Mateyo 25
25
Umulumbe wa banakisungu ikumi limo
1“Ubufumu bwa mwiulu kuti twabupalakanya kuli banakisungu ikumi limo abasendele ututolitoli twabo abali kulolela nshibwinga. 2Pali aba bonse, basano bali bamano, elo bambi basano bali fyungwa. 3Ifyungwa fyalisendele ututolitoli umwakubulamo amafuta. 4Nomba abamano bena balisendele amafuta mu mabotolo. 5Nomba ikyo nshibwinga akokola pa kwisa, elo banakisungu bonse balitampile ukushipula mpaka baponena mutulo.”
6“Pa kati ka bushiku baumfwa inkuuta, ikoebati, ‘Nshibwinga aisa twendeni tumusekelele!’ 7Elo bonse ba alamuka no kumosha ututolitoli twabo. 8Elo ifyungwa fyaebele abamano ati, ‘Tupeelenipo amafuta pantu ututolitoli twesu fwebo tukoshima.’ 9Abanabo balibasukile ati, ‘Nafwebo tulikwetepo fye ayo tungabomfya fwebene tayengakumana na kuli mwebo. Kabuyeni fye kubashitisha pakwebati muyekuishitila fye mwe bene.’ 10Ulo ifyungwa fyaile mukushita amafuta, elo na nshibwinga naye afikile. Banakisungu basano abaipekenye balingile mung'anda ya bwinga ne kibi kyaliselweko.
11“Pa numa elo ifyungwa na fyo fyafika panse no kwamba ukukuuta ati, ‘twiswileniko mukwai.’” 12Nshibwinga naye alibasukile ati, “Nkomyeba mukine ati, Ntamishibile.”
13Ekyo mulekuba abaibukila apo tapali uwaishibila ubushiku bulya nangu kashita.
Umulumbe wa babomfi batatu
(Luka19.11-27)
14“Ubufumu bwa mwiulu kuti twa bupalakanya ku muntu umo uwakwete ababomfi batatu no ku bashiila bukangalila pa fipe fyakwe epakuya na pa lwendo. 15Alipeele kuli kila umo ukulingana na maka akwetepo. Kuli umo kwalipeelwe indalama amatalanta yasano. Na kuli umbi naye kwalipeelwe yabili elo na kuli umbi kwalipeelwe fye italanta limo. 16Uwapokele indalama amatalanta yasano aliyabikile mu bukwebo mpaka alundapo na yambi yasano. 17No wa kibili naye ailekulundapo na yambi yabili. 18Nomba uyo wa peelwe limo ena talundilepo pantu aile kwimba fye ikilindi emo afisa.
19“Ulo pa pitilepo inshita iyakulepa sana, ulya muntu alibwelele. Epakwita na babomfi bakwe pa kuti bengalondolola ifyo bali kubomfya ifyuma fyakwe. 20Uwapokele indalama amatalanta yasano, alundilepo na shimbi amatalanta yasano no kulanda ati, ‘Shikulu mwamfobweshe indalama amatalanta yasano, ekyo ndilundilepo na yambi yasano.’ 21Elo shikulu wakwe alimwebele ati, ‘Wakita bwino we mubomfi wabune kabili uwakishinka! Pali bukishinka walanga pa tunini, nkokulashika pa fya kufula. Isa wingile mukusekelela kwakwa wisokulu.’ 22Elo uwapokele indalama amatalanta yabili naye aisa ati, ‘Shikulu pa ndalama amatalanta yabili mwampeele, na lilundilepo na yambi yabili.’ 23Shikulu wakwe alimwebele ati, ‘wakita bwino we mubomfi musuma, apo waba uwakishinka pa tunini, nomba nkokulashika pa fyakufula. Isa wingile munsansa shakwa wisokulu!’ 24Nomba ku wapokele indalama italanta limo ena alyebele ati, ‘Mukwai ndishibile ati uli muntu wa kwafya pantu usombola napo tawabyele kabili ukolonganika napo tawakushile imbuto. 25Nalikwete umwenso ekyo nailekushika fye indalama shenu mu mushili. Buleni nomba indalama shenu ishi.’ 26Nomba shikulu wakwe ena alimwasukile ati, ‘we musha wabubi no bulese! Apo walishibile ati nebo nsombola apontabyele kabili nkolonganika apo ntakushile imbuto. 27Nga wantwalile indalama kuli bakasunga pa kwebati naisakusanga balimbikilepo kansonsela. 28Mupokeni indalama shakwe no kupeela kuli ulya ukwete amatalanta ikumi limo. 29Pantu onse uukwete ififulile akapokelapo na fimbi, nomba kuli uyo utakwetepo nangu kamo, akapokwa no tunini akwatapo. 30Nomba iki kingulyalya kya mubomfi kyena mukipose fye kunse mu mfinshi uko abantu bakalekulila no kusumanya ameno.’
Ubupingushi bwa kupelekeshako
31“Ulo Mwana wa Muntu akesa nge Mfumu mu bukindami pamo na bamalaika bakwe, akesa kwikala pa kipuna kyabukindami bwakwe. 32Na bantu bamishobo yonse bakakolongana ku kinso kyakwe. Elo akesa kubapatukanya mu mabumba yabili nge fyo umukemi apatukanya imbelele ne mbushi. 33Akabika abololoke ku kwa mulyo kwakwe elo imbifi kipiko kwakwe. 34Elo Imfumu ikesa kweba abakabela ku kwa mulyo kwakwe ati, ‘Iseni mwebapaalwa kuli Tata, mwingile mu Bufumu ba mipekanishishe pa kutampa fye kwe sonde. 35Nalipo ne nsala, mwalimpeleko ikyakulya, nalipo ne kilaka, mwalimpeleko amenshi. Kabili ulo nalipo umweni, mwalinsekelele. 36Ulo nabulilwe ikyakufwala mwalimfwikile, nelo nalwele mwalintenseshe. Ulo nali mu kifungo mwalimpempwilepo.’ 37Elo abololoke bakebati, ‘Ni lwisa Shikulu apo twamibwene mulyumfwile nsala, elo twamipelako ikyakulya nangula mwalipo ne kilaka elo twamipelako ikyakunwa? 38Ni lwisa ulo mwali abeni elo twamisekelela kwesu nelo mwalipo abakubulwa ikyakufwala na fwebo twaisa kumifwika? 39Ni lwisa ulo twamibwene mulilwele no kumitensha nangula mukifungo elo twamipempulako?’ 40Elo Imfumu ikasukati, ‘Pali kyonse ikyo wakitile abakukepeshapo, wakitile kuli nebo!’
41“Elo akeba abali kukipiko kwakwe ati, ‘Fumeni apa mwebakutipwa, kabuyeni ku mulilo wapee uo bapekanishishe Kiwa na bamalaika bakwe. 42Pantu nali ne nsala tamwampeleko ikyakulya, nali ne kilaka tamwampeleko amenshi ya kunwa. 43Kabili ulo nali mweni, tamwansekelele mwenu mu mayanda. Ulo ntakwete ifyakufwala, tamwamfwikile nolo nalwele, nolo nali mukifungo tamwampempwile,’ 44Elo bakesa kumwasukati, ‘Ni lwisa ulo twakubwene ulikwete insala, ne kilaka, nangula umweni, uwakubulwa ikyakufwala, umulwele nangula fye ni mukifungo ukwakubula ukukwafwa?’ 45Elo Imfumu ikesa kubebati, ‘Nkomyebati lonse ulo muta afwileko abakukepesha, ni nebo mwakanine ukwafwa.’ 46Aba bonse bakesa kupooswa mukukandwa kwa muyayaya, nomba abololoke bena ni ku mweo wa muyayaya eko bakaya.”
လက္ရွိေရြးခ်ယ္ထားမွု
Mateyo 25: ABT
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The Word For The World International