Yohánese 20
20
Yésusu a urúkyámó na evérá
(Mat 28:1-10; Már 16:1-8; Rúk 24:1-12)
1Isí yá sɔ́ŋde ójó makésyé wa wusí wa emánjéta, kuúkú ibeesí hɔrɔ́ mwaná wa mbínó a árɔ́wɔ́, Maráyá ójó na Magadára a ma endá na evérá kó a etíyámó anáá itááné éné vá ma bweená evérá ɔ́wɔ́ nó ma ríi bakétérí. 2Kó a ma húkyé na otétá ondo etíye Símono Pyéere na ehoóhóná eyomó éyé Yésusu a katé diŋge aye nawó anáá: «Vá mó uryé mbimbe ra Okí na evérá kó to ta jembé ará vá mó énda vaá.» 3Kó Pyéere na ehoóhóná eyomó eméye vá ma báréyá wenda na evérá. 4Bimé vává vá ma ré kuré otétá vedá ehoóhóná eyomó é katé kuré otétá kwa-kwa otómbá Pyéere kó é ma jová ondo jine na evérá. 5Ará a ma jiné na evérá kó a ma kutímáná wená va béndísi na cí vedá ka iŋgáana. 6Símono Pyéere ójó a katé me byɔɔnɔ ó mwané hónó a ma endá jine otómbá wiŋgáana na evérá wená va béndísi na cí. 7Owunde wená cunú éjé vá ma bweená ucé rá Yésusu ɔ́wɔ́, cunú mwané e ta ma ríi orɔŋgɔ na va béndísi, e ma ríi híté-híté táréénérí na pandó indyeé. 8Ɔ́wɔ́ kówo ehoóhóná eyomó éyé é ma jová ojine hónó é ma iŋgááná kó a ma ená okaŋga. 9Na vatɔ́ɔ́tɔ́, vihoóhóná ví ma ríi ví arɔ́wɔ́ ka ová até éyé va Kárate ává mwáŋ mwáŋ vá katé oja anáá Yésusu a ma geréméná ohateena na ráaté wa vigwé. 10Kó na nimé raá, vihoóhóná íví vívé ví ma wundáná na vámwané.
Maráyá ójó na Magadára a enámó Okí
(Már 16:9-11)
11Maráyá ómwané a ma káŋgá na naŋgáté na kɔ́ŋgɔ́ ra evérá a vaŋga. A rií na ovaŋga a ma kutímáná anáá a nɔ aŋgísó naáté yá evérá. 12Kó a ma ená va éŋgerese vává vá byá cunú íjí puúum vindindíi na pandó éjé mbimbe ra Yésusu e ma vété, omo pere ra ucé, ojomo pere na eŋgoró. 13Va éŋgerese vá ma me súsé anáá: «Okótó, na wusó wá até kówo o vaŋgámó?» Maráyá a ma wó wundíyé anáá: «Vá mó uryé mbimbe ra Okí wame kó ta jembé ará vá mó énda vaá.» 14A rií na ojárá ówó náná kó a ma bundé wená Yésusu a téné na kɔ́ŋgɔ́ raá vedá ómwané ka jembe anáá ó ma ríi Yésusu. 15Yésusu a ma járá náá anáá: «Okótó, na wusó wá até kówo o vaŋgámó? Áné kójo o sɔsɔmó?» Kó ómwané ámó a ma buŋgáná anáá ó ámó agíré apúú rá vaná vá maráté má va paráwa, a ma járá naá anáá: «Wá ríi mámó kójo o mó uryé mbimbe ra Yésusu, ŋgojánámó ará o mó énda vaá índi ŋgo enda wɔ́rɔ́.» 16Yésusu a ma járá naá anáá: «Maráyá!» Kó Maráyá a ma búnde, o me renjá aye naá na enjárá ra eberéyá anáá: «Rabúni!» Rabúni a tirevenámó anáá oyéere. 17Yésusu a ma járá naá anáá: «Mámó ka taátena, esene éyé ŋgo arɔ́wɔ́ ka naáta na kɔ́ŋgɔ́ ra Tetáŋgá. Vedá mámó ndá ondo járá na va mbísó anáá naátámó na kɔ́ŋgɔ́ ra Tetáŋgá, Irɔŋgɔ wame ójó a ámó hónó Tetáŋgá wa vinó, Irɔŋgɔ wa vinó.» 18Kó Maráyá ójó na Magadára a ma endá na kɔ́ŋgɔ́ ra vihoóhóná aye nawó anáá: «Ŋgo mó ená Okí!» Kaá a ma wo tɔ́ŋéná até éyé Yésusu a ma járá naá.
Yésusu a húménámó vihoóhóná vyáa
(Mat 28:16-20; Már 16:14-18; Rúk 24:36-49)
19Enéŋgá yá isí yá sɔ́nde mwané, vihoóhóná ví katé rií na yanje emó kó vá ma peté ehótó esene éyé vá katé tíné njwé rá va Yúdene. Yésusu a ma uré otérémena na ráaté wawó aye nawó anáá: «Dɔ́ŋgɔrɔ́ɔ́ŋ a rií na vinó!» 20A rií na ojárá ówó náná kó a ma wó tíhíyé embéré raá na isámá náa. Ará vihoóhóná ví ma ená Okí, ví ma taká mbunu. 21Kó Yésusu a ma wundé ojárá nawó anáá: «Dɔ́ŋgɔrɔ́ɔ́ŋ a rií na vinó! Amó Tetáŋgá a ma tómá, noó hónó ŋgo nó tómámó.» 22Ará a ma maná ojárá náná, kó a ma wó húníyáná ihúní aye nawó anáá: «Akáno Mwáŋ mwáŋ wa Ireréŋgi! 23Ava no né wó jwámó mabé máwó, Irɔŋgɔ a né wó jwámó, ava no ta né wó njwé mabé máwó, Irɔŋgɔ a ta né wó njwé.»
Yésusu nawó na Tómasa
24Ará Yésusu a ma húméná vihoóhóná vyáa na yanje, Tómasa ójó vá ma rová anáá mwaná wa ivásá a ta ma rií ɔ́wɔ́. Ó ma ríi umweesií ójó na vihoóhóná vyáá vyábɔ́t na vívé. 25Na wéŋga ówó anáá vasɔ́ɔ́ vihoóhóná vá me ojáná anáá: «To mó ená Okí.» Kó a ma wó wundíyé anáá: «Noó ŋgo a ríi ka ená ndeme rá njánjéna na embéré raá, ŋgo a ríi ka iŋgíye inɔ́ɔnɔ́ namé na pandó rá njánjéná noó owunde ovaá ombɔɔ́ ramé na isámá náá, noó ka kaŋga!» 26Wó je rií anáá na nimé ra emánjéta mbímí, vihoóhóná vyá Yésusu ví ma wundé o váwónjéena na yanje, isí mwané Tómasa a ma ríi ɔ́wɔ́. Yésusu a ma endá uré hɔrɔ́ ehótó e rií peté-pété otérémena na ráaté wawó aye nawó anáá: «Dɔ́ŋgɔrɔ́ɔ́ŋ a rií na vinó!» 27Kó a ma járá na Tómasa naá anáá: «Váá inɔ́ɔnɔ́ rɔ́ɔ́ eéná onúné hónó embéré rame, íŋgíyé ombɔɔ́ rɔ́ɔ́ na isáma námé. Tírímíyé mpetɔ́ índi o kaŋga.» 28Tómasa a ma me wundíyé anáá: «Okí wame na Irɔŋgɔ wame!» 29Yésusu a ma járá naá anáá: «O mó atɔ́wɔ́ esene éyé o mó ená, vitaka na ava vá atɔ́wɔmó ka ená.»
Mpí ra kárate ojó
30Yésusu a ma eŋgá hée masimbá mbunu na aŋgísó rá vihoóhóná vyáá kó mamba mwané má ta ámó tiré-tíré na kárate ojó.
31Mamba ámá vá ma tiré na kárate ojó, vá ma tiré índi no atɔ́wɔ aá Yésusu a ámó etómá yá Irɔŋgɔ, Mwaná Irɔŋgɔ ukú ójó anáá ará no né me atɔ́wɔmó, no timbe esɔ́tɔ́ éyé kɔ́rɔ́tɔ́tɔ́ na ebérááná yáa.
လက္ရွိေရြးခ်ယ္ထားမွု
Yohánese 20: tii
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2024, CABTAL