Mateyo 5
5
Imbila pa lupili 5.1—7.29
1Ulo Yesu abwene ibumbe likulu, aile kwikala pambali ya lupili na basambi bakwe balimushingulukile, 2elo atampile ukule kubafundisha ati,
Ishuko line nene
(Luka6.20-23)
3“Bakushuka abalanda mu mitima pantu,
ebene ba Bufumu bwa mwiulu. 4Bakushuka abaloosha pantu,
bakesa kutalalikwa.
5“Bakushuka abakuikefya pantu,
bakapyana isonde. 6Bakushuka abomfwe nsala ne kilaka kya bololoke pantu,
bakesa kwikuta.
7“Bakushuka aba luse pantu,
nabo bakesa kulangwa uluse.
8“Bakushuka abasanguluke mitima pantu,
bakabona Lesa. 9Bakushuka abakita umutende pantu,
bakakuutwa abana bakwa Lesa. 10Bakushuka abo bonse abapakaswa pa mulandu wa bololoke pantu,
ebene ba Bufumu bwa mwiulu.”
11“Muli shukile ulo bamituka, ukumipakasa no kule kumibepesha ifyabufi pa mulandu we shina lyangi. 12Sekeleleni no kwanga pantu ikilambu kyenu mwiulu kilikulile, efyo bapakese na bakasesema abaliko kale.”
Umukele no lubuuto
(Mako9.50; Luka14.34-35)
13“Muli mukele wa pano Isonde. Nomba umukele nga wasunduka, wingaloweshiwa ne ndo kabili? Wa kupoosa fye no ku nyantaulwapo apo tauli kintu.
14“Muli lubuuto lwa pano isonde. Umusumba uwakulwa pa lupili taungafisama. 15Ekyo tapalipo ungasanika akatolitoli elo aputikapo inongo. Babika apakusansunka epakwebati ing'anda yonse ibuute. 16Mu musango umo wine lekeni ulubuuto lwenu lubonekele ku bantu pakwebati babone ifikitwa fyenu ifyabune no kuleka Wishinwe wa mwiulu akindikilwemo.
Yesu na mafunde
17“Mwile kutontonkanya ati naisa mukonaula mafunde nangula bakasesema, nomba naisa mu kuyafikilishapo. 18Pantu nkomyeba ati mpaka iulu ne sonde fikapita, tapakabepo ikilembo nangula akalitoni kamo akengafumishiwamo mpaka fyonse fikafishiwepo. 19Ekyo onse uwasuulapo limo pa mafunde no kufunda bambi ifyo fine, akakuutwa uwakupelekeshako mu Bufumu bwa mwiulu. Nomba uyo uleyakonka no kufundako bambi akakuutwa umukindami mu Bufumu bwa mwiulu. 20Ekyo nkomyeba, kano fye ubololoke bwenu bwakishapo pa Bafalise na bakafundisha bamafunde, nga tefyo tamwakengilemo mu Bufumu bwa mwiulu.”
Isambilisho palwa kikani
(Luka12.57-59)
21“Mwalyumfwa ifyo kyalandilwe kuba kale ati, ‘Wile kwipaya, noyo onse uwaipaya ali lingilwe ukupingulwa.’ 22Nomba nkomyeba ati, onse uwafulilwa wabo akapingulwa. Kabili onse uwaeba wabo ati, ‘We kingulyalya we,’ akaya mu kilye elo no waeba wabo ati, ‘Uli kyungwa!’ akesa kuba mu busanso bwa kupooswa mu ngehena. 23Ekyo, ulo ukoya mu kupeele kyabupe kyobe elo waibusha ati wenu alipo ne kintu ku mutima pali webo, 24ngale ushe kyabupe kyobe pantanshi ya kipailo, muye kuiwikisha na wenu elo wise kupeela ikyabupe kyobe. 25Lanshanyeni kangu kangu no mulwani obe ulo talakufisha kuli kapingula, kapingula naye ulo talakutwala kuli kalinda wa kifungo, elo naye kalinda wa kifungo kuti akupoosa mu kifungo. 26Nkomyeba mukine ati, tawakafumemo panka ukalipile indalama shonse.
Isambilosho lyapa bukende
27“Mwalyumfwa ifyo kyalandilwe ati, ‘Wile kukita bukende.’ 28Nomba nkomyeba ati, onse uwa lolesha umwanakashi no lunkumbwa lwabubi ninshi akita nakwe ubukende mu mutima wakwe. 29Ilinso lyobe lya kumulyo nga lya kulengela ukubembuka, ulilobolemo ulipoose. 30Ukuboko kobe kwa mulyo nga kwa kulengela ukubembuka, kuputuleko ukupoose. Kya kuwamina ukulufya ikilundwa kimo, ukukila ukuya ne filundwa fyonse mu ngehena.
Isambilisho palwa kulekana mu kyupo
(Mateyo19.9; Mako10.11-12; Luka16.18)
31“Kyalyebelwe ati, umwalalume onse pa kuleka umukashi, alingile ukumulembela inkalata ya kupwilapo ikyupo. 32Nomba nebo nkomyeba ati, onse uwaleka umukashi wakwe ninshi amulengela ukukita ubukende kano fye nga amusanga mu bupulumushi, no waupa uobaleka naye akita ubukende.
Isambilisho palwa milapo
33“Kabili mwalyumfwa uko abantu ba kale bayebelwe ati, ‘Wile kulapa ifyabufi, fikilisha ikyo walaya kuli Shikulu.’ 34Nomba nebo nkomyebati, Mwile kulapa nangula liulu line, pantu ekipuna kyakwa Lesa. 35Tekulapa nangula isonde pantu ekapuna ka makasa yakwe. Mwile kulapa nangula fye ni pali Yelusalemu wine pantu e Musumba wa Mfumu ikindami. 36Wile kulapa ku mutwi obe apo taungalenga umushishi umo ukutuba nangu ukufiita. 37Webo ulande fye nga ni ‘ee’ nangula ‘ayii,’ pantu ikyakukila po ninshi kyakufuma ku mubifi.
Isambilisho palwa kilandushi
(Luka6.29-30)
38“Mwalyumfwa uko kyaebelwe ati, ‘Ilinso pa linso, ilino pa lino.’ 39Nomba nebo nkomyeba ati, mwile kupansana no muntu wabubi. Umfwa umo nga kupama ulupi kwitobo lya ku mulyo umupeele ne lya kuli kipiko apameko. 40Uwakutwala mukilye pa ku fwaya ukukupokolola umwingila, leka sende ne kyakuifimba kyobe. 41Uwakupatikisha ukwenda nakwe umulundu umo, wende nakwe imilundu ibili. 42Peela ku ukokulomba, kabili wimutana uukofwaya ukwashimako kuli webo.
Ukutemwa balwani
(Luka6.27-28)
43“Mwalyumfwa uko kyalandilwe ati, ‘Temwa umunobe, umulwani obe ena umupate.’ 44Nomba nebo nkomyeba ati, temweni abalwani benu no kupepelako abakomipakasa, 45elo mukesakuba bana bakwa Wishinwe wa mwiulu, uulenga akasuba ukubalika pa babubi na pa babune, atuma imfula pa babune napa babubi. 46Nga watemwa fye abakutemwa, kilambu ndo ukwete apo fyeke fyo efikita na bakasonkesha? 47Umfwa ukoposha fye bawenu beka, nindo wakita ukukila pa bataishiba Lesa? 48Ekyo mube abakupwililika nge fyo wishinwe wa mwiulu naye aba uwakupwililika.
လက္ရွိေရြးခ်ယ္ထားမွု
Mateyo 5: ABT
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The Word For The World International