Ŋgengéná 5
5
Ananíyasa na Sapíra
1Moto omo ebérááná anáá Ananíyasa nawó na egé ójó Sapíra vá ma ovááná osérá cí rawó. 2Kó mií nawó na egé, a ma vétééná ŋgava ra mwení emo, kaá ijomó, a ma endá eréena enásá. 3Kó Pyéere a ma járá anáá: «Aá Ananíyasa, na wusó wá até kówo Saátana a mó wo iŋgáana naáté yá otémá? O mó jeénye Mwáŋ mwáŋ wa Ireréŋgi kó o mó vétéena ŋgava ra mwení ra cí éjé o mó sérá. 4O mó hítí ovétéena cí rɔɔ, ítɔɔ hónó ámó o mó kusaana na ejé, o mó hítí weŋga wandá ówó o diŋgámó na mwení rɔ́ɔ́. Twiiŋí kówo o mó tímbe kána ra mbuŋgáná eméje? Até vato káva o mó jeényé, wó ámó Irɔŋgɔ kójo o mó jeénye.» 5Béŋ ámó Ananíyasa a ma ová vipéŋgé imívi, a ma hiráná wedúme o tómbá ogwé. Vato bimé ává vá ma ová maró mwané, wohwaá wó ma wó ambááná. 6Embwene ra vato e ma uré ondo híté mbimbe kó vá ma endá títána.
7Wandá ámó maworo mátátó má ma tómbá, eéné Ananíyasa a ma iŋgááná ka jembe até éyé é ma tómbá. 8Pyéere a ma me súsé anáá: «Ŋgojánámó, ye na abímí rá mwení amája kówo no mó sérá cí?» A ma me wundíyé anáá: «Eeŋ wó ámó abímí rá mwení amája!» 9Kó Pyéere a ma járá naá anáá: «Twiiŋí kówo no mó óba mií vinó na onómó anáá no sɔsena Ireréŋgi yá Okí? Óvá, ambaná rá vato ává vá ré enda títána onómó vá etá na ohótó, vá wo wɔ́rɔ́mó vá endá hónó nɔɔ.» 10Ikɔkɔ ka mana, Sapíra a ma híráná woba na eŋgoró ra Pyéere ogwé. Ará embwene ra vato éjé e ma títáná enémé e ma iŋgááná, vá ma etíyé anáá a ogwé, kó vá ma me byaá ondo me títána na kɔ́ŋgɔ́ ra enémé. 11Ekáné yá wókótó wó ma ambááná iwónjá rá vatɔ́wɔ iŋgímé kó na vato bimé ává vá katé ová maró mwané.
Mesimbá má enásá ra Yésusu
12Enásá e katé eŋga ombunu rá mesimbá na mamba má okémbyé naáté yá noyɔŋɔ. Vatɔ́wɔ bimé vá ma ré váwónjáana na ohótó rá Sárómono mií imwesií, 13wó je rií anáá moto a ta ma ré wó kérena, itɔɔ ámó vá ma ré wó támana. 14Ncumbí wa vato vakótó na vanómótó vá katé atɔ́wɔ́ Okí kó a ma váwúswííyé na iwónjá rá vatɔ́wɔ. 15Vato vá ma késyé ohúmíye vinɔ́ na mukará ítɔɔ na endáŋgá o wó mícana na kɔ́ŋgɔ́ ra onjɔ́ŋɔ́ ombótá ójó anáá ará Pyéere a né tómbámó, canjena raá é taátena maté omo ójó na vámwané. 16Ncumbí wa vato a mará ondo urána na vinɔ́, na vato ává vambé vá vireréŋgi vá katé tuúriye, vá katé ondo urána na vidɔŋgɔ íví berebe na Yerúsareme, kó bimé vá ma ré ondówana.
Vá tuúriyámó Enásá
17Ogónó wa acekiye mómí na vató váa bimé ává vá béráanámó anáá va Sadusyeéne vá ma núwé tút na mbésé. 18Kó vá ma eŋgá anáá ambááná enásá vá wó nɔ́ naáté yá mboo na aŋgísó ra vato bimé. 19Wó je rií anáá na wutúú éŋgerese wa Okí a ma buné ehótó ra yanje yá mboo, ohúmyé enásá aye nawó anáá: 20«Ndáno na yanje yá Irɔŋgɔ índi no ojana noyɔŋɔ vipéŋgé bimé vyá mkpámáká ra esɔ́tɔ́.» 21Enásá e ma eŋgá até éyé éŋgerese a ma járá nawó. Kuúkú ibeesí, vá ma endá na yanje yá Irɔŋgɔ okésyé oyeére vato.
Ogónó wa acekiye mómí na vato váa vá ma bérááná njwé rá va Yúdene anáá vá váwónjéena, kó vá ma tómá vato anáá vá endá wɔ́rɔ́ enásá na yanje yá mboo. 22Vato amáva vá ma endá húmé na yanje yá mboo ka etíye enásá ɔ́wɔ́, kó vá ma wundé ondo ojana vagónó anáá: 23«To mó énda, visó wetíye yanje yá mboo petépété wusi na wusi, va gíré mboo vá rií na ohótó kó ará to mó buné, visó ka etíye moto naáté.» 24Ará vá ma maná otɔ́ŋɔ́, ogónó wa vagíré yanje yá Irɔŋgɔ na vagónó vá vacekiye mómí vá ma kémbyé kó vá katé vásúsé até éyé é ma tómbá. 25Kó moto omo a ma uré ondo wó ojána anáá: «Vato ává no má váá na mboo vá ámó naáté yá yanje yá Irɔŋgɔ na oyeére noyɔŋɔ.» 26Kó ogónó wa vagíré a ma endá na visimbi vyáa na ondo wɔ́rɔ́ owó enásá, vedá ka wó eŋgá wandá esene éyé vá katé tíné anáá vato vá wó twáná atááné.
27Kó vá ma endá nawó na yanje yá jósi kó ogónó wa acekiye mómí a ma késyé o wó ríŋgaana anáá: 28«To má tírímíyé mbéndɔ́ anáá vinó ka ne eréena vato ehoóhona na ebérááná yá moto omójo, kó vinó no onwíyé Yerúsareme uŋgimé na ehoóhonawa yá vinó, no diŋgámó sɔ́ anáá miné má moto omójo má obá na icé ra visó!» 29Pyéere na vasɔ́ɔ́ enásá vá ma járá nawó anáá: «Wó géremenámó anáá mová má ríi na Irɔŋgɔ otómbá anáá má ríi na vato. 30Irɔŋgɔ wa va kókó vá visó a má hónóná Yésusu na raaté wa vigwé, Yésusu mwané ójó vinó no má oná ará no má me ondááná na kóroso. 31Irɔŋgɔ a ma me néétyé na ombambané ráá kó a ma me nuumíyé ámó Ahumu na Asótyé ombótá ójó anáá noyɔŋɔ na Ísayéere no céndyé púrú ráwó índi nyéŋgé ráwó í jwévena. 32To ámó va wúsinete vá mamba mwané, visó na Mwáŋ mwáŋ wa Ireréŋgi ojó Irɔŋgɔ a ma erééná ava vá me ovámó.»
33Ará vato vá iwónjé rá va róyá vá ma óvá até éyé enásá e ma járá, mbesé e ma wó náátá kó vá ma diŋgé anáá vá oná enásá. 34Wó je rií anáá, mwaná wa Pariséne omó oyéere wa mbéndɔ́, ojó neyɔŋɔ nó katé o mo mítyé, a katé rií na iwónjá rawó vá mó beráana anáá Gamariyére. Kó a má súsé anáá vá mana o húmyéta enásá. 35Kó a ma járá anáá: «Aá vato ává na Isayéere, kéryáno na até éyé nó diŋgámó anáá no eŋga vato ává. 36Metúú a ma me ma tómba ará, to ma ená moto omo vá mo beráana anáá Tedása a katé ojárá anáá a ámó na mpí, kó vato ámó motete mwééné vá ma mo byɔɔnɔ́. Kó vá ma mo oná vato bimé ává vá ma mo byɔɔ́nɔ́ vá ma sáramandá moto ka ne rií hée. 37Na nimé ráá, Yúdasa ójó na Gariréya a ma húmé na itíndíkáná rá iráŋa, ómwané hónó vato vá ma mó byɔɔ́nɔ́, ará vá ma mó oná, bimé ává vá má mó byɔɔ́nɔ́ vá ma sarámandaná. 38Ŋgo nó ojánámó sɔ́ anáá, vinó ka ne bísí na vato ává, o wó micámáno vá endá. Ŋgé mbuŋgáná ráwó na manɔnɔwɔ máwó má éndámó uré na vato, vá né sárámandámó. 39Vedá ŋgé wó ámó manɔnɔwɔ má Irɔŋgɔ, no ta pítí weŋga wandá, no teŋgé eŋga anáá no timbe esene éyé na Irɔŋgɔ.» Kó iwónjá ra vá róyá i ma atɔ́wɔ́ mbuŋgána rá Gamariyére. 40Vá ma beráana enásá, o wó núbé, kaá vá ma wó tevéré anáá vá mwáné ka ne járá na ebérááná yá Yésusu kó vá ma wo mícé. 41Enásá e ma urukyé iwónjá rá va róyá na vitaka esene éyé Irɔŋgɔ a mo wó atɔ́wéná anáá vá wó túúrye na wusó wa ebérááná yá Yésusu. 42Mesí mímé, naáté yá yanje yá Irɔŋgɔ, kó onáŋgá onáŋgá, enásá ma ré enda na wusó na oyeére owó vato, vá wúnde woja Usi wa Cómó anáá: Yésusu a ámó Etómá yá Irɔŋgɔ.
လက္ရွိေရြးခ်ယ္ထားမွု
Ŋgengéná 5: tii
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2024, CABTAL