Yohani 18
18
Ukukoliwa kwa Yesu
(Matayi26.47-56; Maliko14.43-50; Luka22.47-53)
1Bo u Yesu amala pakwiputa, akafumapo na bamanyili bake nu kuloboka ikombe lya Kidiloni, kula kula kukaba umughunda, gho u Yesu poka na bamanyili bake bakingilamo. 2U Yudasi yo akamubika munyobe sya balughu akamanyako kubuyo bula bula, chifukwa u Yesu bakakomanagha kabili kabili na bamanyili bake kula kula. 3Po u Yudasi, akabuka ni chilundilo cha basilikali naba balindili ba balongosi ba baputi na bafalisayi, bakabuka banyamwile inyale, ifikoka, nifilwilo. 4U Yesu, akasimanya ngani syosi syo sikwisa pakubombiwa ku kwake, po akabuka nukubalalusya ukuti, “Mukumulonda we wenu?
5Bakamula bakati, “Tukumulonda u Yesu wamu Nazaleti”
U Yesu akayugha nabo akati, “Nene.”
U Yudasi yo akamubika u Yesu munyobe sya balughu, akimilila poka nabo. 6Bo u Yesu abamula ukuti, “Nene” bakanyokela munyuma nukuwa pasi. 7U Yesu akabalalusya sona akati, “Imba we wenu yo mukumulonda?” Po bakayugha bakati,
“U Yesu uwa mu Nazaleti.” 8U Yesu akabamula akati, “Une mbabusisye ukuti nene. Pala mukundonda une, baleka aba babuke.” 9Akayugha isi ukuti amasyu ghakwanilisiwe gho akayughagha ukuti, ‘Ndakamutaghapo nayumo pabosi bo ukamba.”
10Po u Simoni Pitala akaghusa upanga nu kumuputula ikutu ilya kundilo lya wambombo wa baputi usongo. Ilita lya wambombo akaba we Malikusi. 11U Yesu akati kwa Pitala, “Bika mumo u panga munyambi yake! Imba ukwinong’ona ukuti ndakwisa pakung’wela ulubako ulwa ndamyo lo u Tata akamba une?”
U Yesu pamaso pa Anasi
12Po ichilundilo cha ba basikali ba Chiloma poka nu mulongosi wabo, na balindilili ba Chiyuda bakamukola u Yesu nukumupinya, 13bakanda pakabuka nawe kwa Anasi, yo akaba we tayifyala wa Kayafa. U Kayafa akaba muputi usongo ichinja chila chila. 14U Kayafa weyo akabalingannya abalongosi ba Chiyuda ukuti chisapo umundu weka afwile abandu bosi.
U Pitala akumukana u Yesu
(Matayi26.69,70; Maliko14.66-68; Luka22.55-57)
15U Simoni Pitala nu mumanyili yumo bakamukonga u Yesu. Chifukwa umumanyili uyu akaba mumanyikwe ngani ku muputi usongo, po bakabuka nu Yesu pakaya ka muputi usongo, 16loli u Pitala akimilila kusi kumulyango. Po umumanyili uyungi yo akamanyikwa ngani kwa muputi usongo, akafuma nukuya pakuyugha nu mulindu yo akalindililagha pamulyango, po akamwingisya u Pitala. 17Umulindu yo akalindililagha pamulyango akayugha kwa Pitala akati, “Imba te we yumo wabamanyili ba mundu uyu?” Akayugha akati,
“Une te nene.”
18Abambombo na basilikali ba Chiyuda bakapemba umulilo wa mababu, chifukwa kakaba kabalilo kakutalala. Po bakimilila nu kota umulilo, u Pitala wepe akimilila pala pala, nukota nabo umulilo.
Umuputi usongo akumulalusya u Yesu
19Po umuputi songo akamulalusya u Yesu isya bamanyili bake, nisya chimanyisyo chake. 20“U Yesu akamula akati, “Une ngayugha pabwelu mubandu bachisu chapasi. Ngamanyisya akabalilo kosi mu nyumba sya kwiputilamo na mu Nyumba ya Chala, mo aba Yuda bosi bakubungana poka, ndakayugha nachimo umwakufifa. 21Imba choni cho mukundalusya une? Balalusye bosi bo bakanyifwa une. Abene basimenye syo ngayughagha.”
22Bo u Yesu ayugha isi, yumo mubalindili akamukoma u Yesu kumaso, akayugha akati, “Imba ungamwamula umuputi usongo bububu?”
23U Yesu akamwamula akati, “Pala nayugha akabibi, po simikisyagha ububibi bo nayugha. Loli pala njughite ubwanaloli, imba choni cho ukungoma?”
24Po u Anasi akamutuma u Yesu bo apinyiwe kwa Kayafa, umuputi usongo.
U Pitala akumukana sona u Yesu
(Matayi26.71-75; Maliko14.69-72; Luka22.58-62)
25U Simoni Pitala akaba akali imilile akota umulilo mwene. Po bakamulalusya bakati, “Imba te we wa yumo wa bamanyili ba mundu uyu?”
Umwene akakana, nukuyugha ukuti, “Te nene.” 26Yumo uwa mbombo wa muputi usongo, umukamu wa mundu yo u Pitala akamuputula ikutu, akayugha akati, “Imba ndakakutesya nawe mu mughunda mula?”
27U Pitala akakana sona, papapo na papapo umukolwe akakokolika.
U Yesu pamaso pa Pilati
(Matayi27.1,2,11-14; Maliko15.1-5; Luka23.1-5)
28Po bakamusenya u Yesu pangelo ngani, ukufuma kwa Kayafa nukubuka nawe ku nyumba ya Chiloma. Po abalongosi ba Chiyuda batakingila nabo mu nyumba ya mulaghiliwa Chiloma, umwakuti batakinyasye, loli ukuti balye ulusekelo lwa Pasaka. 29U Pilati akafumu kusi ku kwabo nukulalusya ukuti, “Imba nongwa yiki yo mwisila nu mundu uyu?
30Bakamwamula bakati, “Pala umundu uyu atakaba ni nongwa, ngali tutisile nawe ku kwako.
31U Pilati akati ku kwabo, “Musenye uyu mwebene, mumulonge ukuyana nu lulaghilo lwinyu.”
Loli aba Yuda bakamula bakati, “Utwe tutakwitikisiwa ukughogha umundu.” 32Isi sikabombiwa ukuti amasyu gha Yesu ghakwanilisiwe ukulangisya nisya bufwe bo akwisa pakufwa.
33U Pilati akingila sona mu nyumba ya mulaghili wa Chiloma, nu kumwitisya u Yesu. Akamulalusya akati, “Imba uwe we Malafyale waba Yuda?” 34U Yesu akamula akati, “Imba ilalusyo ili lyafuma ku kwako, pamo bangi bakakubusya isya une?”
35U Pilati akamula akati, “Imba une ne mu Yuda? Abaluko lwako na balongosi ba baputi bo bisile nuwe ku kwangu. Imba ubombite choni?”
36Yesu akamula akati, “Ubunyafyale bwangu tebwa muchisu chapasi, pala bukabagha bwa muchisu chapasi ichi, ngali abambombo bangu balwa ukuti ndakabikiwe munyobe sya balongosi ba Yuda. Loli ulu ubunyafyale bwangu te bwa muchisu muno.”
37U Pilate akayugha ku kwake akati, “Po uwe we Malafyale bati?”
U Yesu kamula akati, “Momumo mo wayughila ukuti une ne Malafyale. Une ngapapiwa sona ngisa muchisu chapasi, ukuti mbasimikisye ubwanaloli. Wesi yo ali pabwanaloli, yo akwifwa masyu ghangu.”
38U Pilati akalalusya akati, “Ubwanaloli cho choni?”
Syatumuliwa ukuti u Yesu aghoghiwe
(Matayi27.15-31; Maliko15.6-20; Luka23.13-25)
Bo u Pilati ayugha sisisi akafuma sona, akabuka ku ba Yuda nukubabusya ukuti, “Une ndakumwagha ni nongwa nayimo. 39Loli muli numuteto wakuti mbasatulile umundu weka pa Lesekelo lwa Pasaka. Imba mukulonda ukuti mbasatulile u Malafyale waba Yuda?
40Bakamula nu kukuta ukuti, “Umundu uyu awe! Loli u Balaba.” (U Balaba akaba mufyeka.)
လက္ရွိေရြးခ်ယ္ထားမွု
Yohani 18: SSTP
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ