Mariko 4
4
Chitotie na mzabibi mbeyu
Matayo 13:1-9; Luka 8:4-8
1Yesu ekalholhoshi kuhinya kahali are kakera he iziwa la Galilaya. Ifyo igiru la vahe leemjunguluke ekaaho abuu he mashua na kuzokodi ata. Vahe kabuna vekakhwa vezokodie kakera he iziwa. 2Evahinyie mburi kumure kwa mitotire, he mahinyo kuu ekavaba.
3“Lhahonaini mzabibi mbeyu muwe esoe kuzabibi mbeyu he mbuva. 4Areakhwa ebibi mbeyu he mbuva, mbeyu hali jeelhue kwalhi, vuhimeno vukalita vukajia. 5Mbeyu hali jeelhuie he ighamba, helo mpulhe usi mkumure. Ka mbeyu jikamangali kwaite teheelo mpulhe mkumure ana he ighamba. 6Mira iaze lireasaisha, mbeyu jikanyuluka, kwaite majindo kuu teesoishe di, mbeyu ikahala. 7Mbeyu hali jelhue he milhae, ka milhaei irelheru ikafinha ka mbeyu, kwato tejisae. 8Mira mbeyu hali jeelhue he mpule mkulho, mbeyu jikalheru jikasa mpuluzi, mbeyu we ikasa mhuluzi sarasini, we ikasa matizu na hali ikasa mia we.”
9Niho Yesu ekavaba, “Mhe elo malama ya kuko nako!”
Chiroe ahinye kwa mitotire
Matayo 13:10-17; Luka 8:9-10
10Yesu areakhwa salaghe, vahina ikhado na vanu na vahe vahali veeaha hawe nau, vekamlhasu “Chiroe uhinya kwa mitotire ni kiakhoni?” 11Yesu ekavaba, “Kuni mwaaowe kuile mburi jikumatuwe he Udilao wa Kiumbi. Mira hu veaha gahana, vekoiya kira kigi kwa mitotire, 12kalo,
Kai venewesia, vawesie mira vasiakho.
Kai veneko, vako mira vasiile.
Kai veeilie, veseemuru kumkiriia Kiumbi,
Nau esevakaaiya makusa kini.”
Yesu etayoiya mburi ya mtotire wa mzabibi mbeyu
Matayo 13:18-23; Luka 8:11-15
13Niho, Yesu ekavalhasu, “Ho kune temuilie mtotiano udumu kiakhoni? Iji, mnemuru kimomo, kuila neri mtotiano? 14Mbeyu ilhawe ni mzabibi ni Kiome cha Kiumbi. 15Vahe vahali vetotiye na mpulhe uaha kwalhi. Vekuko bi kiome cha Kiumbi, Shetani etalita na kukaa ka kiome cha Kiumbi chiaha he swaho kini. 16Vahe vahali vetotiye na mpulhe uaha he ighamba, vekuko kiome cha Kiumbi, vechidoria nakawe kwa kulhamuiwa. 17Mira tevechibutu he swaho kini, kwaite vetotie na mbeyu jisilo majindo. Ka kiome vechidara madamo magitutu bi, madamo kharo jikuraliijanya kwaka kiome cha Kiumbi, vetaro kuchidarisha nakawe. 18Vahe vahali vetotiye na mpulhe uaha he mikhatu ya milhae. Veko nakudoria kiome cha Kiumbi, 19mira bughu ja mifufuire ya idi, kudumu mari na mhayo wa kudumu vigi vihali utabuu he swaho kini, na kuboi vahe vasimuru kudara kiome cha Kiumbi, na kuchiboiya nyamalo. 20Mira vahe vahali vetotiye sa hu mpulhe mkulho. Vo veko kiome cha Kiumbi, nakuchidaria na kusa matunda, we isa salasini, hali sitini na hali mia we.”
Mtotire wa Kijari
Luka 8:16-18
21Yesu ekacheri kuvalhasu, “Ho, mheekati kijari na kuchike za na kuchikubika kwa kore hile kuchike shanja? Hai! Echike ana he lushagha. 22Kwaite, kira kigi chimatuwe chineahoika, na kira kigi chighubikwe chineghubulwa. 23Elo malama ya kuko, ako!”
24Wato oto munevaboia vahe vahali, nirewato Kiumbi enemuboia kuni. 25Kwaite elo kigi enesusuwa kihali, mira esilo kigi, neri hu kigitutu cho elo nacho enelawa.
Mtotire sa mbeyu ili
26Yesu ekacheri kuyo ekaba, “Udilao wa Kiumbi utotie sa mheelha mbeyu he mbuva. 27Ekufi kujilha, Naama etabodi, hachakako eaha maila, madamo ka mbeyu jitali na kulheru, neri u teila ite jilherue kimomo. 28Mpulhe salaghe ulhaari mbeyu kuli, kulheeru na kusa matunda, bosi itagu makhupi makenye, igu kireli, naho itasa. 29Mpuluzi jikuasi, niho mheeso na nyingo kurashumu, kwaite madamo yakulojwa yaahe.”
Chitotie na mbeyu ya haradali
Matayo 13:31-32,34; Luka 13:18-19
30Yesu ekayo kahali ekaba, “Udilao wa Kiumbi tuutotije na kiakhoni? Tuusimoreje kwa utoti mina?” 31Utoe sa mbeyu ya haradali, mbeyu gitutu kuro mbeyu hali kabuna jilhawa he mbuva. 32Mira ikulhawe italheru na kukhwa mhatu mgiru kutakho vikhabuna vilhawe he mbuva. Matambi kuu etakhwa magiru na vuhimeno vutalita kukwa mashasha kini ata.
33Yesu eyoe kwa mitotire mikumure, madamo ka ekuvabirikiria vahe, eeyoe navo sacho venemuru kuile. 34Teyoe navo neri kigi esiyoe mtotire, mira eeaha na vahina kuu ekavabaya kira kigi kuli heka mitotire.
Yesu etailhiija nkunkunho ya mai giru isivumire
Matayo 8:23-27; Luka 8:22-25
35Muaze wa kaa ka chamagheri, Yesu ekavaba vahina kuu, “Tutakho tuso twai chauju he iziwa.” 36Niho vekaliro hu ifyo la vahe, vahina kuu vekabuu he mashua ho Yesu eaha vekaso nau, vahe vahali vekadori mashua hali vekamliaha. 37Hekamangalita saa girusha hawe na nkunkunho ya mai ikaihinka hu mashua, mashua ikalholhoshi kuhu mai. 38Yesu eaha are mzungure he mashua eeie he kanagho, vahina vekamkaa na kumba, “Mhinya tuilie ite tutaga?”
39Yesu ekaka, ekailhiija hu saa giru ekaiba “Uma!” “Ro” Saa ikauma na hekakhwa hakulho. 40Niho, Yesu ekavalhasu vahina kuu, “Kwaakhoni mweebughenu? He, temunidarishe?”
41Vekabugheno, vekalhasuana, “Ya mhe niji, ekoiwa ni saa na nkunkunho ya mai!”
လက္ရွိေရြးခ်ယ္ထားမွု
Mariko 4: NTMBL2025
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The New Testament in Mbugu @The Word for The World International and Mbugu Language translation, 2025. All rights reserved.