oMatiyu 8
8
Ongo ni gbo Ose ki Iyiwa ni Oyesu Dano Ogege
(oMak 1.40-45; oLuka 5.12-16)
1Ishini Oyesu sa bwiso kefu ni, ewa kase gboso. 2Ongo oye ni gbose kiyiwa ni wa kwagye obutu nu, kweyi kamo, <<Adole, owoni okyogwu, oyun na pyogege.>>
3Oyesu nabo ta kweyi ganabo kamo, <<Nyya yimu, ikpiye wo na pyogege.>> Ebebeni opyogege kikpiye nu. 4Ebeni Oyesu ka danu mo, <<Kaka dashishe oza mani lo. Gebe kosapa shini na mogege wo; kweyi ozeshi do Owuso byoni ono ko Omusa kani, nawo oza ni ya shiyase kamo ogbogege.>>
Otuse Koteyi ka Adakare ko Oroma
(oLuka 7.1-10)
5Ishini Oyesu go Okapanahu ni oteyi kadakare ko Oroma webe nu, odoka shini na taabo. 6Okamo, <<Adole, oshe hin winyi gwutokpagye ole ya mowe kotata.>>
7Oyesu ka danu mo, <<Nyya wa dano ogege kikpiye.>>
8Oteyi ka adakare kamo, <<Adole, nggye koni oya wipu kole hin ni lo, kela kin, ose koshe hin ya kweyi! 9Ami abiyun wase ni yabo kawashe ni la, nkyi gba awadakare ba abo hin. Ngboshu, owoni nkadawa mana ga, aba ga, nkadawa mana wa, aba wa. Owoni nka da awayole hin mo ana yoza mani ake ba ya.>>
10Ishini Oyesu pwozani ongo mani ka ni, igbashi yokwu kweyi okada awase ni ba gboso ni mo, <<Nyya ka dala okwokwoshi, nma ashishe okpagye ki Izrayila ni gbo otuse kotata byo ongo mani lo. 11Nyya ka dala mo, ase bawa bwo okpagye nwashika bawa bagye ebe kimya kpi Ibirayi, Ishaku kpo Oyakubu Obula kiso. 12Awase ni obula kiso shu kowa akakaha ni ke, aba tuwa ya gese, ipu kebe dibu, ebeni aba kyegba kweyi ba shabo ahanu.>>
13Ebeni Oyesu kado oteyi kadakare mo, <<Gole! Oyole wo ya pyogege byoni oyotuse mo oyaweni.>> Ni, olemani oni, oshe nu pyogege kikpiye nu.
Nwashika kase ni ba Gbere ni Oyesu dawo Ogege kikpiye
(oMak 1.29-34; oLuka 4.38-41)
14Ishini Oyesu wole ko Obitrus ni, omene konya ko Obitrus gwutagye ogwudu ikweyi koni oshu yayoni. 15Ebeni Oyesu ganabo, oshu shobita. Ebebeni onyiso kweyi oyozarore danu.
16Ishini eno shani, nwashika kase ni gbose komaku bibi ni, abyuwa webe ko Oyesu. Ono omaku bibi bose shikpiye wa ishini okela dawani, kweyi awine kere na byuwa webe nu ni odawo ogege kpiri. 17Omani gbodagye shini oza ni inobane Ishaya kani na gya,
<<Oyere kaha ngma
kweyi ose ni yikpiye kaha ni yibize.>>
Awase ni Kamo aba Yimu ko Gboso Oyesu ni
(oLuka 9.57-62)
18Ishini Oyesu mewa kase nwashika shogba toni, oka dawogboso mo, ana sheyi kishu gese kanoni. 19Ebeni ashe ni ya fono ni, webe nu kweyi kamo, <<Inofoza, nyya gboso ebe kpiri ni oya gani.>>
20Oyesu ka danu mo, <<Iyawu gbogo wa ko kyanu, igbano kiso gbole wa, oyi ka Asuse ke gbole ko yikweyi tanu lo.>>
21Oye ipu kawo gboso ka danu kamo, <<Adole, kikikyo na gole gaya ada hin nyi ome nawa gboso.>>
22Oyesu ka danu mo, <<Gbosun, shase ni zela ko Owuso loni bita na nyiyiwa.>>
Oyesu yo owu loshu hagye
(oMak 4.35-41; oLuka 8.22-25)
23Ebeni Oyesu gipu kowu kinyo kweyi awogboso kanu. 24Agye lo, owu loshu nyiso ishu, ebeni owu ni tani kpi inyo yayimu koyo owu bya. Oyesu ya gbola. 25Awogboso shiyi, kamo, <<Adole, ngmaha! Inyo yayaha re!>>
26Okela dawa mo, <<Ala ni gbotuse lo ni, oji yala ba yoshi?>> Ebeni onyiso kweyi okela dowu kpo ogwa kinyo, kweyi owu hagye. 27Ango ni bebeni, igbashi yuwa kwu kweyi adoka mo, <<Ongo mani wanoho? Ome owu kpo ogwa kinyo ba pwela nu!>>
Oyesu da Ango Epa ni gbo Omaku Bibi ni Ogege ki ikpiye
(oMak 5.1-20; oLuka 8.26-39)
28Ishini Oyesu sheyi kishu gokpagye ko Ogadarin ni, ango epa ni gbo omaku bibi ni bwa amiri wa gbayi kpanu. Awozakoshi ni ashishe yagege ko bwo owe ni lo. 29<<Angmegba kweyi kamo, Oji ni oya tikpo ebe kaha, Oyi ko Owuso? Owebeni ko daha owe ome ishi ko Owuso ko daha owe naya la?>> 30Pee kpawa ebeni, aruma nwashika ba roza. 31Awomaku bibi mani bo Oyesu kamo, <<Owoni ongmaha shipu kawa mani, naha enya shini ahan gipu kawaruma mani.>>
32Oka dawa mo, <<Ala ga,>> ebeni abose gipu kawaruma, kweyi kpiri kawaruma sa bwiso kefu gipu kinyo kweyi agekwu. 33Awani ba gbeho kawaruma ni nyinya wa gipu kogya kweyi koza ni gbodagye kpa ango ni gbo omaku bibi ni. 34Ebeni kpiri kase kogya bose koga gbayi kpo Oyesu. Kweyi ishini amoni, abo mo naga shokpagye wa bita.
လက္ရွိေရြးခ်ယ္ထားမွု
oMatiyu 8: ALA
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
THE WORD FOR THE WORLD INTERNATIONAL, THE WORD FOR THE WORLD NIGERIA