Matiós 17
17
Gunúgie guá Yésuse
(Mál 9.2-9; Lúk 9.28-36)
1Egélém gá mɔɔ́sɛ mátíndadɔ gɔg, Yésuse uwɔdɔ́ŋɛ́ɛn na Piéle na Sák na Sáŋa gisɔ́nd giá Sák, uwɛɛ́d nɔɔ́nɔb agá ɔŋuɛnyɛ. 2Uwenúgie ɔgɔ́b gá eŋís, busió buég ubúɛ́d gá bunya hana ɔhɛ́nyɛ, bisɔn biég ibíond fuúm hana gise. 3Na Mɔ́sɛsa na Elí ebébíéníginye bɔ́, bɔ́ya mayɔ na Yésuse. 4Piéle uwɔgɔ́l nugálɔ, úmuanyɛ gá Yésuse áneé: «Ɔgúná búnyɛ beseé áneé digíga aga, ɔ́mɔ́ya, ŋŋaáhág bilál bídádɔ, giáhɔ gímomi, giá Mɔ́sɛsa gímomi, giá Elí gímomi.» 5Haná úmábá umanyɛ gá gálgal, gilɔnd giá gise igíéhúgígen bɔ́. Uguá gilɔnd igigányɛ, ugelu húɔya guɔ́ áneé: «Uyɔ únyaá Muɔ́n wamɛ wa ɔdɛ́m, úmuanyɛ búmaŋal beseé áneé yeyid. Ɔ́bɔ́nínɔ́n yɔ́.» 6Bebinene bɔ́mɔɔ́mɔ́b ugelu uhugányɛ, ɔbɔ́bɔmbigɔn dudúg uguísi na giandá giá bugádɔ. 7Yésuse uwakɛl uwɔbígɔ́dɔn bɔ́, úmuanyɛ áneé: «Ádígánánɔ! Nudibia bugádɔ!» 8Bámaámábilɛd eŋís, abán pɛ́ŋ Yésuse, úmuanyɛ omoómi. 9Bámaágásusan ɔŋuɛnyɛ, Yésuse uwegíndídin bɔ́: «Nudiɔyídɛ́n mɔndɔ muand umúmanúánígɛ́n, gueneg haná Muɔ́n wa mɔndɔ wánáhámánɔ́ uguá gibɛ́l.»
Mayɔ gá busió buá Elí
(Mál 9.11-13)
10Bebinene bá Yésuse obóhún yɔ́ gɔg áneé: «Gá giagɛ belinsibigodi bɔ́yɔnɔ́ áneé Elí ugódi áneé wogoguól?» 11Uwondinye bɔ́ áneé: «Ɛɛ́ɛ, Elí ugoól guond ugédehiminye muand gidigid. 12Gɔgaá yɔɔ́núɔyɔn áneé Elí umomonúguól, guond bandɔ bámasálɛns yɔ́, bámala yɔ́ buá gidigid ubuɔ́ bɔ́mɔya. Muɔ́n wa mɔndɔ súsɔ́n ugɔɔ́bígɔn uguɔ́b guá imbɔ́g.» 13Bebinene ɔbɔ́b gɔg áneé umɔyɔ́n bɔ́ buónyi buá Sáŋa eyumínyibandɔ.
Gióndúgie giá muúŋayɔ umaánúmá iŋánd
(Mál 9.14-29; Lúk 9.37-43)
14Bámaágányɛ mɔdɔg na giíŋ, mɔndɔ uwakilɛn yɔ́, uwegunsiginin yɔ́ dunúnú, úmuanyɛ gég áneé: 15«Ɔgúná, án muɔ́n wamɛ bulɔ́b, waáguan iŋánd guond wɔɔ́guɔ́bígɔn giod, woóguólúguán agá yoógi ugúnya ana uguá mimbi. 16Mmiídɛn bebinene báhɔ neéneg gɔgaá, bɔ́mɔsúguɔ́d guóndúgie yɔ́.» 17Yésuse uwɔgɔ́l nugálɔ, úmuanyɛ áneé: «Banuá gilɔg giá nunam nuá hínen na kanda guágɔdɛ́m, ŋŋabá naánanɔ gueneg nig? Yenénúgígenin ɔmbɔ́g gueneg nig? Ŋŋólínón neéneg aga.» 18Yésuse uwehiligin gilɔg giá gileénde, igíáhám uguá nuɔ́l nuá muúŋayɔ, uwedúmbie guɔ́ndɔ́ɔg hɔ́nɔhɔ́. 19Bebinene bámaámákilɛn Yésuse, bámuanyɛ gég dóbódóbó áneé: «Gúu, gá giagɛ gísadígáŋ basuá gugúŋɛ́ɛd?» 20Yésuse uwondinye bɔ́ áneé: «Gá busió buá gueleé guágɔdɛ́m guánɔ gúnyɛ bugídígíd. Gá giagiá yɔɔ́núɔyɔn buɔ́, númábia guágɔdɛ́m giandá hana nsám ya mutáld, nuɔnɔ́yidɛn ɔŋuɛnyɛ uhuɔ áneé: “Bálɔ́g aga, bínɛ́m egéné.” Gúu búánábíalanɔ́. Ta buand búmodi búdianánúgáyɛ́n. [21Súsɔ́n búnyɛ uguá mbísógóli naá uguá ŋŋenyi núnya nuá gúŋɛ́ɛd ninam niá gilɔg giá gileénde inigányɛ.»]
Yésuse wóndodógonye nigué niég na hám guég uguá gibɛ́l
(Mál 9.30-32; Lúk 9.43-45)
22Haná bémébídídíd agá tísɔna wa Galilé, Yésuse uwɔyidɛn bɔ́ áneé: «Bégeduín bandɔ Muɔ́n wa mɔndɔ, 23Bɔ́nɔ́n yɔ́, buɔ́sɛ buá gádádɔ wanáhám uguá gibɛ́l.» Gúu bebinene bámabia mesígíl hómohómue.
Na Yésuse na Piéle básuanan lampɔ́ wa idúl
24Hana béméneg agá tísɔna wa Kafalnawúm, bandɔ abáhagunanɔ́ nusámb abákilɛn Piéle obóhún yɔ́ áneé: «Ehuínyihuínyi wánɔ udiásuanan lampɔ́ wa idúl a?» 25Piéle uwondinye áneé: «Ɛɛ́ɛ, waásuanan.» Piéle úmeéméneg agá nihía, Yésuse uwebue guóhún yɔ́ áneé: «Símune, giagɛ igiɛ́ egédenyeé? Ifuŋ siá guísi síáhaguna bidɔ́bɛ́g ugúnya ana lampɔ́ wa ányá? Muá baán bɔ́b lí, muá bolué?» 26Hana Piéle úmondinye áneé: «Gá bolué,» Yésuse uwondinye yɔ́ áneé: «Ahá gɔg, baán bɔ́b bádíasuanan. 27Ahá, gá gueleé didigusínyé bandɔ abagányɛ, ídá agá máŋ, nɔh ɔlɔ́g, gimbín yɔb ihígeébuenú gumɛn ɔlɔ́g, bun hiɛ́ niíd, egeégégie ŋŋúme, gɔ́l yɛ́ ond eéŋin bɔ́, gá buámɛ busió naá gá buáhɔ.»
လက္ရွိေရြးခ်ယ္ထားမွု
Matiós 17: EKM
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ