Exod 16
16
midden txernenen af muwsa g ṣṣeḥreṯ n siyna
1ḥewlen aṯ israyil seg iyliym. aḏ uḏeffen al ṣṣeḥreṯ n siyna jar iyliym aḏ jbel n siynay g as n zgen n cehher wi 2 g usuggas, beƹd ifaγesen seg miṣr. 2g aydin n ṣṣeḥreṯ xernennen israyiliyen af muwsa aḏ haruwn. 3aḏ uwanas: «texsem aγentenγem? weƹla lliy diyma yella yenγeneγ g tammurt n miṣr. γaḍih nusi netgeƹmaz tman tinḥasin n yssum aḏ nettat aγrum almiy necbeƹ. qa kennim tseffeγmaneγ seg miṣr al ṣṣeḥreṯ bac aγentenγem s llaz.»
4yaxy yuwa lliy diyma yella y muwsa: «qa neči tasezwiγ fellewem anzar n aγrum seg ujenna. we abyen midden lliy yelzemmasen y kul as weḥdes. amyuh tatenjerbeγ, we aḥekreγ yenda tayuren g ubriḏiw naγ aha. 5aḏ g as 6, almiy taggen man ačan, atefen deqqes mertin n lliy tleyement kul as.»
6yaxy uwan muwsa aḏ haruwn y midden n aṯ israyil lkul: «temeddiṯ tesnem lliy lliy diyma yella d netta lliy ysefγawem seg tammurt n miṣr. 7tajji tazrem lquweṯ n lliy diyma yella, afelxaḍert yesla xernennuwem fellas. rahiy af lliy diyma yella tetxernennem muc fellenneγ. d mam neccin bac axernennem fellenneγ.» 8yuwa zada: «qa kennim tasnem lliy netta d lliy diyma yella almiy afenyuc yessum temeddiṯ bac ačam aḏ aγrum tajji bac acebƹem. netta yesla xernennuwem fellas, d matta neccin? rahiy kennim tetxernennem af lliy diyma yella.»
9afelxaḍert ayuh yuwa muwsa y haruwn: «mmel y aṯ israyil abedden zzaṯ lliy diyma yella.» 10aḏ lemmi yusi haruwn ydugga y midden n aṯ israyil smuqlen al ṣṣeḥreṯ, yaxy zren lmejd n lliy diyma yella yeḍherred g sḥab.
11yuwa lliy diyma yella y muwsa 12«sliγ xernen n aṯ israyil, mlasen: temeddiṯ tačam yessum aḏ tajji tacebƹem seg aγrum. we asnem lliy neči d lliy diyma yella n ddunyeṯ aḏ rebbiywem.»
aγrum n lmen aḏ yessum n sselwa
13tmeddiṯ diyn usented timelliwin n sselwa čurneṯ lmuxeyyem bac atentečen midden. aḏ g tajji tuḏen ndaweṯ tammurt lliy tenneḍ siyes. 14aḏ lemmi tmukes ndaweṯ, fehhen midden. rahiy yeqqim uḏem n tammurt yuḏen s ḥaja tewerqiqt ggeṯ am tqecra aḏ temelelt am ṯṯelj. 15aḏ lemmi zrent aṯ israyil, uwan y beƹeḍhum: < menhu. > yeƹni: < d matta ayuh?> afelxaḍert wisinenc d matta. yaxy yuwayasen muwsa: «ayuh d aγrum n lliy diyma yella lliy yucawemtiḏ bac atečem. 16yuweyawem lliy diyma yella: < kul yjen ayebbi siyes lliy yelzemmas; y kul yjen lgelbeṯ af leḥsab n middenis lliy dderen yiḏes g lƹectis. > »
17ggen aṯ israyil mammeḵ yuwa rebbiy. yella sisen mam yebbi ggeṯ aḏ sisen mam yebbi fercu. 18lekenti lemmi keylent s lgelbeṯ, widyefdilc y mam yebbi ggeṯ aḏ wiyxeṣc y mam yebbi fercu. yebbi kul yjen matta yetet gedged.
19yuwayasen muwsa: «ḥetta d yjen wiyetḥerzi siyes al tajji.» 20aḏ yella mam wiyeslic dwiy n muwsa aḏ ifeddel siyes al tajji. yaxy yeggi tiketcawin, yerci. iγeccec fellasen muwsa. 21aḏ yusi kul yjen yettebbi tajji lliy yelzemmas. aḏ almiy atezγel tufuyt ayḏab lliy yefdelled seg lmen af tammurt.
uču n as n sebbeṯ
22aḏ g as 6 wsiyn tebyen aγrum mertin deqqes n kul as, yeƹni gelbtin y kul yjen. aḏ usend imeqqaren n aṯ israyil ƹewden y muwsa lliy zrent. 23yaxy yuwayasen: «yemmal lliy diyma yella: ača taydel d as n rraḥeṯ, d sebbeṯ d meqdus y lliy diyma yella. ggeṯ aγrum lliy yelzemmewem, teserγem lliy ikeffeyewem. aḏ lliy yefdelled siyes djet al tajji.»
24aḏ lliy djent siyes al tajji mammeḵ yuwa muwsa, wiyercic, aḏ wiyeggic tikečawin. 25yuwa muwsa: «as uh, čeṯ ayuh lliy yefdelled. rahiy as uh d sebbeṯ d meqdus y lliy diyma yella aḏ witettifemc diyes uču af tammurt. 266 d ussanaṯ atebbiyem. aḏ as wis 7 d sebbeṯ aḏ witettifemc diyes uču.»
27lekenti diyes midden sisen ffeγen bac abyen. yaxy wiḏufin ḥaja. 28wembeƹd yuwa lliy diyma yella y muwsa: «al lemmi taqimen witetteggenc ayuh n midden s luwṣayaṯ n cceriyƹeṯiw? 29ḥekreṯ, neči ggiγawem as n sebbeṯ d rreḥeṯ. rahiy ttucγawem as 6 aγrum deqqes mertin n ussan ttenyaṯ. as wis 7 yexs ayeqqim kul yjen g umkanis aḏ witeffeγc siyes.» 30yaxy riḥen midden as 7.
31aḏ semman aṯ israyil ayuh n uču d <lmen. > aḏ yusi d mellal am tḥebuṯin n jelejlan. aḏ lmeṭeƹmis am tqurset s tamemt. 32yuwa muwsa: «yemmal rebbiy: < steḥefdeṯ af čariṯ n lgelbeṯ siyes bac azren imeckenuwem aγrum lliy sečγewemtiḏ g ṣṣeḥreṯ mniyn seffeγγewem seg tammurt n miṣr. > »
33yuwa muwsa y haruwn: «awi teƹbert teggeḏ diyes deqqes n lgelbeṯ seg lmen. teggetteṯ zzaṯ lliy diyma yella bac atdel teḥrez y lejyaluwem.» 34mammeḵ yuwa lliy diyma yella y muwsa, yused as lliy diyes yeggiṯ haruwn tman n luwṣayaṯ bac asteḥefden fellas. 35dderen israyiliyen af lmen 40 d isuggasen almiy dusen al leḍraf n kenƹan lliy diyes ssukkan. 36aḏ lgelbeṯ netta d leƹcur n layfa.
လက္ရွိေရြးခ်ယ္ထားမွု
Exod 16: IGJ
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2025 Chutney Media Agency Ltd for the audio recording and for the text upon which the recording is based. The audio recording and the text are both released under a Creative Commons 4.0 CC BY-NC-ND license (Attribution - No-Commercial - No Derivatives).