Yohana 5
5
Yesu etamuuti esimuru kudaha
1Yesu arefi kuboi kayo are Kana, ekaso Yerusalemu he elha ya Vayahudi. 2Are Yerusalemu, Sina na luhige lusewa luhige lwa ialu, helo iziwa kwa Kiebrania lisewa Betizata, leejungulukwe ni malukumbi makoi. 3Ata he malukumbi heelo varukhao vakumure vezokhodie na vegae maila na vesimuru kudaha na veeholoje vekulaa mai yakuchuwe. 4Kwaite heelo madamo mzasughawe wa Kiumbi eekudimi, ekukuchu hu mai, mai ikufi kukuchuwa hu enekhwa wabosi kubuu, etautiwa kira urukhao wo elo nawo. 5Ata heelo muhe muwe eekuru kwa miko salasini na mnane. 6Yesu eremuakho ka mrukhao ebodie, ekaile ite ka muhe eerue kwa madamo makumure, ekamlhasu, “Ho, udumu kuutiwe?” 7Ka mrukao ekaba, “Dilao, ani silo muhe enibutu he iziwa madamo ekukuchwa, nikugali bi kubuu, muhe mhali etanikaeia nakumangabuu he kisima.” 8Yesu ekamba, “Ka uuma, udori inagho kechi uso.” 9Wa ata ata hu muhe ekau niho ekauma, ekadori inagho kuu ekadaha. Ya mburi yeboike Muaze wa kusaaboi nyamalo. 10Kwato vagiru va Vayahudi vekamba ka muhe eutiiwe, “Wai ni Muaze wa kusaaboi nyamalo, miku teikudumuija ari kutii inagho kechi.” 11Mira u ekavaba, “Hu muhe eniutie niu enibaye, dori inagho kechi, uso.” 12Vekamlhasu, “ Ho, niji ekubae dori inagho kechi uso?” 13Mira ka muhe eeutiwe teemuilie Yesu, kwaite Yesu eebuuye he ifyo la vahe vakumure. 14Iji, kalufunda Yesu ekamheia hu muhe emuutie he minda ya Kiumbi ekamba, “Iji waautiwe, usiboi makusa kahali, kalo usedarawe ni mburi kusa kuro huyo weelo nayo.” 15Ka muhe ekaso, ekavabaiya vagiru va Vayahudi ite Yesu niu emutiie. 16Kwaite Yesu eboiye ka mburi Muaze wa kusaaboi nyamalo, Vayahudi vekalholhoshi kumnyamarisha Yesu. 17Yesu ekavaba, “Aba gho eboi nyamalo maaze makhabuna, na ani nidumuwa niboi nyamalo.” 18Kwaka viome Yesu eyoe, vagiru va Vayahudi vekagali kudaa kwalhi yakumgaa Yesu, sikuoni bi miku ya Muaze wa kusaaboi nyamalo, mira ni hawe na kuba ite Kiumbi ni Abaghe, kwato aakuaghati ne Kiumbi.
Udilao wa Muinyi wa Kiumbi
19Yesu ekavaba “Nimubaya kweri, Muinyi temuru kuboi mburi sakigi edumu u mira eboi bi huyo eakho Abaghe ekuboi.” Kira chiboiwa ni Abaghe na Muinyi etaboi wato oto. 20Kwaite aba emdumue Muinyi, nau emuaija hu makhabuna yo eboi nau enemuaija nyamalo girusha ja kuboi kutakho ya, kalo nakune mumakishwe nijo. 21Sa kigi Aba evakaa vahe kuli he kigame nakuvao uzime, wato oto Muinyi nau evao uzime hu vo edumue. 22Neri Aba tempaaya muhe zamaro, mira emuoe Muinyi ugiru wa kupaaya vahe vakabuna zamaro, 23kalo vahe vakhabuna vamuru vamko Muinyi sa kigi vemko Abaghe. Esimko Muinyi temko Abaghe emsughaye. 24Nimubaya kweri, kira eko kiome gho na kumdarisha hu enisughaye elo na uzime wa maaze makhabuna. Tepaaiwa zamaro, iji tegae mira ni mzime. 25Nimubaya kweri, madamo elitiye, naho yaafi kuhe, vegaye veneko kiome cha Muinyi wa Kiumbi, na ka veneko venekhwa vazime. 26Sa kigi Aba niu kulholhoshi kwa uzime, niu kigi emuoe Muinyi kuu kulholhoshi kwa uzime wa maaze makhabuna. 27Kahaliwa aamuo Muinyi kuu ugiru wa kupaaya vahe zamaro, kwaite niu muhe wa kweri kuli ana he Kiumbi. 28Musimake ya mburi, kwaite madamo elitiye vakhabuna veaha za he mbira veneko kiome kuu, 29vakhabuna veneli za he mbira kini, ka veboiye makulho veneka kuli he kigame nakuowe uzime wa maaze makhabuna, nahu veboiye makusa veneka kuli he kigame nakuzamariwa.
Vemuahoye Yesu kwa maila
30Ani simuru kuboi mburi sakigi nidumu, nipaaya zamaro sakigi Kiumbi enibaiya, kwato zamaro gho nija kweri kwaite siboi sakigi nidumu, mira niboi sahu kigi hu enisughaye edumu. 31Kai niteyo yoniilie salaghe yo niyo teyesekhwae ya ukweri. 32Mira helo mhali eyo mburi ejiilie he ani, yeaji ite yoniyayo niya kweri, na ani nireile ite viome kuu nivya kweri. 33Mweesughaye vahe he Yohana, nau ekayo mburi ja kweri eilie he ani. 34Ani sidumu kuilikana kutakhoia he vahe veyo kuli hagho mira nimubaiya kune mburi jiyoiwe ni Yohana mzabatija kalo muguwe kuli he kharo. 35Yohana eetoe sa kijari chika na kugu luatame, na kune mwelhoje kulhamuiwa nika luatame kwa madamo maghere. 36Mira ani ninemubaiya mburi girusha jo niakhoe kutakho hu jakwe Yohana, kwaite hu nyamalo jo Aba enioe kalo niboi, jiaija ite aba enisughaye, lhaa ya jiaija ite Aba niu enisughae. 37Aba enisughaye u salaghe aaniyoiya ukweri. Kune temuila kukoiya kiome kuu, neri kuakho vubasa kuu, 38neri temudarisha kikulho viome kuu vyo emubaya sacho chidumuwe, kwaite temumdarishe hu esughawe. 39Kune muwesia magondo ya Kiumbi kwaite mutoti ite kuli heka magondo muneowe uzime wa maaze makhabuna, mira iji waka ka magondo eniyoiya ani. 40Naho wato kune temudumu kulita hodi niaha kalo muakho uzime. 41“Ani sidaa kuowa udilao kuli he vahe. 42Mira nireile ite kune temulo ludumuisho lwa Kiumbi he swaho kaghu. 43Ani nilitie kalo niyo sakigi Aba gho edumu nimubaie, mira kune mutalhi, mira muhe mhali ekulita kwa ilhe kuu salaghe, kune munemdoria. 44Kune mudumu kuyoiana kikulho salaghe, mira temumuru kudaa kuyoiwa kikulho kuli he Kiumbi salaghe, iji mumuru kimomo kunidarisha ani? 45Musitoti ite ninemuyoija he Aba. Musa mumuarira, niu enemuyoija. 46Kai kweri mwemdarishe Musa, mwesenidarishe na ani, kwaite Musa eegondie mburi gho. 47Mira temudumu hu mburi egondie, munemuru kimomo iji, kudarisha viome niyo?”
လက္ရွိေရြးခ်ယ္ထားမွု
Yohana 5: NTMBL2025
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The New Testament in Mbugu @The Word for The World International and Mbugu Language translation, 2025. All rights reserved.