Matayu 4
4
Yesu anguyeswa
Maliku 1:12-13; Luka 4:1-13
1Hinu Yesu akilongoswa na Mpumulo wa Sapanga kuyenda kuluvagha ili ayeswi na Lihyukana. 2Akawopa kulyegha mulyo machuwa ialobaini pamuhi na uhiku, na kumwihu ghaki akawela na njala nesu. 3Hinu, Lihyukana likamuhikila na kumlongela, “Ikiva wenga ndiwa Mwana wa Sapanga, ulaghili maganga hagha yaweli mibumunda.”
4Yesu akamyanga, “Iyandikwa kumayandiko gha Sapanga, Mundu kanguwesa ng'ogha kulama kwa libumunda hela, ila kwa kila lilando lyeni kuhuma kwa Sapanga.”
5Hinu Lihyukana likamtola Yesu mbaka ku Yelusalemu na kumvika kunani gha kindangawala kulighuta lya Sapanga, 6Akamlongela, “Ikiva wenga ni mwana wa Sapanga, ulidangi pahi, kwaikiva iyandikwa kumayandiko gha Sapanga,
Sapanga atewalaghila watumikila ghaki wa kundumba na weni watekupokela mumawoko ghao.
Ili ukotoho likwala mliganga.”
7Yesu akamlongela, “Iyandikwa, Ukotoho kumyesa Bambu Sapanga ghako.”
8Hinu Lihyukana likamtola mbaka kunani gha litumbi litali, likamlangiha, mahala kogha unkosi wa kumlima wogha na umaheli ghaki. 9Akamlongela, “Havi vyogha nitekupegha ikiva utenitundamila na kuniyupa.”
10Hinu Yesu akamlongela, “Uhuki, kuulongolo gha nenga, Lihyukana! Kwaikiva iyandikwa kumayandiku gha Sapanga, Umtundamili Bambu Sapanga ghako na umyupi mweni weka yaki.”
11Hinu, Lihyukana likamleka, watumikila wa kundumba wa Sapanga wakahika na wakamtumikila.
Yesu angutumbula lihengu ku Galilaya
Maliku 1:14-15; Luka 4:14-15
12Yesu pakayughanila yiwa Yohanakavikwa mlighuta lya wawopwa akayenda ku Galilaya. 13Akahuka Nazaleti, akayenda Kapelinaumu mmbwani weni kuwela pabehi na lihiwa Galilaya, kumimbaka gha mlima wa Zabuloni na wa Nafutali, 14Yagholikili nagha ili litimilili lila lilando lilongelilwi na mlota Isaya,
15“Mlima wa Zabuloni na mlima wa Nafutali.
Iwela kunjila gha kuyendela kulihiwa mwambu gha lweni Yoludani,
Ku Galilaya, Mlima wa wandu weni kummanya ng'ogha Sapanga!
16Wandu watamili mlwisa waulolili mhana mkulunga.
Na wala walikalili ku holu gha kuhwegha.
Mhana uwalangasila.”
17Kuhuma lipindi lila Yesu akatumbula kutangasa akilonga, “Mleki sambi na mumhuyili Sapanga, kwaikiva unkosi wa Kundumba upabehi.”
Yesu anguwakema walopola homba wanjechi
Maliku 1:16-20; Luka 5:1-11
18Yesu paawelili akityanga mmbali gha lihiwa Galilaya, akawalola walongu waivili walopola homba, Simoni mwenikukemwa Petelo na Andelea mlongo ghaki. Wawelili wakitagha nyafu zyao mlihiwa kwaikiva weni wawelili walopola. 19Hinu Yesu akawalongela, “Mnikovikeli, na nenga nitewavula ndambu gha kukungula wandu handa walopola vila wangukungula na kuyegha homba ukaya.” 20Bahala, wakaleka nyafu zyao, wakamkovekela.
21Pawayendili kuulongolu mayaghani. akawalola walongo ghangi waivili, Yakobu na Yohana, wana wa Zebedayu. Wawelili mghati gha whatu pamonga na tati ghao Zebedayu, wanguhonjola nyafu zyao. Hinu, Yesu akawakema. 22Bahala wakaleka whatu ghao, pamonga na tati ghao, wakamkovekela.
Yesu anguwavula wandu na kuwalamisa wavina
Luka 6:17-19
23Yesu awelili akiyenda kila mahali kumbwani Galilaya, akivula kumighuta gha kukonganika Wayahudi na kutangasa Habali Maha zya Unkosi wa Sapanga, akilamisa mavina wekaweka na kila kulwala kwa wandu. 24Habali zyaki zikalandala mbandi zyoha zya Siliya. Wavina wogha weni kuwela na kulwala wekaweka na wala waghasilwi na uhakili wekaweka, na weni kukolwa na mahoka na weni kihinduhindu na wala wapolili vikongonu, wakayeghwa kwa Yesu, akawalamisa wogha. 25Mapinga yatangala ya wandu kuhuma Galilaya, na mimbwani ikumi gha Dekapoli, na Yelusalemu, Yudasia na kumwambu gha lweni Yoludani, yamkovekelili.
လက္ရွိေရြးခ်ယ္ထားမွု
Matayu 4: NTMbBL2025
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The New Testament in Mbunga @The Word for The World International and Mbunga Language translation, 2025. All rights reserved.