Imbombo 9
9
Ukupindika kwa Sabuli
(Imbombo22.6-16; 26.12-18)
1 #
Imbo22.4-16; 26.9-18. Loli u Sabuli bo akali akufuta nubukalale bwa kuboghofya nu kubaghogha abamanyili ba Malafyale, akabuka ku Muputi usongo 2nukusuma abakalata ukuti abuke nabo munyumba sya kwiputilamo, umwakuti pala angabagha bamo bo bakukonga isila yiyiyo, abanalume pamo abakolo, abapinye nukwisa nabo ku Yelusalemu.
3Bo ali musila akupalamila ku kaya ka Damasika umwakukenusya bubu ubwelu bwa kufuma kumwanya bukamubalila. 4Po akawa nukwifwa isyu likuyugha likuti, “Sabuli, Sabuli, choni cho ukufwima?”
5Po akalalusya akati, “Imba we wenu, Malafyale?” Akamula akati, “Ne Yesu yo ukumufwima, 6loli nyamuka nukubuka mukaya akakulu ngani, mo bakwisa pakukubusya syo ubaghile pakubomba.”
7Abandu bo bakendagha nu Sabuli bakimilila bo syasoba isyakuyugha, bakifwa isyu loli batakamutesya nayumo. 8Po u Sabuli akanyamuka ukufuma pasi, loli bo amaso ghighuka, atakatesya nachimo. Po bakamukola panyobe nu kubuka nawe mu Damasika. 9Po akikala amasiku matatu ukusita ukutesya, sona atakalya pamo ukung’wa chimo.
10Loli akabako umumanyili yumo mu Damasika yo akaba we Ananiya. Po u Malafyale akamwitisya muchisetuka ukuti, “Ananiya!” Akamula akati, “Indi pano Malafyale.” 11U Malafyale akamubusya akati, “Nyamuka buka kusila yo bakuti ingoloke, po munyumba ya Yudasi uye ubusikisye umundu yumo ilita lyake we Sabuli, uwa ku Talisa, ali pakwiputa, 12po akamutesya umundu muchisetuka ilita lyake Ananiya, isa nukumubika inyobe ukuti atesye sona.
13U Ananiya akamwamula akati, “Malafyale, nifwa ukufuma ku bandu abingi bo bambusya nisya mundu uyu, ukuti akababombelagha ububibi abandu bako abikemo mu Yelusalemu, 14po apeghiwa amaka na balongosi ba baputi agha kubapinya bosi bo bakwitisya ilita lyako.
15Loli u Malafyale akamubusya akati, “Bukagha, pakuti namusala pakuba chibombelo changu, icha kufumukisya ilita lyangu ku bapanja na ku banyafyale na ku bandu ba mu Izilayeli. 16Pakuti une ngwisa pakumulangisya syosi indamyo syo abaghile pakutamiwa chifukwa cha lita lyangu.”
17Po u Ananiya akabuka nu kwingila munyumba mo mukaba u Sabuli nukubika inyobe yake papake. Akati, “Wamwitu Sabuli, u Malafyale u Yesu, yo akakubonekela musila bo ukwisa, anduma ukuti utesye sona, nu kwisula nu Mbepo Mwikemo.” 18Papapo na papapo utundu tumo tukawa mumaso to tukaba ngati tupapa twa swi, po akanda pakutesya sona, akanyamuka nukosiwa, 19bo alya ichakulya, akakaba amaka ghake.
U Sabuli akulumbilila mu Damasika
Po u Sabuli akaba poka na bamanyili mu Damasika amasiku ghamo. 20Po pala pala akanda pakulumbilila munyumba sya kwiputilamo ukuti u Yesu Mwana wa Chala.
21Po bosi bo bakamwifwa sisisi, bakaswigha nukulalusya ukuti, “Ate weyuyo yo afulungannya mu Yelusalemu ku bosi bo bakwitisya ilita lilili? Imba atisile kuno kumbombo yila yila iyakubapinya abandu nukubabika munyobe sya baputi abasongo?”
22Loli ubulumbili bwa Sabuli bukendelela pakukula mu maka, umwakuti chikabamala ngani amahala aba Yuda bo bakikalagha mu Damasika pakubasimikisya ukuti u Yesu we Kilisitu.
23 #
2 Kol11.32. Bo ghendapo amasiku amingi, aba Yuda bakapangana ukuti bamughoghe u Sabuli, 24loli u Sabuli akasimanya syo bakifwana mulubatiko lyabo. Po bakamulindililagha mumilyango yalupaso umusanya nu busi ukuti bamughoghe u Sabuli, 25loli abamanyili bake bakamusenya ubusiku, nukumwingisya muchitundu ukwendela pibwindo lyo likaba palubumba lwa lupaso.
U Sabuli mu Yelusalemu
26U Sabuli bo afika ku Yelusalemu akaghela pakongana na bamanyili, loli bosi bakamoghopa, pakuti batakasubilagha ukuti akaba mumanyili. 27Loli u Balanabasi akamusenya nukubuka nawe ku batumiwa. Akabalingannya mo u Sabuli akamutesekesya u Malafyale musila, yo akayugha nawe ukuti mu Damasika akalumbililagha nu bukifu mwilita lya Yesu. 28Po u Sabuli akikala nabo poka nukwenda mu Yelusalemu mosi pakuyugha nubukifu mwilita lya Malafyale. 29Akayugha nu kususannya na ba Yuda bo bakayughagha ichigiliki, loli bakaghesya pa kumughogha. 30Bo abitiki basyaghanya, bakamusenya u Sabuli nukubuka nawe mu Kesaliya nukumutuma ku Talisa.
31Po ichipanga cha mu Yudeya, mu Galileya, na mu Samaliya mo kakaba kabalilo ka mutende nukwendelela pakumwiputa u Malafyale, sona nu Mbepo Mwikemo akachikasya nukuchafwa pakukula, po chikaba chakumoghopa u Malafyale.
U Pitala mukaya ka Lida nu Yopa
32Bo u Pitala akwenda posi na posi akabuka pakubendela abandu aba Chala, akisa afika na ku ba Kilisitu bo bakikalagha ku Lida. 33Kula kula akamwagha umundu yo akaba we Eneya, yo akalemala sona akaghona pachitala ifinja Eyiti. 34U Pitala akamubusya akati, “Eneya, u Yesu Kilisitu akuposya, nyamuka alula ubulili bwako.” Po akanyamuka papapo na papapo. 35Po bosi bo bakikalagha mu Lida na mu Shaloni bakamutesya, nu kupindukila kwa Malafyale.
36Loli mu Yopa mukaba umumanyili umukolo yumo yo akaba we Tabita, lyo likughanamula ukuti Dolikasi, umukolo yuyuyu akabombagha imbombo inyisa akabalilo kosi, sona akabafwa abapina. 37Po pakabalilo kala kala akabina nu kufwa, umufimba wake bakaghosya nukughulambalika muchipinda cho chikaba pamwanya pa chinine. 38Pakuti akaya ka Lida kakaba papipi nakaya ka Yopa, abamanyili bakifwa ukuti u Pitala ali mu Lida, po bakabatuma abandu babili namasyu aghakuti, “Twalamba, endelela wise kuno.” 39Po u Pitala akanyamuka nukubuka poka nabo. Bo afika, bakabuka nawe kuchipinda ichapamwanya, mo abafwilwe bosi bakamubunganila nukulila, sona bakamulangisya amalaya nifyakufwala fyo u Dolikasi akasonagha bo akali mumi. 40Loli u Pitala akabafumya bosi kusi, akafughamila pasi nukwiputa. Akaghalabukila ku mufimba nukuti, “Wee Tabita, nyamuka!” Po akighula amaso ghake, bo amutesya u Pitala, akanyamuka nukwikala. 41Po u Pitala akamukola inyobe nu kumunyamusya, po akabitisya abitiki bosi, poka nabafwilwe nukubalangisya u Tabita umumi. 42Akapango kakasata mu Yopa mosi, po abandu abingi bakasubila mwa Malafyale. 43U Pitala akikala amasiku amingi mu Yopa mu nyumba ya Simoni umufukuta makwela.
လက္ရွိေရြးခ်ယ္ထားမွု
Imbombo 9: SSTP
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ