oMak 13
13
Oyi ko Kweyi ke Ese
(oMatiyu 24.1-28; oLuka 21.5-24)
1Ishini obose bwo Ole ko Owuso ni, ashe ipu ka awogboso do oka mo, <<Inofoza, me edo ka awikyikpo kpa awole neshi mani!
2Oyesu kyogwu mo, <<Ala ma awole neneshi mani? Ikyikpo oyoye aba shobita ya hagye ikweyi ko oye lo, kpiri wa ke aba yi kye sho okpagye.>>
3Ishini Oyesu yagye ikweyi ke Efu ko oZetu ni kweyi pyi iyi to ole ko Owuso ni, Obitrus kpo Oyakubu kpo Oyohana kpa Andru wa tanu kweyi do oka mo, 4<<Ka daha, ishi wonya ni awoza mani ba gbodagye? Oji ya wo oyi ni aha ba gye kamo oza mani ba yimu ko gbodagye?>>
5Oyesu ka da awa mo, <<Ala gbere, ashishe na ka gya ala egya lo. 6Ikweyi koni ase nwashika ba wa kpi iyen kweyi ba kamo, <Ami pini wa anu la,> Kweyi aba wa gyase nwashika egye. 7Ishini ala pwela ke efu kpokpo, kpo oshu ikweyi ke efu kpokpo, ala ka yoshi kwe wode lo. Oza lemani bawa gbodagye, okweyi kese ke tayayo wa wa lo. 8Okpagye oye ba kpe efu kpo okpagye oye, kweyi obula bawa kpe efu kpo obula oye. Okpagye ya ja ebe nwashika kpe emye. Awomani wo okwotu ko ose ko oma kin yoma.
9<<Ala bagye kpe era. Aba ya ala nabo da awonongbo leke kweyi aba ya ala aboshi ekpa. Ikweyin aba bya ala go obotu ka awogbolamaga kpa awose, ala ba yo olobene da awa. 10Kweyi ikyikyo oshu neshi ko Owuso ya ga akpaha ko ose kpiri. 11Ishini akwa ala kweyi bya ala ge ebe ko ke epwo, ala ka gbo otu ikweyi ko oza ni ala ba ka ni lo. Ala ko oza ni ayi ta ala okwunu ishi oni kin, ikweyi koni ala pini ba kela lalo, ke wo Omaku ko Owuso pini ya ka la.
12<<Oyene ya rotu ko oyinanu da awa ko yo ngmo, kweyi ada ki ya rotu ko oyi nu. Ayi ba wa ya akyala kpa awase ni muwa ni kweyi aba yuwa nabo da awa ko yuwa ngmo. 13Ikweyi koni, kpiri kase ba wa tela kala, ase ni ke zotu go ogwejeji, aba ngma anu she epwo koka ko Owuso.
14Inomokpa na gye mo, <<Ishini ala ba mo oza kebi hagye ebe neshi ko bye ebe kyokya wa ebeni oshu ko hagye lo ni. Kweyi awase ni ba agye ko Oyahuda na nyinya gi ikweyi ka awefu. 15Kweyi ase ni yikweyi ki inu kole nu naka sa wo okpagye kwe gipu kole ga zo ojije we ese lo. 16Kweyi ase ni yipu ke eho naka kwikye go ole ga kpo oshiye nu lo. 17Eno ni ya labi da anya ni byipu kpa anya ni bya ayi abo ni! 18Ala tinarigwu shini awoza mani naka gbodagye oshi ko oshu lo, 19ikweyi koni aweno ni ba gbo owe she eno kpiri bwi ishini Owuso ye ese wo onabani kweyi aba gyogye kpe eno oyoye ohobu kelo. 20Owoni Adole fe eno ni shigbo lalo, ashishe aba ngma anu lo. Ikweyi kawase ni oshu ni ke, ofe eno wa shigbo. 21Ipu ki ishi oni, owoni ashe ka da awo mo, <Omezaya yoma!> Kwe <Oyo oma!> Ka kyogwu lo. 22Koni awomezaya ko kame kpa awobane ko kame ba wa kweyi ba wa ya awoza ki igbashi ko gya awase ni oshu ni egya, owoni aba gege. 23Ikweyi koni ala gbera; nkwobonu kadala ojoji kpiri ime ishi oni na wa.
Owowa ko Oyi ka Asuse
(oMatiyu 24.29-31; oLuka 21.25-28)
24<<Ipu ka aweno ni ke, itikpi ko owe ni, aba ye eno ya dibu, kweyi oya ya yu lo; 25inyiwo ba shonu bwa akpa, kweyi oza ni bi ipu ka akpa ni ba ja.> #13.25 ISH 13.10; ISH 34.4 26<<Ipu ki ishi oni, ase ba mo Oyi ka Asuse ya wa bwi ipu ka akpa kpo oshu kpo igyashi. 27Kweyi oya ta ayoleho nu oleho kweyi ya wa kpa awase ni oshu ni tukpa bwa agyi ene, bwe eji kese ge eji ki iso.
28<<Byonabani, ala fu bwebe kelase ke efu ko ofigi. Ishini efu nu ya fu pepe, ala gye mo ogwa ya gbo oma. 29Ni olemani oni, ishini ala ma awoza ni ba gbodagye, ala gye mo ishi yo pee, oyofunu kowe kala. 30Nyya kadala okwokwoshi, ase ki ishi mani ba gekwu lo, sa awoza mani kpiri gbodagye. 31Iso kpo okpagye ba wa shuga, elan ke ba shuga lo.
Ashishe Gye Eno kwe Ishi lo
(oMatiyu 24.36-44)
32<<Ashishe gye eno kwe ishi lo, ka ayoleho ki ipu ki iso kwe Oyi gye lo, ke sa Ada fufunu. 33Ala gbera! Ala wi iyi kala shu! Ikweyi koni ala gyi ishi oni lo ni. 34Owowa ko Oyi ka Asuse ya lema byo ongo oye ni ya gi iyawu, kweyi sho ole nu bita do oyole nu mo ona gbole, oda ananoho oko nu, kweyi oka di inogbeho kole mo ona gbera.
35<<Mani oni, ala gbera ikweyi koni ala gye eno ni Ada kole ya kwikye ya wa ni lo, kwe onose, kwe otutehe ko otu, kwe ogwutogwu, kwe otukpokyi. 36Owoni owa onaka wa ta awo ya gbola lo. 37Oza ni nkadala mani, nka da ananoho: <Ala gbera!>>
လက္ရွိေရြးခ်ယ္ထားမွု
oMak 13: ALA
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
THE WORD FOR THE WORLD INTERNATIONAL, THE WORD FOR THE WORLD NIGERIA