Luka 3

Yohana Mbatisa anguwatangasila wandu

Matayu 3:1-12; Maliku 1:1-8; Yohana 1:19-28

1Lichuva lya ikumi na mhano wa unkosi wa Kaisali mkulu Tibelio, Pontio Pilato awelili angulongosa mlima wa Yudasia. Helode awelili nkosi wa Galilaya, na mlongo ghaki Filipo awelili mlongosi wa mlima wa Itulea na Tulakoniti. Lusania awelili nkosi wa Abilene, 2na Anasi na Kayafa wawelili watambika wakulu wa Sapanga. Lipindi lila ndiwa lilando lya Sapanga limuhikilili Yohanamwana wa Zakalia, kula kumanyahi. 3Hinu Yohanambatisa akayenda kumilima hyogha iwelili mmbali mwa lweni Yoludani, akawatangasila wandu. Akawalongela wandu kuleka mahakata na kumhyukila Sapanga na wabatiswe na Sapanga atewalekesela sambi syao.

4Handa iyandikilwi kukihitabu kya Isaya yula awelili mlota wa Sapanga,

“Mundu angukema haku kumanyahi,

‘Mumvikili Bambu njila ghaki,

mghole maha njila ghaki.

5Nagha kila bondi litekulilwa.

Kila litumbi na kitumbi vitelandalwa

na pahyetili patevikwa maha,

njila zihakata zitegholwa maha.

6Kila mundu atelola ulokola auyegha Sapanga.’ ” 7Hinu wandu watangala wamuhikilili Yohanaili awabatisi. Na mweni akawalongela, “Mwenga kiweleka kya njoka! Ni ghani awalongelili yiwa munguwesa kuubhutuka uhakili hula utehika? 8Hinu mlangihi kwa njila gha matendu yiwa mhyuki na kumkovekela Sapanga na kulekeselwa sambi. Mkotoho kuliwachila yiwa Sapanga atewapala ikiva mtelonga yiwa ni tati wa twenga. Ninguwalongela chakaka Sapanga anguwesa kughalambula maganga hagha yavile wana wa Ibulahimu! 9Hinu liwao liwela kala kumikegha gha kila libiki lilela ng'ogha matungula maha litedumulwa na kudangwa kulyoto.” 10Lipinga lya wandu likamkonya, “Tughole kyani hinu?” 11Akawayanga, “Avile na likoti ivili ampeghi yula avileng'ogha na likoti, avile na mulyo aghole hilahi.” 12Na watola usulu wakahika kangi ili wabatiswi, wakamkonya, “Mvula tugholi niki?” 13Na mweni akawalongela, “Mkotoho kutola usulu ngulu ilandine ng'ogha na hila ivikilwi kala.” 14Na watovangondo wakamkonya, “Na twenga tughole niki?” Na mweni akawayanga, “Mkotoho kutola vindu vya mundu yoyose kwa makakala pamonga na kumyegha kunjengakaya kwa uhwangi. Myukuti na misahala mngupokela.” 15Wandu wawelili wakilindila kindu kuhumila, wogha wawachilili kumioyu ghao yiwa Yohanandiwa anguwesa kuvile mweni yiwa Kilisito ahaghulilwi na Bambu. 16Hinu Yohanaakawalongela wogha, “Nenga ninguwabatisa kwa masi, ila yula atehika kuyetu kwa nenga ni mweni makakala kupiti nenga, na nenga niwesa ng'ogha hata kuwopola lughoyi lwa hilatu ghaki. Mweni atewabatisa kwa Mpumulo wa Sapanga na kwa lyoto. 17Mweni avile na luselu mumawoko ghaki lwa kuyeyesela ughali ghaki, akunguli ngano mungoko, na miyeyu anyanyi kwa lyoto ujimika ng'ogha.” 18Na Yohanaayangalalili kuwatangasila wandu Habali Maha akitumila njila gha kuwakalipila na kuwaluwa. 19Kuulongolo Yohanaamkalipilili nkosi Helode kwaikiva kampoka Helodia, mdala wa mlongo ghaki Filipo na mahakata ghangi. 20Hinu Helode akayongesa uhakata ghaki kangi kwa kumvika Yohanamulighuta lya wawopwa.

Yesu angubatiswa

Matayu 3:13-17; Maliku 1:9-11

21Badili gha wandu wogha kubatiswa, Yesu na mweni akabatiswa. Na paawelili akiyupa, kundumba kukawoposoka, 22na Mpumulo wa Sapanga akaghuluka kuhuma kunani kwa njila gha higha wa ngunda. Na lilowi likahyoghanika kuhuma kundumba likilonga, “Wenga ndiwa mwana wa Sapanga mpalwa, ningupalilwa na wenga.”

Uwelekwa wa Yesu

Matayu 1:1-17

23Yesu paatumbulili lihengu lyaki awelili na ukulunga wa machuva ikumi itatu, na wandu wawachilili yiwa ni mwana wa Yusufu, Yusufu mwana wa Heli. 24Heli awelili mwana wa Matati na Matati awelili mwana wa Lawi, na Lawi awelili mwana wa Meliki, na Maleki awelili mwana wa Yanai, na Yanai awelili mwana wa Yusufu, 25Yusufu awelili mwana wa Matatia, na Matatia awelili mwana wa Amosi, na Amosi awelili mwana wa Nahumu, na Nahumu awelili mwana wa Hesili, na Hesile awelili mwana wa Nagai, 26Nagai awelili mwana wa Maati na Maati awelili mwana wa Matatia, na Matatia awelili mwana wa Shemeni, na Shemeni awelili mwana wa Yoseki, na Yoseki awelili mwana wa Yoda, 27Yoda awelili mwana wa Yohanani, Yohanani awelili mwana wa Lesa, na Lesa awelili mwana wa Zelubabeli, na Zelubabeli awelili mwana wa Shealitieli, na Shealitieli awelili mwana wa Neli, 28Neli awelili mwana wa Meliki, Meliki awelili mwana wa Adi, na Adi awelili mwana wa Kosamu, na Kosamu awelili mwana wa Elimadamu, na Elimadamu awelili mwana wa Eli, 29Eli awelili mwana wa Yoshua, na Yoshua awelili mwana wa Eliezeli, na Eliezeli awelili mwana wa Yolimu, na Yolimu awelili mwana wa Matati na Matati awelili mwana wa Lawi, 30Lawi awelili mwana wa Simeoni, Simeoni awelili mwana wa Yudasi, Yudasi awelili mwana wa Yusufu, Yusufu awelili mwana wa Yonamu, na Yonamu awelili mwana wa Eliakimu, 31Eliakimu awelili mwana wa Melea, na Melea awelili mwana wa Mena, na mena awelili mwana wa Matata, na Matata awelili mwana wa Nasani, na Nasani awelili mwana wa Daudi, 32Daudi awelili mwana wa Yese, na Yese awelili mwana wa Obedi, na Obedi awelili mwana wa Boazi, na Boazi awelili mwana wa Salimoni, na Salimoni awelili mwana wa Nashoni, 33Nashoni awelili mwana wa Aminadabu, na Aminadabu awelili mwana wa Adimini, na Adimini awelili mwana wa Alini, na Alini awelili mwana wa Hesiloni, na Hesiloni awelili mwana wa Pelesi, na Pelesi awelili mwana wa Yudasi, 34Yudasi awelili mwana wa Yakobu, na Yakobu awelili mwana wa Isaka, na Isaka awelili mwana wa Ibulahimu, na Ibulahimu awelili mwana wa Tela, na Tela awelili mwana wa Naholi, 35Naholi awelili mwana wa Selugi, na Selugi awelili mwana wa Leu, na Leu awelili mwana wa Pelegi, na Pelegi awelili mwana wa Ebeli, na Ebeli awelili mwana wa Sala, 36Sala awelili mwana wa Kenani, Kenani awelili mwana wa Alifakisadi, Alifakisadi awelili mwana wa Shemu, Shemu awelili mwana wa Nuhu, Nuhu awelili mwana wa Lameki, 37Lameki awelili mwana wa Metusela, na Metusela awelili mwana wa Henoki, na Henoki awelili mwana wa Yaledi, na Yaledi awelili mwana wa Mahalaleli, na Mahalaleli awelili mwana wa Kainamu, 38kainamu awelili mwana wa Enoshi, na Enoshi awelili mwana wa Seti, na Seti awelili mwana wa Adamu, na Adamu awelili wa Sapanga.

လက္ရွိေရြးခ်ယ္ထားမွု

Luka 3: NTMbBL2025

အေရာင္မွတ္ခ်က္

မၽွေဝရန္

ကူးယူ

မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ

Mbunga အေၾကာင္းကို ပို၍ သင္ယူပါ။