Matayu 5
5
Yesu anguwavula wandu kulitumbi
1Na mweni Yesu pakalola lipinga lya wandu, akakwela kulitumbi, na weni wavulwa ghaki wakamuhikila, 2Hinu akatumbula kuwavula, akilonga,
Luheku lwa chakaka
Luka 6:20-23
3“Watewela na luheku wandu wogha wangupala kummanya Sapanga kungalilu ghao.
Kwaikiva unkosi wa kundumba ni kwaikiva gha weni!” 4“Watewela na luheku wala wogha weni kunyengemala.
Kwaikiva watahekeleswa.” 5“Watewela na luheku wala weni kuyitikila.
Kwaikiva watelihi mlima.”
6“Watewela na luheku wala wogha weni kuwela na njala pamonga na kuyumilila kwaikiva gha kumuyitikila Sapanga.
Kwaikiva wateyukutiswa.” 7“Watewela na luheku wala wogha weni luhungu,
Kwaikiva watewonelwa luhungu.”
8“Watewela na luheku wala wogha weni mioyu maha.
Kwaikiva watemlola Sapanga.”
9“Watewela na luheku wala wogha weni kuyegha kuponga.
Kwaikiva hagha watekemwa wana wa Sapanga.”
10“Watewela na luheku wala wogha weni kughola vila angupala Sapanga.
Kwaikiva unkosi wa kundumba ni waweni,”
11“Mtewela na luheku mwenga wandu pawawalighu, pawawapokola na kuwakupikila kila ndambu gha uhakata kwaikiva gha nenga.” 12Mhekeleli na mkuwi na kilulu kwaikiva hupo zyenu ni ngulu kundumba. Havi ndiwa wawahakilile walota wa Sapanga haku dahile.
Munyu na mhana
Maliku 9:50; Luka 14:34-35
13Yesu akalonga, “Mwenga ni munyu wa mlima wogha. Ila munyu pauyalamisa unogha ghaki, mteghola niki inoghi? Utetutanga ng'ogha chochosi, ila kutagha panji na itimbangwi na wandu.”
14“Mwenga ni mhana wa mlima wogha! Mmbwani uchengilwi kunani gha litumbi uwesa ng'ogha kuhighwa.” 15Kwahela wandu wanguwesa kukosa taa na kugubika kwa lidebi, ila wanguvika kunani kindu kya kuvikila taa ili iwesi kuwalangasila wogha wa mlighuta. 16Hilahila, mhana wa mwenga ulangasi kuulongolo gha wandu, ili wapati kulola matendu gha mwenga maha na wawesi kumyinula Tati wa mwenga wa kundumba.
Mavulo gha malaghililo gha Sapanga ampeghili Musa
17“Mkotoho kuiwachila yiwa nihika kuhumisa malaghililo na mavulo gha walota. Nenga nihika ng'ogha kuhumisa ila kutimilisa.” 18Kundumba na mlima wogha vitehuka. Ila ninguwalongela yiwa kwahela hata mbandi imonga gha lilando lya laghililo litehuka. Kila kindu kyeni kuyandikwa kitehumila. 19Hinu, yeyosi atetenyula malaghililo hagha yenikuwela masokombi, na kuwavula wandu nagha, hayu atekemwa mnung'una nesu kuunkosi wa kundumba, ila mundu yula ateghola na kuvula, hayu atekemwa mkulu kuunkosi wa kundumba. 20Hinu ninguwalongela, mngupalwa muyitikili laghililo lya Sapanga kwa umaha kupiti vila wagholile Wavula wa laghililo na Mafalisayo. Kihyetu na kughola nagha mtewesa ng'ogha kuyingila kuunkosi wa Sapanga.
Kuwakanisa wandu waleki lilaka
21“Mhyoghanila kala yiwa wandu wa dahile walongelilwi, Ukotoho kukoma mundu. Yula atekoma mundu atepalwa atoswi.” 22Ila nenga ninguwalongela, yeyosi angumhyomela mlongu ghaki, angupaliwa alamulwe. Na yula angumpughanya mlongu ghaki ateyeghwa kuulamuli. Na yula atemkema mlongo ghaki, “Wenga mndyungi,” atepalwa kuyingila kulyoto lya kujimika ng'ogha. 23Hinu, pauyegha mapegho ghako kuulongolo gha kihanja na bahala ukakumbwike yiwa mlongo ghako kana magombi na wenga, 24uleki mapegho ghako kuulongolo gha kighanja, utumbuli kuyenda mkalaghani na mlongo ghako, ndiwa uhuyi uyeghi mapegho ghako.
25“Handa mundu mmonga Ulaghani na msitaki ghako kwa kuloposela mkiva mnjila pambila gha kuhika kuulamuli. Ili msitaki ghako akotoho kukuvika mumawoko gha mlamula, na mweni mlamula akakuvika mumawoko gha watovangondo, na wenga ukawopwa mlighuta lya wawopwa.” 26Chakaka ningukulongela, utehuka ng'ogha muuwopwa mbaka uhipi mapesa hyogha.
Mavulo gha kukanisa ngongola
27Yesu akalonga, “Mhyoghanila yiwa wandu walongelilwi, Mkotoho kughola ngongola.” 28Ila nenga ninguwalongela, yula atemlola mdala kwa luhujulu, hayu kaghola kala ngongola mmoyu. 29Hinu, paikawela lisu lyako lya kuliyila lingukughola ugholi mahakata ulitupuli ukalitagha kutali. Mbaha wenga kuyaghamila kikongonu kimonga kya higha ghako, kupiti higha ghako hyogha kutaghwa kulyoto lyeni kujimika ng'ogha. 30Na ikiva liwoku lyako lya kuliyila lingukughola ugholi uhakata, ulidumuli na ukalitagha kutali. Mbaa kwa wenga kuyaghamila kikongonu kyako kimonga kya higha ghako, kupiti higha ghako hyogha iyendi kulyoto lijimika ng'ogha.
Makaniso wandu wakotoho kulekana
Matayu 19:9; Maliku 10:11-12; Luka 16:18
31“Sapanga kalonga kala, Mundu mweni kumleka mhumbu ghaki, ingupalwa ampeghi mayandiko gha kulekana.” 32Ila nenga ninguwalongela, mundu yoyosi kapalwa ng'ogha kumleka mhumbu kwa uhakata wowosi, pangi kwa kughola ngongola, paumleka mhumbu kwa uhakata wowosi ungumghola aweli mngongola. Na mundu yoyosi mweni kumposa hayu mdala alekilwi angughola ngongola.
Lukasini lwa malaghano kwa Sapanga
33“Kangi myughanila yiwa wandu wa dahile walongililwi, mundu akotoho kulapa kwa uhwangi, ila utimilisi kila ulaghanili na Bambu.” 34Ila nenga ninguwalongela, katu mkotoho kulapa, hata kwa kundumba kwaikiva ndiwa kikalilo kya unkosi wa Sapanga, 35au kulapa kwa mlima, kwaikiva ndiwa mahala ghaki Sapanga anguvikila maghulu, au kwa Yelusalemu, kwaikiva ndiwa mmbwani wa Nkosi Mkulu. 36Na mwenga mkotoho kulapa kwa mutu kwaikiva muwesa ng'ogha kughola hata hwila imonga kuwela mbulete au mbile. 37“Hina” mwenga, iweli “Hina” na “Katu” iweli “Katu” Kyokyosi kipiti hagha kinguhuma kwa yula mhakata.
Mavulo gha kukanisa kuhuyisila
Luka 6:29-30
38“Mhyoghanila yiwa ilongilwi, lisu kwa lisu, linu kwa linu.” 39Ila nenga ninguwalongela, mkotoho kumuhuyisila mundu mahakata. Na mundu paakubakula nganja lya kuliyila, umghalambulile na lya kushotu. 40Handa mundu angupala kukuyegha kunjenga kaya kwaikiva gha lishati hinu umpeghi hilahila na likoti lyako. 41Mundu paakupala wenga umyegheli mhighu ghaki pabehi, wenga umyegheli patali. 42Mundu paangukuluwa kindu wenga ungupalwa umpeghi, ukotoho kuwela mwimi.
Mavulo gha upalo
Luka 6:27-28, 32-36
43“Mhyoghanila yiwa ilongilwi, umpali ghanja ghako, na kumyomelela mhakata ghako.” 44Ila nenga ninguwalongela, muwapali wahakata wa mwenga na kuwayupila wahakata wa mwenga na wala wanguwahakila mwenga, 45ili mpati kuwela wana wa Tati gha mwenga wa kundumba. Kwaikiva mweni Kanguwalangasila lijuwa lyaki wandu wahakata na walungwana, na kuwatonyela ndonya wandu wa maha na wahakata. 46Ikiva munguwapala wala wanguwapala mwenga hela, mtepokela hupo liki? Kwaikiva hata wakungula usulu wangughola handa havi. 47Kangi pamuwagholela umaha walongo wa mwenga hela, mtewela mghola kindu kya kukangasaa? Hata wandu wamkwinila ng'ogha Sapanga wangughola nagha. 48Hinu, mngupalwa machuwa hyogha muweli mtimila handa Tati wa mwenga wa kundumba vila kahela ulepelelo wowosi .
လက္ရွိေရြးခ်ယ္ထားမွု
Matayu 5: NTMbBL2025
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The New Testament in Mbunga @The Word for The World International and Mbunga Language translation, 2025. All rights reserved.