Yohani 11
11
Ubufwe bwa Lazalo
1Pakabako umundu yumo ilita lyake akaba Lazalo, yo akabinagha, akafumagha mu Betaniya, mukaya ko u Maliya nu wamwabo u Malita bakikalaghamo. 2Akaba we Maliya yo akamupakasya u Malafyale amafuta gha kunungila, nukumupuputa mufinama fyake ni ching’wili chake, yo umuyemba wake u Lazalo akaba mubine. 3Abayemba bake bakatuma indumi kwa Yesu ukuti, “Malafyale, umumanyani wako umughaniwa abinite.”
4Bo u Yesu ifwa isi akati, “Ububine ubu te bwakuti angafwa nabo, loli bwa kuti u Chala aghindikiwemo, sona ukuti u Mwana wa Chala apokele ubughindikiwa chifukwa cha bubine bububu.” 5Po u Yesu akamughana u Maliya nu wamwabo wake u Malita sona nu Lazalo, 6loli bo Ifwa ukuti Lazalo mubine, akikalako amasiku aghangi mabili ko akaba. 7Po akababusya abamanyili bake akati, “Sa tubuke sona mu Yudeya.”
8Abamanyili bake bakayugha bakati, “We Mumanyisi, lululu abalongosi aba Yuda balondagha pakukusumba na mabwe, imba ukulonda pakunyokelako sona?”
9U Yesu akamula akati, “Umusanya ghuli nama awala twelovu, wesi yo akwenda nu musanya atakwipunula pakuti akutesya ubwelu bwa muchisu chapasi. 10Loli pala yumo akwenda nu busiku, yo akwipunula chifukwa ate nu bwelu mu mwake.” 11Bo ayugha isi, akabukilila pakubabusya ukuti, “Umumanyani witu u Lazalo aghonite bubu utulo, loli ngubuka pakumulamusya.”
12Po abamanyili bakamwamula bakati, “Malafyale, pala akali ali mutulo, akwisa pakuba akisa.”
13Abene bakinong’onagha ukuti akuyugha tulo twa bwanaloli, loli u Yesu akang’anamula ukuti u Lazalo afwile. 14Po u Yesu akayugha pabwelu akati, “U Lazalo afwile, 15loli chifukwa cha umwe hobokite ngani ukuti ndakabako, pakuti musubile. Twende kukwake.”
16Po u Tomasi, (yo akitisiwagha ukuti we mapasa) akababusya abamanyili abanine akati, “Twende poka nawe, ukuti tufwile poka nawe.”
U Yesu we kusyuka sona we bumi
17Bo u Yesu afika akagha u Lazalo aghonamo kale mwipumba amasiku folo. 18Akaya ka Betaniya kakaba papipi nu Yelusalemu, amakilomita aghakukwana papipi matatu, 19po aba Yuda abingi bakisa pakubasubasya u Malita nu Maliya chifukwa cha bufwe bwa muyemba wabo. 20Bo u Malita ifwa pakuti u Yesu akwisa, akafuma kusi pakukomana nawe, loli u Maliya akasyala munyumba. 21U Malita akamubusya u Yesu akati, “Malafyale, pala ukabangapo papapa, ngali umuyemba wangu atafwile! 22Sona napo ipano simenye ukuti chosi cho mukusuma ukufuma kwa Chala, u Chala ayukubapa.”
23U Yesu akamubusya u Malita akati, “Umuyemba wako akwisa pakusyuka sona kubufwe.” 24U Malita akamula akati, “Simenye ukuti akwisa pakusyuka sona kubufwe pisiku lyabumalilo.”
25U Yesu akamubusya akati, “Une ne kusyuka nu bumi. Wesi yo akusubila mumwangu akwisa pakuba nu bumi napo angafwa, pope akwisa pakuba mumi, 26sona wesi yo mumi akusubila mumwangu atakwisa pakufwa lumo. Imba ukusubila isi?”
27U Malita akayugha akati, “Inga, Malafyale, ngusubila ukuti uwe we Kilisitu, u Mwana wa Chala, yo bakatingi akwisa muchisu chapasi ichi.”
U Yesu akalila
28Bo u Malita amala pakuyugha isi, akanyokela pakumwitisya u wamwabo u Maliya nukumubusya kumbali ukuti, “Umumanyisi ali kuno akukwitisya.” 29Bo u Maliya ifwa isi, akanyamuka umwalubilo, akabuka kwa Yesu. 30U Yesu akaba akali atafikite mukaya kala, loli akaba akali pabuyo bo u Malita akakomana nawe. 31Aba Yuda bo bakaba poka nu Maliya munyumba pakumusubasya, bo bamutesya u Maliya anyamuka umwalubilo u kufuma kusi, bakamukonga ukuti akubuka kumapumba pakulila.
32Bo u Maliya afika pabuyo bo u Yesu akaba, po akamutesya, akafughamila mufinama fyake. Akamubusya akati, “Malafyale, pala ukabangapo ngali umuyemba wangu atafwile.”
33Bo u Yesu amutesya u Maliya akalila, sona na ba Yuda bo bakaba poka nu Maliya bope bakalilagha, umoyo wake ghukisula ngani ni chitima, nu kutamiwa ngani, 34sona akabalalusya akati, “Imba musilite kwighi?”
Abene bakamwamula bakati, “Malafyale, twende utesyeko.” 35U Yesu akalila. 36Po aba Yuda bakati, “Tesya mo akamughanila.”
37Loli bamo bakati, “Imba te weyo akamwighula amaso umufwamaso? Imba atangabomba chimo ukuti u mundu uyu atakafwe?”
U Yesu akumususya u Lazalo
38U Yesu akatamiwa ngani sona, po akabuka kwipumba lyo likaba mbako, bakighalilapo nibwe pa mulyango. 39U Yesu akayugha akati,
“Fumyapo ibwe” U Malita umuyemba yo akafwa yula akamubusya u Yesu akati, “Malafyale akabalilo aka abaghile pakununga akabibi, pakuti aghonamo amasiku folo.”
40U Yesu akababusya akati, “Imba ndakababusya ukuti pala mukusubila mukwisa pakubutesya ubughindikiwa bwa Chala?” 41Bakafumyapo ibwe lila. Po u Yesu akatesya kumwanya nukuti, “Tata, ngukupalisya pakuti wanyifwa. 42Simenye ukuti mukunyifwa akabalilo kosi, loli nguyugha isi chifukwa cha bandu bo bali pano, umwakuti basubile ukuti uwe we ukanduma.”
43Bo ayugha isi, akitisya nisyu lya pamwanya ngani akati, “Lazalo fumamo!” 44Po umundu yo akafwa yula akafumamo, annyembeteliwe nu mwenda mufinama na munyobe, sona akapinyiwa ni chitambala kumaso. U Yesu akababusya akati, “Musatule mumuleke abukaghe.”
Aba Yuda bakupangana pakumughogha u Yesu
45Aba Yuda abingi bakisa kwa Maliya, bo batesya syo u Yesu akabomba, po bakasubila mu mwake. 46Loli bamo mu mwabo bakabuka ku ba Falisayi, nukuyugha syo u Yesu akabomba. 47Po abalongosi ba baputi naba Falisayi bakitisya ulukomano nukuyugha ukuti, “Tubombe choni utwe? Pakuti umundu uyu akubomba ifiswigho ifingi. 48Pala tungamuleka bububu, abandu bosi bakwisa pakumusubila, po aba Loma bakwisa pakunangannya inyumba ya Chala nu luko lwitu!”
49Po yumo mumwabo akaba we Kayafa, yo akaba muputi usongo ichinja chila chila akayugha akati, “Mutakumanya ichindu nachimo.” 50Imba mutangifwisya ukuti chisa ukuti umundu yumo abafwile abandu, nukuti uluko losi lunangike. 51Loli atakayughagha mwene, loli ngati muputi usongo ichinja chila chila, akasololagha nganila ukuti u Yesu akwisa pakufwila uluko lwa ba Yuda, 52te kokuti uluko lwabo lwene, loli pakubungannya abana ba Chala bo banyambanite.
53Ukufuma isiku lila lila bakapanganamo bangamughoghela. 54Po u Yesu atakalondagha pakwenda pabwelu mukaya ka mu Yudeya, loli bakafumamo nukubuka mukaya kupipi ningolongo, mukaya ka Efulayimu, akikala kulakula poka nabamanyili bake.
55Loli bo u Leskelo lwa Pasaka lwa Chiyuda lwapalamila, po abingi bakakwela ukufuma mutwaya nukubuka mu Yelusalemu bo u lusekelo lutafikite ulwa kwiswepesya bene. 56Abene bakamulondagha u Yesu, bakalalusannya bene bene bo bakimilila Munyumba ya Chala bakati, “Umwe mukwinong’ona choni? Imba batakwisa ku Lusekelo lulu?” 57Loli abalongosi ba baputi naba Falisayi bakalaghila ukuti, pala yumo amenyeko ko ali, yo abaghile ukutubusye, ukuti tumukole.
လက္ရွိေရြးခ်ယ္ထားမွု
Yohani 11: SSTP
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ