Matayo 2
2
Vagenji kuhuma pelihumila lichuwa
1Yesu akababilwe kumwani va Betelehemu muinyi lya Yudeya, chipindi Helode peakali Ng'achale. Bahobaho, vanu veviimbile nondwa vafikile ku Yelusalemu kuhuma lubali pelihumila lichuwa, 2vakahuchile, “Agehe kwiya mwana yeababilwe daivecha Ng'achale va Vayahudi? Twiwene nondwa lyake lubali lwa kuhumila lichuwa, twachile kumgundamila.”
3Ng'achale Helode peapulike ago, akalandamwike kwa wogofi, mwene pamwi na vanu vonda va mwani va Yelusalemu. 4Helode akavakemela vatekechi vakomi vonda pamwi na vawulanichi va Malagilicho gya Musa gyeagavilwe na Nguluvi, akavahuchile, “Kilisito daibabwa kwiya?”
5Navo vakamuhigile, “Daibabwa kumwani Betelehemu muinyi lya Yudea. Ngita peasimbile mvichi va Nguluvi mumasimbo.”
6“Veve Betelehemu muinyi lya Yudea,
veve se mdodo mugati lya mwani cha Yudeya,
kwakuva kwa veve daihumila kilongochi,
daakuvalongocha vanu vangu va Isilaeli.”
7Baho Helode akavakemelie avo vevikwimbile nondwa pono kwihela vanu, neke vamlongie undakyene chipindi liki hilo pemuiwene nondwa ila. 8Baho akavalagiche ku Betelehemu akilonga, “Muhelele mkasake kwa unofu makani gya mwana uyo. Dapemumuwene muwuyise mahigo neke na nene ndihelele kumgundamila.”
9Pevampulikile ng'achale, vevimbile nondwa vakaiwene ila nondwa vakakeduka hilo, vakahele nalyo ila nondwa yevaiwene palubali kuhumila lichuwa ikavalongue, navo vakaifuatile mbaka peimile pono pala peagehe mwana. 10Pevaiwene yila nondwa imile vakakeduke hilo. 11Pevaingie mukaye vakamwene yula mwana pamwi na maye vake, navo vakamfugamile. Baho vakavopuwe lusanja chawo na vakamgavila fupo, sahabu na manung'ililo na mgoda va vana.
12Nguluvi akavakanile munjosi vala vevimbile nondwa vabihile kuwuya kwa Helode, suwe vakawuyile kukaye lyao kwa kuchumbila ng'asi yingi.
Kunyilila ku Misili
13Pevahegile vala vevaimbile nondwa, ndumindumi va Mtwa akamuhumie Yusufu munjosi akamlongiye, “Lamuke, munyamule mwana na maye vake mnyilile ku Misili. Mwikale ukoya mbaka pendikuvalongela, kwakuva Helode ing'ang'a kumdocha uyo mwana.”
14Suwe, Yusufu akalamke, akamnyamula mwana na maye vake pamiye wuwula vakahegile kuhelela ku Misili, 15vakalile ukoya mbaka peafue Helode. Lukani ulo ligitilwe neke litimile luchowo lyealongile Mtwa kuchumbila vavichi vake kuva,
“Ndimkemeliye mwana vangu kuhuma ku Misili.”
Vana vakigosi vidochwa
16Helode peachele kuva vala veviimbile nondwa sevawuyile kumlongela gevagavene, akavipile hilo. Akaswitiliche vana vakigosi vonda mumwani lwa Betelehemu na vala vevali pono lya pepi vevali na miyaka givili na vevakali panyi lya miyaka givili vadochwe. Akagitile ndena kuhumana na kila kyealongilwe na vala veviimbile nondwa.
17Nde peitimile luchowo lyealongile mvichi Yelemia kuva,
18“Lichwi likapulikike ukoya ku Lama,
kivembo na makivilicho gyolofu.
Laheli akuvavembela vana vake.
Akakanile kuchikichwa
kwakuva vonda vafue.”
Kuwuya kuhuma ku Misili
19Peafue Helode, ndumindumi va kuluhano kwa Nguluvi akamuhumiye Yusufu munjosi ukoya ku Misili, 20akamlongile, “Lamke! Mnyamule mwana na maye vake, muwuye kangi muinyi lya Isilaeli, kwakuva vala vevakang'ang'ile kumdocha mwana vafue.” 21Baho Yusufu akalamwike, akamnyamule mwana pamwi na maye vake vakawuye muinyi lya Isilaeli.
22Ila Yusufu peapulike kuva Alikelao mwana va Helode avechile ng'achale va Yudea, muhala va ung'achale va daada vake, akaogwipe kuhelela ukoya. Namwene peakanilwe munjosi, akahele muinyi lya Galilaya, 23akahelela kwikala mumwani weukemelwa Nasaleti. Ndeni peivechile njowo chechilongilwe kuchumbila vavichi va Nguluvi kuva, “Daikemelwa munu va Nasaleti.”
လက္ရွိေရြးခ်ယ္ထားမွု
Matayo 2: NTBnBL2025
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The New Testament in Benamanga @The Word for The World International and Benamanga Language translation, 2025. All rights reserved.