŋgɔ.
Yésusu a ojámó anáa a né gwámó owunde ohonowa
(Már 8:31-33; Rúk 9:22)
21Okésyé ówó na itíndíkáná mwané Yésusu Kirítu a ma késyé ojárá na vihoóhóná vyáa anáá a né geremenámó wenda na Yérúsareme kó a vaŋgámó wová makáná mbunu esene éyé vagónó vá vato, vagónó vá vacekiye mómí na vayéere vá mbéndɔ́ vá né me onámó, kó na nimé ra mesí mátátó a né wundámó ohonowa. 22Pyéere a ma me turátá na kɔ́ŋgɔ́ okésyé o me bámána aye náá anáá: «Okí, ŋgá Irɔŋgɔ a wo beerye, mbéndɔ́ wandá wó ta né wo húména.» 23Kó Yésusu a ma búndyé aŋgísó na Pyéere aye naá anáá: «Ŋgúrúkíyámó na aŋgísó! Caká na nimé rame Saátana! O ámó itámbó na pé rame esene éyé ŋgénéná rɔɔ́ í ta ámó rá Irɔŋgɔ, í ámó ŋgénéná rá vato.»
Vá byɔ́nɔmó Yésusu twiiŋí?
(Már 8:34–9:1; Rúk 9:23-27)
24Kó Yésusu a ma járá na vihoóhóná vyá anáá: «Ŋgé moto a diŋgé anáá a mbyɔɔnɔ, ómwané ováváráŋga ómwané mate, ómwané obyá koroso raá káá ómwané o mbyɔɔnɔ. 25Na vatɔ́ɔ́tɔ́ ojó a díŋgámó anáá a beerye esɔ́tɔ́ yáa a né déŋgyámó esɔ́tɔ́ mwané, wó je rií anáá ojo a né déŋgyámó esɔ́tɔ́ yáa na wusó wámé a né sɔ́tɔ́mó. 26Kó ejaté mpí kéje e ámó ɔ́wɔ́ anáá moto a timbe ekúmé eŋgímé ája na cí ra ndono káá a enda déŋgyé esɔ́tɔ́ yáá? Kó hónó Até keyé moto a ámó weréena na céndi ra esɔ́tɔ́ yáa? 27Mwaná moto a né urámó na va éŋgerese váa naáté yá niimi na Isyé kó a mó péyámó ámó moto na ŋgeŋgéná mamba raá. 28Ŋgo nó ojánámó na vatɔ́ɔ́tɔ́ anáá, vato vá ámó ará ává vá ta né gwé ka ená Mwaná moto a uré ámó ahumu.»
လက္ရွိေရြးခ်ယ္ထားမွု
Matyáasa 16: tii
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2024, CABTAL