Matayo 15
15
Mahinyo yelie he vakaka va azeto
Mariko 7:1-13
1Niho Mafarisayo na vahinya va miku yakwe musa vekalita kuli Yerusalemu, vekamliaha Yesu vekumlhasu ite, 2“Kwaakhoni vahina kechi teveliaha mahinyo yelie he vakaka kanu va azeto? Teveonhi miheregha sakigi chidumuwe vesinaa viaghu?” 3Yesu ekavaba ite, “Ni kwaakhoni kune temuwesia miku ya Kiumbi mira muwesiisha mahinyo kaghu salaghe?” 4Kwaite Kiumbi ebae, “Umko aba kechi ne lage kechi. Naho em'olhu aba kuu hile lage kuu, chidumuwe agaawe.” 5Mira kune muhinya ite mhe ekukhwa elo kigi cho eseemurue kumlhaari aba kini hile lage kini, mira ekaba, “Ya kigi chaaguwe he Kiumbi.” 6Kwato, tedumuwe kahali kumko aba kuu, kwakuboi to ka nicho mufwa mburi ya Kiumbi kwa kuliaha mahinyo kaghu salaghe. 7Kune vahe vakusa mkuakho vakulho, Isaya mroto wa Kiumbi nee mkweri to area murotia ite,
8Kiumbi eba, “Ya vahe veniko kwa viome bi,
Mira he swaho kini veata uda naani.
9Kuniaresi kini tekuye,
Kwaite mahinyo kini yeli he vahe.”
Mburi jimboi muhe asidumuijwe kumuaresi Kiumbi
Mariko 7:14-23
10Yesu ekase hu ifyo la vahe veeaha ata, ekavaba ite, “Lakhonhani kikulho, naho muile. 11Kigi chimboi muhe asidumuijwe kumuaresi Kiumbi sihu chibuu he muo, mira nihu chili he muo. Ka nicho chimro muhe asidumuijwe Kumuaresi Kiumbi.” 12Niho vahina kuu vekamliaha, vekamlhasu, “Ho, ureile ite Mafarisayo veesanuiwe kweri vareako viome kechi vyo weekuyo?” 13Mira Yesu ekavaba ite, “Kira mkhatu usilhawe ni Aba gho eaha ana, eneukaa 14Zokhoni uda naka Mafarisayo kwaite maila kini teyeakho, naho vevakaeti vahe velo maila yesiakho, kai muhe elo maila esiakho naho ekaeti muaro elo maila esiakho, vakhabuna vanu venefili he ikugha.” 15Petro ekaba, “Tubaiye kikulho ya mtotiano.” 16Yesu ekavalhasu ite, “Neri kune temuilie? 17Ho, temuilie ite kira chibuu he muo chiso he maso naho chiguwe gahana sa kisalo naho chitabuu hechoo? 18Mira hu chimli muhe he muo kuu, chilie he swaho kuu, naka nicho chimboi muhe asidumuijwe kumuaresi Kiumbi. 19Kwaite he swaho heli mitotire mikusa igera kugaa na udana na ugwalo na kumyoia mhe lame. 20Ya nijo mburi jimboi muhe asidumuijwe kumuaresi Kiumbi. Mira kua viaghu usionhiye miharegha tekumboi mhe asidumuijwe kumuaresi Kiumbi.”
Kudarisha kwa mlage wa Kaanani
Mariko 7:24-30
21Yesu ekahaka ata hodi ekaso ekarazokho sina na miang'a isewa Tiro na Sidoni. 22Niho ekasahe na mlage muwe kuli Kaanani ekalita ekamseisha, “Dilao, Muinyi wakwe Daudi, niakhoiya mbalamija, mualeta gho enyamarishwa ni mapepo.” 23Mira Yesu temandue kigi. Kwato vahina kuu vekamliaha, vekamba, “Mbae aso kwaite etatuliaha ilai etumaya gimbe.” 24Yesu ekavaba vahina kuu, “Kiumbi etenisugha nivalhaari bi he vahe va Iziraeli. Vetoe sa maalu yelahae kwalhi.” 25Niho hu mlage ekalita, ekama mamuro, ekamba Yesu, “Dilao, nikugogo unilhaari.” 26Yesu ekayo kwa mtotiano ekamba, “Techiye kudori viaghu vya vamilo na kuyabibiya madie.” 27Ka mlage ekamba,“Ni kweri, Dilao, mira madie nau yea viaghu vilhuye di kuli he meza ja madilao kini.” 28Niho iji Yesu ekamba, “Mlage, kudarisha kechi ni kugiru, naho chinekhwa sa kigi udumu.” Hu mualeta kuu ekau kela wakaaka.
Yesu etauti vahe vakumure
29Yesu ekali ata ekaso khakhera ya iziwa liaha Galilaya, ekakutu he lubwa, ekazokhodi. 30Vahe vakumure vekamliaha vekavagera vilemuna na velo maila esiakho na vesimuru kudaha na vesimuru kuyo na vahali vakumure vee varukhao, vekavake sina na masame kuu, Yesu nau ekavauti. 31Hu vahe vakumure vekamakisha vareakho vesimuru kuyo vekuyo na vilemna na vaautiwe na vesimuru kudaha vekudaha na velo maila yesiakho veakho vekalholhoshi kumuaresi Kiumbi u ekuaresiwe ni Vaizraeli.
Yesu etavao viaghu vahe erufu hai
Mariko 8:1-10
32Niho iji, Yesu ekavase vahina kuu, ekaba ite, “Nivaakhoia mbalamija ya vahe kwaite vaazokho na ani kwa maaze makai, neri teveae viaghu. Sidumu kuvaro vagale neri vesiae, vaseezalhu mshare are kwalhi.” 33Vahina kuu vekamba, “Ilai ho tuaha ni roro bi, tuneakhole viaghu vyakuvao vahe vakumure to?” 34Yesu ekavalhasu, “Mulo mikate mime?” Vekamba, “Tulo mikate saba na vusamaki vughere.” 35Kwato, Yesu ekavaba vahe vazokhodi. 36Ekadori hu mikate saba nahu vusamaki, ekamuaresi Kiumbi, ekavikakaanya, ekavao vahina, vahina navo vekavakakaaya vahe. 37Vakhabuna vekaa vekakhu, niho vahina vekahuti viteju saba vyahu viaghu vyeemerisie. 38Ka vahe veeaye nee vaagiru elufu hai, ukukaa valage na vainyi. 39Niho Yesu ekavasange ka vahe, ekakutu mashua, ekaso he idi la Magadani.
လက္ရွိေရြးခ်ယ္ထားမွု
Matayo 15: NTMBL2025
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The New Testament in Mbugu @The Word for The World International and Mbugu Language translation, 2025. All rights reserved.