Matyáasa 13
13
Nkaná ra anema
(Már 4:1-9; Rúk 8:4-8)
1Isí éméye, Yésusu a ma urúkyé na yanje ondo nuumana na kɔ́ŋgɔ́ ra esɔ́. 2Ncumbí wa vato a ma endá o me endétye ukú ójó anáa a ma ríi na obiriki ójó anáa a naáta naáté yá ekáné yá ŋgɔmbe onuumana, ncumbí wa vato omójo uŋgimé a téné na kíŋgé.
3Ko a ma késyé o wó ojána mamba mbunu na nkaná a yáá: «Anema a ma endá ondo nema. 4A rií na onema, cámá ímó í ma obá na kɔ́ŋgɔ́ ra pé kó monóoní mó ma uré osóká cámá imíji gwɔ́s. 5Ijomó í ma obá na pandó ra atááné ará cí e ta ámó mbunu, kó í ma sóŋgíyé watána esene éyé cí e ta má rií fyéém. 6Waténa ówó oŋgóná ó ma aténá, í ma hyá kó ámó í ta ma tímbe eŋgaŋgá í ma kótáná. 7Ijomó í ma obá naáté yá ihuwe ra céndé kó céndé í ma wó hítáná. 8Ijomó í ma obá na mpaŋá ra cí kó í ma umé viboma, eejé itete, eejé mɔ́wɔ́ atíné átátó, eejé mɔ́wɔ́ mátátó. 9Ojo na etú ó mwané wová!»
Wusó wá até kówo Yésusu a ma járá na nkaná
(Már 4:10-12; Rúk 8:9-10)
10Kó vihoóhóná vyáa ví ma me keréná o me súsé anáa: «Wusó wá até kówo o járámó nawó na nkaná?» 11Yésusu a ma wó wundíyé anáa: «Wó ámó esene éyé vinó vá ma nó átɔ́wéná anáa no jembe ndímbe ra Edɔŋgɔ éyé na máná, kaá na vá mwané vá ta ma wó atɔ́wena. 12Esené ojo a timbámó, vá mó me hwámó hée kó a mó cakámó o ne timbaana, kaá ojo ka timbaana, vá mó wundámó obɔɔ ítɔɔ mwaná wa abímí ójó a timbámó. 13Njárámó nawó na nkaná ukú ójó anáá vá núné ka ená, vá vátɔ́rɔ́ ka ová 14índi até éyé Irɔŋgɔ a ma járá na uŋgúté rá ahúmíye maró waá ójó Esáyá wó eŋgávena. Irɔŋgɔ a ma járá anáa:
No mó atɔ́rɔ́mó sáá, vinó ka ová
kó no mó néménámó sáá, vinó ka ená.
15Esené otémá rá vato a máva wó etá rará,
Vá má ité etú ráwó,
obweena aŋgísó ráwó
anáá vá rií ka ená.
Ukú ójó anáa vá rií ová,
vá rií ka vátɔ́rɔ́ vá wunde wová na etémá rawó,
Ukú ójó anáá vá rií ka céndyé esɔ́tɔ́ yáwó,
wó je rií anáá vá ma ríi vá céndyé esɔ́tɔ́ yáwó
ŋgáné ŋgo ma wó ondóna.»
16Yésusu a ma endá na wusó ayáá: «Kó vinó, no ámó wusi esene éyé aŋgísó rá vinó yó enámó, etú rá vinó yó ová. 17Ŋgo nó ojanámó na vatɔ́ɔ́tɔ́ anáa ombunu rá vahúmíye maró na ombunu rá vato ává na mová na Irɔŋgɔ vá ma támá anáa vá ená até éyé vinó no enámó ka ená, otámá anáa vá ová até éyé vinó no ovámó ka ová.»
Ntimisaná ra nkaná ra anema
(Már 4:13-20; Rúk 8:11-15)
18Yésusu a ma endá na wusó ayáa: «Ŋgo nó tímisíyámó sɔɔ́ nkaná ra anema. 19Cámá íjí í ma obá na kɔ́ŋgɔ́ ra pé ó ámó vato ává vá vatɔ́rɔ́mó maró ámá má néménámó Edɔŋgɔ éyé na máná kó sátana a urámó wuryé maró mwané na etémá rawó kaá ɔ́wɔ́ vá ta ová wandá. 20Masámá ama má ma obá na cí ra atááné, ó ámó vato ává vá vátɔ́rɔ́mó Maró má Irɔŋgɔ, otómbá watɔ́wɔ maró mwané na vitaka, 21kaá ará vitɔɔ orɔŋgɔ na itúryé mó urámó na wusó wá maró mwané, vá tómbámó woba, esene éyé maró maté má ta cumé eŋgaŋgá na vámwané kó vá atɔ́wɔmó bɛ́ŋ na mwaná wa itíndíkáná. 22Masámá ama má ma obá na pandó ra ihuwe ra céndé, ó ámó vato ává vá vátɔ́rɔ́mó Maró má Irɔŋgɔ, kó mbuŋgáná iji na cí ra ndono na vitámáká vyá ekúmé mó mándyáanámó maró mwané na etémá rawó, kó vá ta umé vibomá. 23Masámá ama má ma obá na mpaŋá ra cí, ó ámó vato ává vá vátɔ́rɔ́mó Maró má Irɔŋgɔ, owunde wová kó vá umámó vibomá, weréena eejé itete, eejé mɔ́wɔ́ máráátó, ejomo mɔ́wɔ́ mátáto.»
Nkaná ra ombé wa uhuwe
24Yésusu a ma wó kwéná nkaná indyé ayáá: «Edɔŋgɔ éyé na máná é ámó sɛ́ɛm ámó oraŋá rá moto omo ójó a ma nemá aréhí na kondo raá. 25Na wutúú, hɔrɔ́ vato vá rií otonó, ombembéná waá a ma uré onema vináná naáté yá aréhí ráa osoŋgona. 26Ará aréhí á ma umé, vináná wenéyá. 27Va eŋga manɔnɔwɔ vá moto wa kondo vá ma uré ondo járá naá anáa: Aá mása, noó anáa usi wa ombótá kójo o má nemá na kondo? Kó twiŋí kówo ombé wa uhuwe a ndó etá ɔ́wɔ́? 28Moto wa kondo a ma wó wundíyé anáá: Ombembéná wame kójo a má eŋgá wandá mwané. Kó veŋga manɔnɔwɔ vá ma me súsé anáa: Ye o diŋgámó anáa to enda báróna ombé wa uhuwe o mójo tetee ójoo? 29Aye nawó anáa: Mmbéndɔ́, mamba na meŋgí no báróna vináná orɔŋgɔ na aréhí. Micáno bimé vává vá góná orɔŋgɔ ondo húmé na mebuwe. 30Na itíndíkáná rá mebuwe, ŋgo mó járámó na vabuwe anáá vá mána báróna ombé wa uhuwe vá wótá na paŋgá vá heénye. Kaá aréhí ámwané, vá wónjéena na ndáŋgé rame.»
Nkaná ra cámá ra goyáka
(Már 4:30-32; Rúk 13:18-19)
31Nkaná ejomo éjé Yésusu a ma wó ojáná hée kéeje: «Edɔŋgɔ éyé na máná é puranámó na cámá ra goyáka éjé moto a wɔ́rɔ́mó onema na kondo raá. 32Cámá mwané kéje e cakámó orií dekétíi na cámá iŋgímáná, kó ará yo atánámó, e gónámó otómbá marété mimé ámá na apúú, kó a búndámó werété ówó monóoní mó hítyámó wuré ondo haá virárá vyáwó na párá ráá.»
Nkaná ra mboŋga
(Rúk 13:20-21)
33Nkaná indyé ra Yésusu kéejé: «Edɔŋgɔ éyé na máná é ámó sɛ́ɛm ámó mboŋga éjé okótó a váámó naáté yá ekáné yá uhuku, kaá ará a manámó onúbé uhuku maté kó ó húsyámó.»
Wusó wá até owo Yésusu a ma járá na nkaná
(Már 4:33-34)
34Yésusu a ma ré ojana vato maró mwané mimáná na nkaná, kó a ta ma ré járá wandá ka na nkaná, 35ukú ójó anáa í tímisíye enjárá ra Irɔŋgɔ éjé ahúmíye maró waá a ma ojá anáa: «Ŋgo mó búnámó uŋgúté rámé na woja ówó nkaná, ŋgo mó ojámó mamba ámá na asɔɔ́ okésyé ówó na ebondéná yá cí.»
Ntimisaná ra nkaná ra ombé wa uhuwe
36Kó Yésusu a ma micé ncumbí wa vato omójo wenda na yanje, vihoóhóná vyáa ví ma me keréná o me súsé anáa a wó hwá ntimisaná ra nkaná ra ombé wa uhuwe. 37Yésusu a ma járá nawó anáá: «Ojo a nemámó usi wa ombótá ó ámó Mwaná moto. 38Kondo ó ámó cí ra ndono, usi wa ombótá ó ámó ava vá atɔ́wɔmó maró wa Edɔŋgɔ éyé na máná, ombé wa ombótá ó ámó ava vá nɔ́nɔwenámó Saátana. 39Ombeembéna ojó a némámó ombé wa uhuwe a ámó Saátana. Mabuwe ma ámó mámana má cí, vabuwe vá ámó va éŋgerese. 40Amó vá túmámó ombé wa uhuwe, náná owo omó riyámó na mamana má cí. 41Na itíndíkáná mwané, Mwaná moto a mó tómámó va éŋgerese váá, vá ne uryámó vato bimé áwá vá ubyámó vásɔ́ɔ́ naáté yá nyéŋgé na Edɔŋgɔ yáa, na bimé ává vá eŋgámó wobé, 42kó vá né wó nɔ́mó naáté yá ekáné yá ihyáné ɔ́wɔ́ o mó ríyámó mbií ná ovandona ówó vikárátá. 43Kó ava ndíŋgirííŋ vá mó nánjámó ámó oŋgóná naáté yá Edɔŋgɔ yá Isyé wawó. Ojo na etú ómwané wová!»
Ekúmé ájá aséénérí
44Yésusu a ma járá hée anáá: «Edɔŋgɔ éyé na máná e ámó amo ekúmé ájá aséénérí naáté yá apúú kó moto a wɔ́ŋgɔ́mó, kó a wundámó waseena. Naáté yá vitaka vyáa, kó a endámó ondo sérá até yimé éyé a timbámó, kaá wuré ondo kuse apúú mwáné. 45Edɔŋgɔ éyé na máná é ámó hée ámó moto wa mékíte ójó a sɔsɔmó vesi vá másáŋgá. 46Ará a wɔ́ŋgɔ́mó nosáŋgá éné nó cákámó orií na mpí mbunu, kó a endámó ondo sérá wandá wímé owó a timbámó, kaá wuré ondo kuse nosáŋgá mwáné.»
Nkaná ra mbúnjé
47«Edɔŋgɔ éyéna máná é ámó hée ámó mbúnjé ejé moto a nɔmó naáté yá máŋa kó e wɔ́rɔ́mó kána rá cwí iŋgímé. 48Ará mbúnjé e ámó tút, kó a jónámó na mboró, kaá a núumanámó okésyé opyerye cwí iji í ámó wusí ováána naáté yá esáŋgá iji ka na mpí, wumbe. 49Náná kówo ó mó riyámó na mamana má cí. Va éŋgerese vá mó urámó kó vá mó sámó vambé na ava ndíŋgirííŋ, 50kó vá mó nɔ́mó vambé naáté yá ekáné yá ihyáné, ɔ́wɔ́ mbií í mó riyámó na ovandona ówó vikárátá.»
Epéŋgé yá mamana
51Yésusu a ma súsé vihoóhóná vyáá anáá: «No mó ová wandá mwané wimé?» Vá ye anáá: «Eeŋ.» 52Yésusu a ma járá nawó anáá: «Oyéere wa mbéndɔ́ uŋgimé ójó a bundámó ehoóhona yá Edɔŋgɔ éyé na máná a puranámó na moto wa naŋgá ojó a wɔ́rɔ́mó motéé úmú mpkámáká na umu virunú naáté yá ekúmé ráa.»
Vato ává na Nasaréte vá váráŋgámó Yésusu
(Már 6:1-6; Rúk 4:16-30)
53Ará Yésusu a má mana okwe ówó kaná imíjí, a ma urikyé na pandó mwané. 54Kó a ma endá na oŋgórá rá Nasaréte ará a ma góná okésyé oyeére vato na byanje vyáwó vyá mbasóóriye kó vato vá katé okembyé vá járá anáá: «Peyɔ mwané na mesimbá amáma mó me urénámó héni? 55Kesí ómwané ojo mwaná kábindá? Kesi Maréyá kójo netí? Até va navéne váa káva Yáka, Yóseve, Símono na Yude? 56Kó kesí mbéní ráa í ámó na visó ará? Kó mamba mwané mimé má me urénámó héní?» 57Wandá mwané wó katé eŋga anáá vá rií ka atɔ́wɔ Yésusu. Kó Yésusu a ma járá nawó anáá: «Ahúmíye maró a ta timbé orukú na edɔŋgɔ yáa kó na noyómó náa.» 58Kó a ta ma eŋga ombunu rá mesimbá ɔ́wɔ́ esene éyé vato vá ta ma kate timbé ŋgɔ́tééná.
လက္ရွိေရြးခ်ယ္ထားမွု
Matyáasa 13: tii
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2024, CABTAL