Matayo 3
3
Yohani mbatisa akuvadalikila vanu
Maliko 1.1-8; Luka 3.1-18; Yohani 1.19-28
1Mufigono ifyo, Yohani Mbatisa akahachile kuno idalika mudasi lya Yudea. 2Akavalongiye “Muleke sambi chenu mumuwuyile Nguluvi, kwakuva ung'achale va kuluhano ugehe pepi.” 3Yohani uyu ndi yula yealongiwe makani gyake na mvichi Isaya kuva,
“Munu yumwi ikemela kukwelu,
Mumgelanichile Mtwa ng'asi lyake,
muigolole ng'asi lyake.”
4Yohani akafalile mwenda veuhonilwe kwa magala gya mng'oko ikemelwa ngamia, na lifunga lwa ngwembe mukigudi. Kyakulia kyake kikali midedema na luki. 5Vanu kuhuma ku Yelusalemu na Uyawudi yonda, na inyi chonda che chigehe mung'umbung'umbu lya mgoka va Yolidani vakamuhelelie Yohana. 6Navo vakahongecha sambi chawo na akavabatisa mumgoka va Yolidani.
7Ila peavawene Mafalisayo volofu na Vasadukayo vakumuheleliya neke avabatise, akavalongie, “Nyenye kilelo kya liyoka! Ndi ani avalongiye munyile luhigo lwelukwacha? 8Suwe, muwonese kwa magito kuva muhongiche, 9vala mubihile kuhocha na kwilongela munumbula chenu, Daada vetu ndi Ibulahimu ndakyene ndikuvalongela, Nguluvi ivesa kugagita maganga aga gaveche vana va Ibulahimu! 10Livago livikilwe suwe mumidadikwa gya mibiki, kila libiki lyeselibaba manunu manono lidumulwa na kutagwa mulyoto. 11Nene ndikuvabatisa kwa malenga kuwonesa kuva muhongiche sambi chenu. Ila yeikwacha kumbele lyangu agehe na umwimike kuchumba nene, nene sendidikilwa ata kunyamula makobasi gyake. Mwene akuvabatisa kwa Muhe va Nguluvi na kwa lyoto. 12Mwene agehe na luhelo mumawoko gyake daifyagila pono pakupetela, neke apetele mabenelo gyake na kugavika mulusanja lwake na dainyanya miyeyela mulyoto weseuchima.”
Yesu ibatiswa
Maliko 1.9-11; Luka 3.21-22
13Chipindi icho Yesu akahegile mumwani va Galilaya mbaka mgoka Yolidani neke abatiswe na Yohani Mbatisa. 14Ila Yohani akagechile kumkanila akilonga, “Nene nding'ang'a kubatiswa na veve, kangi na veve wachile kubatiswa na nene!”
15Yesu akamhigile, “Veve dikile hela kwakuva tung'angw'a kugagita gala gyonda gyeikela Nguluvi.” Baho Yohani akaidikila akambatise.
16Baho Yesu peabatiswe, akahuma mumalenga. Baho baho luwano chikadindwike, akawene Muhe va Nguluvi ikwika ngita ng'unda na kutula pakyanya lyake. 17Lichwi kuhuma kuluhano ikalongile, “Uyu nde mwana vangu yendimkeliye yeakunikedusa hilo.”
လက္ရွိေရြးခ်ယ္ထားမွု
Matayo 3: NTBnBL2025
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The New Testament in Benamanga @The Word for The World International and Benamanga Language translation, 2025. All rights reserved.