Matayo 26
26
Vahe vetadaa kwalhi ya kumdara nakumgaa Yesu
Mariko 14:1-2; Luka 22:1-2; Yohana 11:45-53
1Yesu areafiriti kuhinya ka mburi khabuna, ekavaba vahina kuu, 2“Mureila ite yekunetakho maaze manu henekhwa na elha ya Pasaka, naho Muinyi wa Mhe eneotijwa he vahe vemsanuia aremawa misumari he msaraba.” 3Niho vagiru va muaresi hawe na vaagiru vazime vekasahe he minda ya mgiru wa vearesija ilhe kuu ni Kayafa. 4Vekadaa kwalhi ya kumdara nakumgaa Yesu. 5Mira vekaiseko ite, “ Ka mburi tusiiboi to he muaze wa elha ya Pasaka, kwaite venegera aku he vahe.”
Mlage muwe etamsuiya Yesu malhoma are Betania
Mariko 14:3-9; Yohana 12:1-8
6Yesu eeaha Betania he minda yakwe Simoni hu eeloo lukoma, 7Heka madamo Yesu eezokodie ekua viaghu vya chamagheri, mlage muwe ekalita na nyhupa iboiiwe kwa isaheru lisewe Alabasta ihue malhoma ya mihaku mikumure yesumu kikulho ekailha ka nyhupa ekamsuiya Yesu he mua. 8Mira vahina kuu vareakho to vekasanuiwa, vekalhasu, “Kwaakhoni eoni ka malhoma ya mihaku mikumure to? 9Ya malhoma yeseedidiwe kwa mihaku mikumure naho ka mihaku vekaowe vahuye.” 10Yesu ekakhwa eilie cho veekuyo, ekavaba, “Niakhoni mumnyamarisha ya mlage? U aaniboia mburi kulhosha. 11Kwaite vahuye munekhwa navo maaze makhabuna, mira temkakhwa naani maaze makhabuna. 12Areanisuiya malhoma he msa gho eekutaboiya kikulho kwa mburi ya muaze gho wa kurakewe he mbira. 13Kweri nimubaya, kira hodi henebirikirwa Mburi Kulho he idi ikhabuna, ya mburi eboie ya mlage, nayo ineyowe kwa kuhulhawe kuu.”
Yuda aadumu kumkherii Yesu
Mariko 14:10-11; Luka 22:3-6
14Kwato muwe wa vahina ikado na vanu esewe Yuda Isikariote, ekaso he vagiru va vearesija, 15naho ekavalhasu, “Munenio kiakhoni nikunemkherii Yesu he kune?” Vekamtaria vikhao salasini vya madini mihaku. 16Kulholhoshi ata Yuda Iskarioti ekakhwa edaa madamo makulho yeneye kumkherii Yesu.
Yesu etaa viaghu vya elha ya Pasaka hawe na vahina kuu
Mariko 14:12-21; Luka 22:7-13,21-23; Yohana 13:21-30
17He muaze wa bosi wa elha ya mikate isibutuwe hamira, vahina vakwe Yesu vekamliaha Yesu, vekamlhasu, “Udumu turekuboia le ho uneaiya viaghu vya elha ya Pasaka?” 18Ekavaba, “Soni he mhe muwe are he muang'a muremba,” “Mhinya etetusugha ekuba ite, madamo gho yaahe sina nineaiya viaghu vya elha ya Pasaka hawe na vahina gho he minda kechi.” 19Kwato vahina vekaboi sahucho Yesu evabae, navo vekarake kikulho mburi ja elha ya Pasaka. 20Hareahe chamagheri, Yesu ekazokhodi hawe na vahina kuu ikado na vanu veekua viaghu. 21Vareakhwa vea viaghu, Yesu ekavaba, “Namubao, mhe muwe he kune enenikherii.” 22Vahina kuu vekadarwa ni vuhuye vugirusha, vekalholhoshi kumlhasu, muwe muwe, “Dilao hile niani?” 23Yesu ekavaba, “Hu eginhie he ibakuri mkate hawe naani, niu enenikherii. 24Muinyi wakwe Adamu eneso he Kiumbi sakigi egondiiwe. Mira henekhwa na manyamarisho hehu muhe enemkherii Muinyi wa Muhe, cheseekhwa ni keba ka muhe teseeakhoike.” 25Niho Yuda, huye eedumue kumkherii Yesu ekamlhasu Yesu ekaba, “Mhinya hile niani?” Yesu ekamba, “Ari waayo.”
Viaghu vyakwe Dilao vitalholhoshijwa
Mariko 14:22-26; Luka 22:14-20; 1Vakorinto 11:23-25
26Ata veekua, Yesu ekadori mkate, ekamba Kiumbi hongera, ekaubendula, ekavao vahina kuu ekuba, “Dorini mua, yawo niu msa gho.” 27Naho ekadori kikonho chilo divai, ekamba Kiumbi hongera, ekavao ekuba, “Wahani vakhabuna heya kikonho cha divai. 28Ya niu sako gho iaija Iaghano la Kiumbi na vahe vakumure, huyo isuika kwa mburi ya vahe vakumure kwa kuvakaia makusa.” 29Mira nimubaiya, kuli waijiji sikawaha divai kahali kuli heya matunda ya mzabibu sari he muaze wo ninewaha divai kuale na kune he Udilao wakwe Aba mgho. 30Vareafiriti kufaru lufaru, vekali na kuso he lubwa lwa mizeituni.
Yesu etarota ite Petro eneyo ite tem'ilie
Mariko 14:27-31; Luka 22:31-34; Yohana 13:36-38
31Niho Yesu ekavaba, “Kiama cha wai munenigugulu,” Kwaite Magondo ya Kiumbi yeba, “Kiumbi enemma mzemo, na maalu heka ifyo yeneparaa. 32Mira nikuneka kuli he kigame, ninemukaeya kuso Galilaya.” 33Petro ekakaa muo ekaba, “Mira kai vakhabuna venekugugulu, ani sikakuro neri.” 34Yesu ekamba Petro, “Nakubao ii neri nkuruve isinazo kiama cha wai, unekhwa waayo kagi kakai ite tuniilie.” 35Mira Petro ekaba, “Kai ninedumuwa kuga hawe naari, mira sikakulhi neri.” Na vahina vahali vekayo sato.
Yesu etaaresi are he kaseu Getisemane
Mariko 14:32-42; Luka 22:39-46
36Yesu hawe na vahina kuu vekaso hodi hesewe kabuva ka Getisemane, ekavaba, “Fufuni ii madamo ya ani nitaso twai kuaresi.” 37Ekavadori Petro hawe nahu vainyi vanu vakwe Zebedayo, nau ekalholhoshi kuhuyeti na kuhirisha swaho. 38Niho Yesu ekavaba, “Swaho gho ihuye vuhuye itahe sina na kuga. Fufuni ii naho muzokho maila hawe naani.” 39Ekaso kakara hagitutu, ekalhuya maso nakuaresi ekuba, “Aba gho, kai chimuruika, ya kikonho cha kharo chisiniheye, mira chisikhwa sacho nidumu ani mira hucho udumu ari.” 40Niho ekakirii hehu vahina vakai ekavaheiya vebodie, ekamlhaasu Petro, “Ho, kune vakai mutekwasiwe kukhwa maila hawe naani neri kela we? 41Zokhoni maila naho muaresi museebuu he kugaliwe. Uhe udumu, mira msa teudumu.” 42Ekaso kagi kakanu kuraaresi, ekaba, “Aba gho, kai techimuruika ya kikonho cha kharo techimuruika kukaiwa hagho, iji cho udumu nachiboiike.” 43Arekirii, ekavaheiya vebodie kahali kwaite teveekumuru kukaa maila kini kwa luireno lugiru. 44Kwato ekavaro ekaso kahali kagi kakakai kuraaresi ekuyo viome wahuuhu. 45Naho ekakirii he vahina kuu ekavabaya, “Ho, murecheri ie na kufufu? Wesiani, madamo yaahe Muinyi wa Muhe enerowa adarawe he miharegha ya vahe velo makusa.” 46Kwato kani, tusoni, kwaite hu enenikherii elitie.
Yesu etadarawe
Mariko 14:43-50; Luka 22:47-53; Yohana 18:3-12
47Yesu areakhwa echeri yo, Yuda muwe wahu vahina ikado na vanu, ekahe eekaetiane na ifyo igiru la vahe vedarae mahamba na viboi veesughaiwe ni vagiru va kuaresija na vaagiru velo ugiru he vaibaraza. 48Muhe enemlhi Yesu eevaoye lhaa ite, “Huye ninemholu kwa miharegha minu niu, mdareni.” 49Niho Yuda ekamliaha Yesu naho ekamholu kwa miharegha minu ekamba “Nikuholu Mhinya” 50Yesu ekamba “Werewe, ari boi hucho ulitie kuboi ii.” Niho hu vahe vekahe sina, vekamdara Yesu vekamoro. 51Wato oto muwe wahu vahe veeaha hawe ne Yesu areakho to, ekadara sime kuu, ekaigu ekamma naho ekamte ilama mnyamalo wa Mgiru wa kuaresija . 52Niho Yesu ekamba, “Re sime kechi heiala kuu, kwaite vakhabuna vegaa vahe kwa sime venegaawe kwa sime. 53Ho, temuilie ite nimuru kumlhawa Aba gho ekamanganigeria maifyo ikado na manu ya vazasughawe vaare ana he Kiumbi? 54Mira iji Magondo ya Kiumbi yenefuru kimomo hu yeba ite chidumuwe kukhwa sato?” 55Niho Yesu ekalibaya hu ifyo la vahe, “Mulitie na mahamba na viboi kalo munidara sauraba ite ani ni mgwalo? Maaze makhabuna neeaha hawe nakune he Minda ya Kiumbi nikuhinya, kwakhoni temnidarae? 56Mira ya makhabuna yelijanye kalo Magondo ya varoto va Kiumbi yafuru.” Niho vahina kuu vakhabuna vekamro na vekagugulu.
Yesu etatiiwe he ibaraza la Vayahudi
Mariko 14:53-65; Luka 22:54-55,63-71; Yohana 18:13-14,19-24
57Hu veemdarae Yesu vekamtii he Mgiru wa kuaresija esewe Kayafa, hodi ho vahinya va miku yakwe Musa hawe na vaagiru veebungurue. 58Mira Petro ekamliaha ankau kwa uda sari he lukumbi lwa Mgiru wa Muaresi. Ekabuu za he lukumbi ekazokhodi hawe na vakilaaru kalo aakho chinelijanya. 59Kwato vagiru na vaagiru vazime na ibaraza ikhabuna vekadaa vahe vemuru kuyo lame kwamburi ya kwe Yesu kalo vamuru kumgaa Yesu. 60Mira teveakhoe mburi neri, hawe na ite veelitie valame vakumure. Niho vekalijanya vahe vanu venemuru kuyo vigi vya ulame, 61vekaba, “Ya muhe eebae ite, ‘Nimuru kupu Minda ya Kiumbi na kuikwa kahali he maaze makai.’ ” 62Niho Mgiru wa Muaresi ekauma na kumba Yesu, “Ho, ari tulo cha kuyo heya mburi ya vahe vejiyo?” 63Mira Yesu ekataa chwi. Niho Mgiru wa kuaresija ekamba, “Kwa ilhe la Kiumbi efufu, tubae kai ari niu Kiristo, Muinyi wa Kiumbi.” 64Yesu ekamba, “Niari uyo. Mira nitamubaiya kune vakhabuna, kulholhoshi waijiji munemuakho Muinyi wa Muhe ezokhodie bwa wa sughano wahu elo u, naho munemuakho ekulita kuli are ana hemalhareno.” 65Niho Mgiru wa kirurumo ekamangakha'a gomae kuu na kuba, “Aam'olhu Kiumbi! Niakhoni tudaijaa ukweri mhali? Wesiani waijiji kune mwaakho kacho eolhue. 66Kwato kune mubamo?” Vekamba, “Chidumuwe agaawe.” 67Niho vekambusuya mapae he vubasa na vahali vekamma nkundi. Vahali vekamma mazokhera, 68naho vekaba, “ Ari Kiristo, rota ite, niji ekumae.”
Petro etamlhi Yesu
Mariko 14:66-72; Luka 22:56-62; Yohana 18:15-18,25-27
69Ka madamo Petro eezokhodie he lukumbi gahana. Mnyamalo muwe wa kilage ekamliaha ekumba, “Naari weaha hawe ne Yesu wa Galilaya.” 70Mira Petro ekalhi he vahe vakhabuna ekuba, “Siilie kacho uyo.” 71Areli gahana kuhe he luhige, mnyamalo mhali wa kilage ekamuakho, ekavaba vahe veeta to, “Ya muhe eeaha hawe ne Yesu Mnazareti.” 72Ekalhi kahali kwa kuapa ekuba, “Ani sim'ilie ka muhe.” 73Kalufunda hu veeumae to vekamliaha Petro vekamba, “Kweri ari um'aro kini, kwaite miyore kechi itoiyane navo.” 74Niho Petro ekalholhoshi kulapa ekuba , “ Kai naayo lame Kiumbi anikharoti, Sim'ilie ka muhe!” Wato oto nkuruve ikazo. 75Waata ata Petro ekahulha hu kiome eebaiwe ni Yesu ite, “Nkuruve isinazo, unenilhi kagi kakai.” Niho, ekali gahana, ekazo kwa vuhuye.
လက္ရွိေရြးခ်ယ္ထားမွု
Matayo 26: NTMBL2025
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The New Testament in Mbugu @The Word for The World International and Mbugu Language translation, 2025. All rights reserved.