Imbombo 5
5
U Ananiya nu Safila
1Loli umundu yumo ilita lyake akaba we Ananiya, yo poka nu mukasi wake u Safila bakaghulisya umughunda wabo ghumo. 2Loli akifwana nu mukasi wake, nukusabulapo indalama simo syo bakaghulisya umughunda wabo nukubapa abatumiwa syo sikasyala. 3Po u Pitala akamubusya akati, “Imba Ananiya, choni cho ukamwitikisya u Satana ukuti ingile mumoyo wako nukumusimbula u Mbepo Mwikemo pakusabulapo indalama simo syo ukaghulisya umughunda wako? 4Bo utaghulisisye umughunda ghula ghula, imba ghutakaba wako? Sona bo waghulisya, imba indalama sitakaba syako? Po choni cho ukinong’ona pakubomba sisisi? Utakabatamandila abandu, loli wamutamandila u Chala.”
5Bo u Ananiya ifwa sisisi, akawa pasi nu kufwa. Sona ubogha bukabakola ngani bosi bo bakifwa sisisi. 6Po abalumyana bakanyamuka nukughunnyembetela umufimba wake, bakanyamula nukubuka nagho pakusila.
7Bo pakilapo ama awala matatu, wepe umukasi akingila mula mula ukusita kusimanya syo sikabombiwa. 8Po u Pitala akamulalusya akati, “Mbusya, imba ghogho mutengo mwaghulisisye umughunda winyu? Po akamula akati, “Inga, tukaghulisya pa mutengo ghughugho.”
9Po u Pitala akamubusya akati, “Imba choni cho uwe nu mulume wako mukifwana pakumughela u Mbepo uwa Malafyale? Ifwa umulindo ghukwifwika pa mulyango, wabalumyana bo bali pakusila umulume wako, sona bakwisa pakunyamula nuwe!” 10Papapo na napapo akawila mufinama fya Pitala nukufwa. Po abalumyana bakingila mula mula, bakagha afwa kale. Po bakamunyamula nukubuka nawe pakusila pambali pa mulume wake. 11Ichipanga chosi na bosi bo bakifwa sisisi, ubogha bukabakola.
Ifika ni fiswigho
12Ifimanyilo ni fiswigho fikabombiwa mu bandu ni nyobe sya batumiwa. Po bosi bakaba nu moyo ghoka mu mbenu ya Solomoni. 13Atakabapo nayumo yo akaba mukifu umoyo ukulumikisannya nabo, loli abandu bakabaghindika ngani. 14Loli ubwingi bwa bandu bukongelelapo ku kabukutila kachilundilo cha banalume na bakolo bo bakamusubila u Malafyale, 15umwakuti bakabanyamulagha ababine pakubuka nabo mumbali mu tusila, babalambalikite pa fitala na mumabulili, umwakuti umusyesye wa Pitala ghungabawila bamo bo akapulusannya. 16Po sona ichilundilo cha abandu chikisa chabungana poka ukufuma mutwaya utukulu to tusyunguliwe nu Yelusalemu, bo bakwisa nababine, nabo bakaba nimipepo imibibi, po bosi bakapola.
Abatumiwa bakufwimiwa
17Po umuputi usongo poka na bosi bo akabanabo aba mukabukutila ka ba Sadukayi bosi, bakisula nakabini. 18Bakabakola abatumiwa nukubighalila mujela. 19Loli ubusiku bula bula uwandumi wa Malafyale akighula imilyango ya jela nu kubafumya panja, nu kubabusya ukuti, 20“Bukagha nu kwimilila mu nyumba ya Chala nu kubabusya abandu nisya bumi ubupya.” 21Bo bifwa sisisi, bakingila mu nyumba ya Chala pangelo ngelo nu kwanda pa kumanyisya.
Po umuputi usongo na banine bo akaba nabo, akabungannya abalongosi ba Chiyuda poka na basongo bosi aba mu Izilayeli ku lukomano ulwa balongi, po bakabatuma abandu kujela ukuti bise nabo abatumiwa pamaso papabo. 22Loli bo abandu bala bafika, batakabaghamo mujela, po bakanyokela nukubabusya abalongi ukuti, 23“Bo twafika kujela, tukayagha yighaliwe ngani, sona bope abalindili bakaba maso pamulyango, loli bo twighula, tutakamwaghamo nayumo mukati.” 24Bo bifwa amasyu ghagha, umulindili wa Nyumba ya Chala na balongosi ba baputi, bakalangana ngani nu kuswigha ukuti syabombiwa buli sisisi. 25Po akisa yumo nukubabusya ukuti, “Tesya, abandu bala mukababika mujela bali mu Nyumba ya Chala bimilile nu kumanyisya abandu.” 26Po umulindili akabuka poka na bandu bake pakubasenya abatumiwa. Loli batakabombesyapo amaka, pakuti bakoghopagha abandu ukuti bangabakoma namabwe.
27Bo bisa na batumiwa mula mula, bakabimika pamaso pa balongi, po umuputi usongo akabalalusya akati, 28“Tukabakanisya ngani ukuti mutakamanyikisye mwilita ili, po tesya, mwisusya akaya kosi nifimanyilo fyinyu, sona mukulonda pakubika ibada lya mundu uyu papitu!”
29Po u Pitala na batumiwa bamo bakamula bakati, “Tubaghile ukumwifwila u Chala ukukila abandu. 30U Chala wa banyenya witu akamususya u Yesu, yo umwe mukamughogha nukumupayika pambinjika. 31U Chala akamukwesya ninyobe yake indilo ukuti abe mulongosi sona mupoki, ukuti abape ulupinduko aba Izilayeli nu kuhobokeliwa ku mbibi syabo. 32Po utwe twe bakamboni kufindu fififi, sona nu Mbepo Mwikemo, yo u Chala akabapa bosi bo bakumwifwila.”
33Loli bo abalongosi ba Chiyuda bifwa sisisi, bakakalala ngani nu kulonda ukuti baghoghiwe. 34Loli umu Falisayi yumo yo akaba we Gamaliyeli, umumanyisi wa ndaghilo, yo akaghindikiwa ngani na bandu bosi, akimilila nu kulamula ukuti abatumiwa babafumye kusi pakabalilo kapala bubu. 35Po akababusya akati, “Mwee ba mu Izilayeli, muchebe nasyo mukulonda pakubabombela abandu bababa. 36Pakuti mumasiku aghakunyuma u Teyudasi akabonekela, akiyugha mwene ngati wapamwanya, umwakuti abandu papipi ngati folo handeledi bakamukongagha, loli akaghoghiwa, sona abakongi bake bakanyambana, po akabukutila kake kakamala pala pala. 37Panyuma pa uyu, u Yudasi uwa mu Galileya akaboneka pakabalilo ko abandu bakasimbisyagha, akabannyengelela abandu ukuti bamukonge. Loli wepe akaghoghiwa sona bosi bo bakamukongagha bakanyambanika. 38Pololi, ipano ngubabusya ukuti mutakababombele nachimo abandu bababa. Mubaleke babuke, pakuti pala syo babatikite pamo ukubomba sikufuma ku bandu, bakwisa pakupotwa, 39#Luk21.15. loli pala sikufuma kwa Chala mutangabapota, mukwisa pakwaghiwa mwebene ukuti mukulimbana nu Chala!”
Abalongi bakifwila syo u Gamaliyeli akayugha. 40Po bakabitisya abatumiwa ukuti bingile mula mula, bakabasyemba nu kubakanisya ukuti batakayughile sona mwilita lya Yesu, po bakabasatula. 41Po abatumiwa bakafumapo pamaso gha balongi, bakahoboka ukuti babaghile ukutamiwa chifukwa cha lita lya Yesu. 42Po amasiku ghosi, mu Nyumba ya Chala na munyumba sya bandu batakaleka pakumanyisya nu kulumbilila Amasyu Amisa ukuti u Yesu we Kilisitu.
လက္ရွိေရြးခ်ယ္ထားမွု
Imbombo 5: SSTP
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ