Matayo 22
22
Mtotiano wa vagalho he elha ya kudori
Luka 14:15-24
1Yesu ekayo navo kahali kwa mitotiano ekuba, 2“Udilao waare ana he Kiumbi utotiane ne dilao muwe emboie muinyi kuu vighu vya elha ya kudori.” 3Kwato ekavasugha vanyamalo varevase verarikwe valita he elha, mira verarikwe vekalhi kulita. 4Niho ekavasugha kahali vanyamalo vahali, ekuba, “Vabaiyeni ka verarikwe ite, elha gho yaahe, naagaa churu na mili gho jigabie hawe na viaghu vikulho vyaadaawe pere, litani he elha ya kudori.” 5Mira vo vekafwa ka elha niho vekaso he mburi kini, muwe ekaso he mbuva kuu na mhali ekaso he nyamalo kuu, 6na vahali vemerisie vekavadara hu vanyamalo kuu vekavama na kuvagaa. 7Hu mgiru ekasanuiwa, ekavasugha vakilaaru kuu varevagaa ka vegaae naho vaulhaha ka muang'a kini. 8Niho ekavaba ka vanyamalo kuu ite, “Viaghu vya elha ya kudori vyadaawe pere, mira verarikwe teveye kubuu heya elha. 9Iji soni hebalabala naho ka munevaheya vararikeni ite valita heviaghu vya elha ya kudori.” 10Hu vanyamalo vekali, vekaso he kwalhi, vekavagera vahe vakhabuna, vakusa na vakulho. Minda ya elha ya kudori ikahu vagalho. 11“Mgiru areabuu kuvawesia vagalho, ekamuakho mhe muwe esioroe gomae jahe elha.” 12Mgiru ekamlhasu, “Msaho, ubuiye kimomo ii usilo gomae ja elha ya kudori?” Mira ka muhe teandue. 13Niho ata dilao ekavabaya vanyamalo, “Muoroni mulhu he masame na miheregha murembibi are gana he kidughu are enezo na kushagha maiki.” 14Yesu ekafiriti kwakuba, “Verarikwe ni vakumure mira velhoijwe ni vaghere.”
Kulhanu kodi
Mariko 12:13-17; Luka 20:20-26
15Niho Mafarisayo vekali gahana, vekaiseko hucho venemdara Yesu kwa viome kuu. 16Kwato, vekavasugha vahina kini hawe na vasaho vakwe Herode. Vekamlhasu Yesu vekumba, Mhinya, tureile ite ari umuhe mkulho, naho ite uhinya kwalhi ya Kiumbi kwa ukweri neri tumbughenu muhe, kwaite ugiru wa muhe heari si kigi. 17“Tubaiye iji kutoti kechi. Ho, chiye hile hai, kulhanu kodi he Kaisari?” 18Mira Yesu ereile ukusa kini, ekavaba, “Kune vakusa mukuboi muvakulho kwaakhoni munitegha? 19Niaijani igongolo la kulhanuiya kodi.” Navo vekamguiya igongolo la mhaku. 20Yesu nau ekavalhasu, “Ya vubasa naya ilhe nivyakweji?” 21Vekamba, “Ni yakwe Kaisari.” Niho Yesu ekavaba, “Muoni Kaisari chiye kumuo, nayakwe Kiumbi muoni Kiumbi.” 22Vareako to vekamaka vekamro, vekahaka.
Mburi ya kuka kuli he kigame
Mariko 12:18-27; Luka 20:27-40
23Muaze wahuuhu, Masadukayo, vahe vedarisha ite tehelo kuka kuli hekigame, veedumue kumlhasu Yesu vekamliaha, 24vekamba, “Mhinya, Musa eebae muhe edorie ekuga esiroe muinyi, chidumuwe mbakhu kuu amdori ka mlage egaiwe ni muagiru kalo amwakhoiye vainyi mbakhu kuu agae. 25Iji, ii hakanu heelo vabahu saba. Wabosi edorie mlage naho ekaga neri esiakhoiwe vainyi nika mlage, mbakhu kuu ekampala ka mlage egaiwe ni muagiru. 26Chikarakhwa wato oto he mbakhu wa kanu, na wakakai, sari wa saba. 27Ka vabakhu vakhabuna vareaga, hu mlage nau ekaga. 28Ho hu muaze wa kuka kuli he kigame ka mlage enekhwa mlage wakweji hehu vabakhu saba? Kwaite vakhabuna saba veemdorie.” 29Yesu ekavaba, “Kune muboi visiye kwaite temuilie magondo ya Kiumbi neri umuruisho wa Kiumbi. 30Kwaite vegae vekuneka tevekadori neri kudoriwe, venekhwa sa vazasughawa va areana he Kiumbi kwaite tevedori neri kudoriwa. 31Mira kwa mburi ya kukaawe vegae, he kigame, temusomie hucho mubaiwe ni Kiumbi? Eemubae ite, 32‘Ani ni Kiumbi wakwe Ibrahimu na Kiumbi wakwe Isaka na Kiumbi wakwe Yakobo.’ Kwato, U si Kiumbi wa vavegae, mira ni Kiumbi wa vazime.” 33Hu ifyo la vahe lireako to likamakisha mahinyo kuu.
Miku giru
Mariko 12:28-34; Luka 10:25-28
34Mafarisayo vareako ite Yesu aavataija Masadukayo ka Mafarisayo vekaiseko vasahe hawe. 35Muwe wa Mafarisayo ee mhinya wa miku yakwe Musa, ekamlhasu Yesu kwa kumgali ekumba, 36“Mhinya, ni miku hama giru he miku khabuna?” 37Yesu ekamba, “Mdumuishe Dilao Kiumbi kwa swaho kechi khabuna namitotire kechi mikhabuna hawe na akiri kechi khabuna. 38Ya niu miku giru naho ya bosi. 39Miku haliwa giru saka niuya, ‘Umdumu muaro kechi sahucho ukudumuisha salaghe’. 40Miku khabuna yakwe Musa na mahinyo ya varoto va Kiumbi yelie heya miku minu.”
Kiristo niji?
Mariko 12:35-37; Luka 20:41-44
41Mafarisayo vareasahe hawe, Yesu ekavalhasu, 42Kune muakho kimomo he mburi yakwe Masia? Ni muinyi wakweji? Vekamba, “Ni muinyi wakwe Daudi.” 43Yesu ekavaba, “Kwato, chimuruika kimomo ite kwa umuruisho wa Saa wa Kiumbi, Daudi emse Kiristo Dilao?” Kwaite Daudi eebae,
44“Dilao Kiumbi eembae Dilao gho,
Zokhodi bwa gho wa sughano,
Sari nikunevamuru vankuru kechi.”
45Kwato iji, kai Daudi emse Kiristo “Dilao,” Emuru kimomo kukhwa muinyi kuu? 46Tehelo neri mhe muwe eandue, na kulholhoshi to tehelo eregali kumlhasu Yesu kigi kihali.
လက္ရွိေရြးခ်ယ္ထားမွု
Matayo 22: NTMBL2025
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The New Testament in Mbugu @The Word for The World International and Mbugu Language translation, 2025. All rights reserved.