Exod 18
18
yeṯruwn nsib n muwsa yused bac ayṭul fellas
1yeṯruwn lkahen n midyan, aḏ nsib n muwsa yesla mag yeggi lliy diyma yella y muwsa aḏ cceƹbis, aḏ mammeḵ iṣefγin seg miṣr. 2yuwya ṣefuwra lehlis n muwsa lliy yusi yerriṯ al babis. 3aḏ yiḏes ṭarwas s sen, yjen ismis jircuwm aḏ lmeƹnas d aγrib afelxaḍert muwsa yuwa: «usiγ sekneγ g tammurt aγriba.» 4aḏ ysem n wissen liƹazer aḏ lmeƹnas. <lliy diyma yella yetƹawen diyi. > afelxaḍert muwsa yuwa: «rebbiy n baba iƹewniḏ aḏ ysemenƹiḏ seg ssiyf n ferƹuwn.»
5yused yeṯruwn, nsib n muwsa, al lmuxeyyem tman jbel n rebbiy. yuγesd ṭarwas aḏ lehlis. 6yenkiy y muwsa mam yuwayas: «neči d nsibiḵ. usiγd aḏ iḏiy ṭarwaḵ aḏ lehliḵ.»
7yaxy muwsa ireḥ fiseƹ bac ayeƹreḍ y nsibis. aḏ iṭebbes zzaṯis, ibeḥbayi, ysesten kul yjen sisen ttani af leḥwal. aḏ ƹeddan al lƹecceṯ. 8yuwa muwsa y nsibis af mag yeggi lliy diyma yella g ferƹuwn aḏ imiṣriyen bac aysemneƹ israyiliyen, aḏ af tƹeb lliy zrent g ubriḏ, aḏ mammeḵ ysemenƹin lliy diyma yella siyes.
9mniyn yesla yeṯruwn aydin, yefreḥ lliy rebbiy yeggi lxiyr y aṯ israyil aḏ ysemenƹin seg ifesn n imiṣriyen. 10yuwa yeṯruwn: «aynumer lliy diyma yella lliy ysemenƹewem seg ifesn n imiṣriyen aḏ n ferƹuwn, aḏ yseffeγ cceƹb s adug imiṣriyen. 11aḏ ṭuruh sseneγ lliy lliy diyma yella d meqqar iṭer n irebbiyen lkul, afelxaḍert iƹeqb imiṣriyen s lqudretis mniyn wsiyn ḍelmen g israyiliyen.» 12yeṯruwn nsib n muwsa yeγres man ayeḥreq y rebbiy aḏ yeγressas man ačan. yaxy usend haruwn aḏ iwessaren n aṯ israyil al nsib n muwsa bac ačan yiḏes zzaṯ lliy diyma yella.
muwsa yeggi s dwiy n nsibis aḏ iwaza lḥukkam
13tajji ygeƹmez muwsa weḥdes bac ayeḥkem jar midden lliy qqimen. ssugumen s tajji al tmeddiṯ. 14mniyn yezra nsibis aydin yuwayas: «matta tetteggeḏ g midden? maγer tetgeƹmezeḏ weḥdeḵ bac aḥekmeḏ jaresen? aḏ midden tγiman γareḵ s tajji al tmeddiṯ.»
15yerras muwsa: «afelxaḍert midden ttesend al γari bac asennen matta yexs lliy diyma yella ateggen. 16aḏ lemmi yuqeƹ jaresen nuγu ttesniḏ bac aḥekmeγ jaresen we asensiḵneγ cceriyƹeṯ n rebbiy.»
17yaxy yuwa nsibis.
«amyuh muc d ṣbiḥ. 18rahiy taƹyiḏ cek aḏ ayuh n midden lliy iḏeḵ. ayuh ggeṯ fellaḵ, witetqudduc ateggeḏ weḥdeḵ. 19ṣeγdiḏ afemleγ af nṣiḥtiw, rebbiy afiƹawen. yexs adleḏ d mersul jar rebbiy aḏ midden bac asetseṣlleḏ ckeyaṯesen. 20seḥefdasen lwajeb aḏ cceriyƹeṯis, tsiḵendasen abriyḏ lliy yexs ayuren diyes aḏ matta yexs ggen.
21aḏ waza seg cceƹb irgazen γarsen lhibeṯ aḏ ssenen lliy diyma yella aḏ ttegeḏen siyes aḏ widemƹenc bac ateneggeḏ af ixfawen n luluf aḏ almiyyaṯ aḏ txemsinin aḏ tƹecreyin. 22we aḥekmen jar midden g iḥajeyen imeckunen diyma. amma ckayaṯ timeqqarin aftendaγen. rahiy amyuh tasenekzen fellaḵ tƹeb. 23kan teggiḏ amyuh aḏ mammeḵ yexs rebbiy, aquddeḏ aggeḏ lxeḏemtiḵ lkul we arewḥen midden labas ƹlihum.»
24yesla muwsa nṣiḥeṯ n nsibis. yeggi matta yuwayas. 25aḏ iwaza seg israyiliyen irgazen d ṣbiḥen. yeggin af ixfewen n luluf aḏ almiyyaṯ aḏ txemsinin aḏ tƹecreyin. 26wsiyn ḥekmen jar midden g ckayaṯ timeckunin aḏ ugayen al muwsa tindin lliy uƹerneṯ fellesen.
27wembeƹd yceyyeƹ muwsa nsibis. yeḏwel al tammurtis.
လက္ရွိေရြးခ်ယ္ထားမွု
Exod 18: IGJ
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2025 Chutney Media Agency Ltd for the audio recording and for the text upon which the recording is based. The audio recording and the text are both released under a Creative Commons 4.0 CC BY-NC-ND license (Attribution - No-Commercial - No Derivatives).