Ŋgengéná 19
19
Póoro a jinámó na Epése
1Na itíndíkáná íjí Aporóso a katé rií na Korénte, Póoro a ma tómbéná na edɔŋgɔ yá eŋgené ondo húmé na Epése. Ɔ́wɔ́, a ma etíyé vihoóhóná vimó 2kó a ma wó súsé anáá: «Ará nó ma bundé vatɔ́wɔ, ye nó ma timbé Mwáŋ mwáŋ wa Ireréŋgi?» Kó vá ma me wundíyé anáá: «Visó to ma eŋgá to arɔ́wɔ́ hónó ka ová vá járá ndɔ́ŋɔ́ ra Mwáŋ mwáŋ wa Ireréŋgi.» 3Kó Póoro a ma súsé anáá: «Kána ra nduwána ejaté eje vinó no ma duwáná?» Váye naá anáá: «Nduwáná ra Yohánese.» 4Póoro a ma járá nawó anáá: «Yohánese a ma dweé vato ává vá katé diŋge anáá vá céndyé visɔ́tɔ́ vyáwó, kó a katé owó ojána anáá vá atɔ́wɔ moto ojó a urámó na nímé ráá. Moto mwané a ámó Yésusu.» 5Ará vá ma ová náná, kó vá ma duwáná na ebérááná yá Okí Yésusu. 6Póoro a ma wó taréena embɔɔ́, kó Mwáŋ mwáŋ wa Ireréŋgi a ma wó sisáná, kó vá ma késyé ohúmíye maró má Irɔŋgɔ, vá járá até éyé Irɔŋgɔ a wó wámó na uŋguté anáá vá járá. 7Vato mwané vá ma rii vábɔ́t na vává.
Póoro a ojámó maró má Irɔŋgɔ na Epése
8Póoro a katé endana na yanje yá mbásóóríyé na taŋgó ra ehé etátó, a járá maró má Irɔŋgɔ na ipitíiŋgímé na até éyé é néménámó Edɔŋgɔ yá Irɔŋgɔ, kó a katé eŋga wandá wimé ukú ojó anáá vato ává vá katé me vátɔ́rɔ́ vá atɔ́wɔ. 9Wó je rií anáá vato vámó ává vá katé reriiye etémá rawó kó vá ta ma ré atɔ́wɔ vá katé kpeére pé ra Okí na aŋgísó rá vato bimé. Kó Póoro a ma wó urúkyé wenda na vihoóhóná na onde wó yeére mesí mimé na sukúre wa moto omo ebérááná anáá Tiranóso. 10Wandá mwané wó ma riyé maá mává, naná kówo vato bimé ává vá katé sɔ́tɔ́ na cí ra Asíyá, va Yúdene na va hayídene, vá ma hítí wová maró má Okí.
Oráŋá rá embwene ra Séva
11Póoro a ma ré eŋga ombunu rá vikáná vyá mesimbá na ŋguru ra Irɔŋgɔ. 12Náná kówo vato ává vá ma ré timbe vinɔ́ vá katé wɔ́rɔ́nɔ cunú ítɔɔ va návákene ává vá mó tahá notó raá, kó vinɔ́ mwané ví ma ré ondówana, vambé wá vireréŋgi honó wurúkyána. 13Va Yúdene vámó vá katé o té ndenda pandó pandó anáá vá o té gúné vambé wá vireréŋgi na vinɔ́. Kó vá ma maá anáá vá tímbaana na ebérááná yá Okí Yésusu na ogúné ówó vireréŋgi mwané vá járáanáá: «Ŋgo nó tévérámó anáá no húmána na ebérááná yá Yésusu ojó Póoro a ojámó.» 14Náná kówo embwene racátó na umwesií ra ogónó wa acekiye mómí ójó Séva émwané hónó e katé eŋga wandá mwané. 15Kó isí emó, ombé wa ireréŋgi a ma wó wundíyé anáá: «Njembámó Yésusu, kó njembámó áné ójó a ámó Póoro, kó vinó, no ámó sɔ́ avaté?» 16Kó moto ójó a ma timbe ombé wa ireréŋgi a má wó bátamená o wó gíte na wonywá vámwané bimé, kó túúríyéná éjé a ma wó túúriyé e ma eŋgá anáá vá urúkyána na yanje yá moto omójo kaá obwɔ́nɔ́nɔ ntúmburí na vinoni kpámat. 17Vato bimé ává na Epése, va Yúdene na va hayídene vá ma ová dɔ́ŋɔ́ mwané, wokótó wó ma wó ambááná bimé kó vá ma timbé ekáné yá imítí na wusó wa ebérááná yá Okí Yésusu.
18Ombunu rá vato ává vá ma atɔwɔ va katé ondo oja mabé máwó mií na máná. 19Ombunu rá ava vá katé rií ŋgaŋa vá ma eŋgá undumú rá va kárate váwó vá toŋgaŋa, oheénye na aŋgísó ra moto uŋgimé. Ará vá ma baná va kárate mwané, vá ma ɔŋgɔ́ anáá vá ma hítí weréena vikpama vyá mwení toósini mawɔ́ mátáánó. 20Kaá náná kówo na ŋguru ra Okí, maró má Irɔŋgɔ má katé sárámanda má timbe hónó ŋguru.
Induutana í ámó na oŋgórá rá Epése
21Na nimé ra mamba mwané, Ireréŋgi éyé Mwáŋ mwáŋ é ma eŋgá na Póoro anáá a tómbé na edɔŋgɔ yá Maseduwána kó na edɔŋgɔ yá Akáya ukú ojó anáá a enda húmé na Yerúsareme. A katé járá anáá: «Na nimé raá ŋgo né endámó húmé na Róma.» 22A ma tómá Timotéya nawó na Erásete ává vá katé me aka na edɔŋgɔ yá Maseduwána, kó ómwané maté a ma maná cáná orií hée vaná vá metúú na cí ra Asíyá.
23Na itíndíkáná mwané kówo ekáné yá induutana í ma ríi na Epése na até éyé é néménámó pé ra Okí. 24Esené okéékéré omo ójó a katé héndá vimboŋgá, ntútú na motéé umumú vá me béráana anáá Demetiriyúsu, a katé hendá vihekere vyá yanje yá sambé okótó vá béráana anáá Aratemísi. Demetiriyúsu a katé hendá vihekere mwané na itwíŋí yá mwení kó wandá mwané wó katé eréena vákéékéré mwení mbunu. 25Kó Demetiriyúsu a ma wónjééná vakéékéré na vato bimé ává vá katé eŋga sɛ́ɛm wa manɔnɔwɔ mwané aye nawó anáá: «Va mbérá vamé, no ijímámó anáá to sɔ́tɔ́mó wusi na wusó wa manɔnɔwɔ amá. 26Wó je rií anáá no enámó kó no ovámó ámó ojo vá béráanámó anáá Póoro a veéryámó ombunu rá vato, até bɛ́ŋ na oŋgórá rá Epése, a eŋgámó wandá mwané na cí ra Asíya iŋgimé. A wó yeérámó anáá va sambé ává vato vá héndámó vá ta ámó va sambé kó váto vá káŋgámó. 27Wandá mwané wó hítyámó weŋga anáá akéré rá visó á déŋgyé mpí raá, owunde weŋgá hónó anáá vá séŋgá yanje yá sambé okótó ójó Aratemísi, kó vató vá ta né ne me hwá imítí ráa na wogónó wáa, ómwané ójó vá gúmíyámó pandó íŋgímé na cí ra Asíya kó na cí ra ndono iŋgimé.»
28Ará vato vá ma ová vipéŋgé imíwi kó vá ma ová mbese vá te rume anáá: «Aratemísi a ámó ekáné sambé okótó na Epése!» 29Induutana í ma sarámandá na oŋgórá uŋgímé, kó vato vá ma turé Gayiyúsu na Arisitáraka na ŋguru wenda nawó na pandó ra mbérúmáná esene éyé vá ma ríi vato ává na Maseduwána kó vá katé tíráana Póoro na eŋgendɔ ráá. 30Póoro a ma diŋgé anáá a nde vatihíye na ncumbí wa vato omójo kó vihoóhóná ví ma me jiyé. 31Va mberá va Póoro vámó ava vá katé rií na mpí vá nɔnɔɔ na cí ra Asiyá vá ma me tómená cómó anáá a teŋge ovatihyé na vato amáva.
32Na itíndíkáná mwané, na pandó ra mbérúmáná ekáné yá iduutana na cáŋgó mo ma rí na raaté wa vato, vato vá katé járá ává kána, ava vámó kána kó ombunu rá vato wó etá ka jembe nawusó wá até kówo vá ma váwóŋjéena. 33Vato vámó vá ma ojáná moto omo ndɔŋɔ́ mwané ebérááná yáá anáá Arekesándere ómwané ojo va Yúdene vá ma me púsyé na wusó, kó a ma eŋgá ndeme na ombɔɔ́, esene éyé a ma diŋgé anáá a járá na vato. 34Ará vá ma jembé anáá a ámó mwaná wa va Yúdene, kó vato bimé vá katé rume mií emwesií ohúmé ámó mawora máváné vá járá anáá: «Aratemísi ojo ámó ogónó sambé okótó na Epése.» 35Aŋgɔ́ɔnɔ ojó na oŋgórá, kójo a ma ité vato, a ma járá nawó bimé anáá: «Moto omó a támó ná Epése ará ojó a tátarámó oŋgórá ojó o ámó mwáŋ mwáŋ na wusó wa ogóno wá sambé okótó ójó Aratemísi, kó na ehekere yáá eyé e ma endá uré máná? 36Moto a ta pítí opetaana wandá mwané, ríyáno sɔ́ cók, no teŋgé ne eŋga wandá ka buŋgana. 37No mó uré na vato vává ává, vá te eŋga wobé na yanje yá ogóno wa sambé okótó wa visó tɔɔ o me seyá. 38Demetiriyúsu na vato váá, ŋgé vá timbámó sɔ́mɔnɔ na wusó wa moto omo, vámwané wenda na vá sombá ntóró wɔ́kɔ́ kówo vá geremenámó onde sɔ́mɔnɔ. 39Kó ŋgé ne rá timbe hée sɔ́mɔnɔ indyé to né hendámó na iwónjá rá va rɔ́yá. 40Vá hítyámó o só sɔ́mɔ́nɔ anáá to mó hétiye iwuru iwuru na wusó wá até éyé é mó tómbávena wusí owó. Esené to ta hítí woja wandá ówó vato ává vá ámó wónjéénérí ará.» Ará a ma maná ojárá náná kó a ma eŋgá anáá vato vá etána.
လက္ရွိေရြးခ်ယ္ထားမွု
Ŋgengéná 19: tii
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2024, CABTAL