Ŋgengéná 18
18
Póoro a ámó na oŋgórá rá Korénte
1Na nimé ráa, Póoro a ma urúkyé na Aténe wenda na oŋgórá rá Korénte. 2Ɔ́kɔ́, a ma bérúmé na mwaná wa va Yúdene omo ebérááná anáá Akirása ójó a má byánávéná na edɔŋgɔ yá Pónte. A ma rií ondo uré ówó na edɔŋgɔ yá Itaríyá nawó na egé ójó Pirisíyá, esene éyé ogónó ahumu ójó Koróde a ma sáná anáá va Yúdene bimé vá géremenámó wurúkye na Roma. Kó Póoro a ma endá wó etíye. 3Kó ámó vá ma ré timbe sɛ́ɛm wa oyéké, vá héndá virárá vyá vikoo, Póoro a ma endá rií orɔŋgɔ nawó ukú ójó anáá vá nɔ́nɔwɔ. 4Póoro a katé wɔ́rɔ́ enjárá naáté yá yanje yá mbasoóriyé isí yá ihuwe yimé, ukú ójó anáá tɔɔ va Yúdene, tɔɔ va hayídene vá atɔ́wɔ. 5Vedá ará Sírasa na Timotéya vá ma jiné ondo uré ówó na Maseduwána, kó Póoro a ma wɔ́rɔ́ itíndíkáná ráa iŋgímé na woja ówó Usi wa cómó, a járá na va Yúdene anáá Yésusu a ámó Etómá yá Irɔŋgɔ. 6Wó je rií anáá va Yúdene vá ta ma ré me atɔ́wɔ vá me seyá, kó Póoro a ma gité cunú ráa índi a tíhíye anáá ibúú ráa í ta ne rií ɔ́wɔ́ kaá a ma járá nawó anáá: «Ŋgá miné má vinó má nó obéna vinó maté na ucé, noó ta timbé ihusí ɔ́wɔ́, kó okésyé ówó tetee ojó mbaŋgámó wenda na ava vá ta ámó va Yúdene.» 7Póoro a ma urúkyé pandó mwané wenda na yanje yá moto omo anáá Titiyúsu Yusutúsu, moto mwané a katé gúmíye Irɔŋgɔ kó yanje yáa é katé rií berebe na yanje yá mbásóóríyé. 8Cirisipúsu, njwé éjé na yanje yá mbásóóríyé a ma atɔ́wɔ́ Okí na yanje yáa yá vato yimáná, kó ombunu rá vato ává na Korénte vá ma búndáná vatɔ́wɔ owunde oduwana ará vá katé vátɔ́rɔ́ Póoro. 9Wutúú womó, Okí a ma járá na Póoro naáté yá ndemɔ́ anáá: «Mámó ka tíné, ndá na enjárá na wusó, o ta eŋgá otámbá! 10Esené ndo ámó nɔɔ kó moto a ta hítí o wo eŋga wobé esene éyé vato ává vá ámó vamé na oŋgórá ojó vá ámó mbunu.» 11Póoro a ma ríi na Korénte bwaá mbímí na isímbí, a yeére vato maró má Irɔŋgɔ.
Vá endámó na Póoro na aŋgísó rá njwé ójó Gariyóno
12Na itíndíkáná íjí Gariyóno njwé éjé na va Roméne ójó na edɔŋgɔ yá Akáya a katé njwé, vá Yúdene bimáná vá ma ratá anáá vá kékáanámó na Póoro, kó vá ma enda naá na yanje yá jósi. 13Kó vá má re járá anáá: «Moto ójó a eŋgámó anáá vato vá rií ka gúmíye Irɔŋgɔ ámó mbéndɔ́ ra Mósese e súsámó!» 14Kó ará Póoro a ma eŋga anáá a wɔ́rɔ́ enjárá, Gariyóno a ma wó wundíyé anáá: «Wó mó ríi wó aríi anáá ŋgonáana e mó éŋgavena, tɔɔ ihusí íjí í cákámó obéyé, ŋgo mó éŋga ŋgo atɔ́wɔ sɔ́mɔnɔ wa vinó, Aá va Yúdene. 15Kó ámó no petaanámó na wusó wá vipéŋgé, vibéráá na mbéndɔ́ éjé ra vinó, maró má vinó amáma! Noó, ta hítí ojósyé ukú rá mamba.» Amáma! 16Kó Gariyóno a ma wó gúné na yanje yá jósi. 17Kó bimé vá ma ambááná Sosoténe njwé ra yanje yá mbásóoríyé. Kó vá ma késyé o me nubé na naŋgáté ra yanje yá jósi, Gariyóno ka wɔ́rɔ́ hónó ŋgava.
Póoro a wundámó na Antiyóso
18Kó Póoro a ma ríi hée téé na Korénte kaá a ma urúkyé vatɔ́wɔ, owɔ́rɔ́ sitíme wenda na Siríyá orɔŋgɔ na Pirisíyá kó na Akirása. A ma ríi a omána okésyé omwa ucé na oŋgórá rá Cenkeréyá esene éyé a ma eŋgéná Irɔŋgɔ tánó. 19Vá ma endá húmé na Epése, ɔ́wɔ́ kówo Póoro a ma saá na Pirisíyá na Akirása kó ómwané a ma endá na yanje yá mbásóóríyé okésyé ojáráana na va Yúdene. 20Váye naá anáá: «Ríi rii hée na visó.» Kó Póoro a ma váráŋgá. 21Kaá a ma wó urúkyé hɔrɔ́ a járá nawó anáá: «Ŋgo né wundámó oŋgendɔ úndyé ŋgé Irɔŋgɔ a diŋgé.» Kó a ma wɔ́rɔ́ sitimé wurúkye na Epése. 22A ma endá húmé na Cesaráyá kó a ma endá na Yerúsareme ondo vétíyé Iwónjá rá vatɔ́wɔ kaá a ma wɔsɔ́ na Antiyóso ójo na Siríyá, 23kó a ma túmbyé vaná vá metúú ɔ́wɔ́. Kaá a ma wundé o ne enda na vidɔŋgɔ yá Garatíya kó na Pirigíyá a rerye vihoóhóná bimé nótó.
Aporóso a endámó na oŋgórá Epése na Korénte
24Mwaná wa va Yúdene omo ebérááná anáá Aporóso ójó a ma byánávéná na oŋgórá ra Arekesandiríya a ma endá humé na Epése. A kate jembé enjárá a jembe hónó aŋgóŋgí ájá mwáŋ mwáŋ wusi na wusi. 25Vá ma me tíhíyé pé ra Okí kó na andíŋgé eŋgímé, a katé oja a yeére vato Usi wa Cómó wa Yésusu ták ták, ómwané a je jembe bɛ́ŋ nduwáná ra Yohánese. 26Kó a ma késyé ojáráana na ipitíiŋgímé naáté yá yanje yá mbásóóríyé. Ará Pirisíyá na Akirása vá ma me ová a járá kó vá ma me wɔ́rɔ́ na yanje índi vá me tíhíye hée pé ra Irɔŋgɔ wusi na wusi. 27Amó Aporóso a ma diŋgé anáá a enda na edɔŋgɔ yá Akáya, kó vatɔ́wɔ vá ma me hwá wonotó anáá a enda, kó vá ma tiréná vihoóhóná íví ɔkɔ́ kárate anáá vá tímbaana naá wusi. Ará a ma humé ɔkɔ́, a ma ríi na mpí mbunu na raaté wa vatɔ́wɔ ámó Irɔŋgɔ a katé me hwá ntá raá. 28Esené na aŋgísó rá moto uŋgimé, a katé járá ndóndá rá vipéŋgé íví ví katé ité va Yúdene iŋgúté, kó a katé timbaana na va Kárate ává mwáŋ mwáŋ índi a tíhíye anáá Yésusu a ámó Etómá yá Irɔŋgɔ.
လက္ရွိေရြးခ်ယ္ထားမွု
Ŋgengéná 18: tii
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2024, CABTAL