oMatiyu 5
5
Awoza ni Oyesu Fu Ikweyi ke Efu ni
1Ishino Oyesu mewa kasuse ba webenu ni, otoshi giso kefu ga yagye, awogboso webe nu, 2bwebeni okwotu ko fuwoza mo:
3<<Otunehe yo kpa awase ni ba totu sun ni,
obula kiso wakakawa la.
4Otunehe yo kpa awase ni ba byotu ni,
oya shinyo shosha shuwotu.
5Otunehe yo kpa awino zikweyi iso lo,
aba rogwu kese.
6Otunehe yo kpa awo ngmemye
kpi igyini ko yoza neshi no Owuso ya yimu ni,
aba yipu.
7Otunehe yo kpa awo miyinyinyi kase,
oya miyinyinyi wa.
8Otunehe yo kpa awase ni gbotu neshi,
aba mo Owuso.
9Otunehe yo kpa awo byo yagye mene webe kasuse,
aba yuwogwu mayi ko Owuso.
10Otunehe yo kpa awase ni adawo owe
ikweyi koni ayoza ni Owuso ya yimu mana ya ni,
obula kiso wa akakawa la.>>
11<<Otunehe yo kpala ni asala esa, adala owe aki ko bibi dala ikweyi koni ala totusun ni. 12Shotunehe kpeye, koni ogba abola nyakwu iso ni, byoni adawi inobane ni wa kwobonu dala ni owe, mamani akiba dala owe.>>
Oyesu foza ikweyi ko Onwa kpo Oyoyu.
13<<Ala lema byo onwa kese mani la. Owoni onye ko onwa nyeba, oya wonwa ke? Oyashoshi ko yojije kponu kpanu kelo, aba yoshonu akiya dikpo. 14<<Ala lema byo oyoyu kese la. Ogya ni yikweyi kikpokyi ni yateba lo. 15Ase ya kwola ikwomu aheye ko ogwugwu lo. Aba hikweyi ko oka la shini onayu dananoho ipu ko ole. 16Mamani oni, oyoyu kala na gebe kasuse, shini ana moko neshi kala shini ana shiye ka Ada kala ni yiso ni.
Oyesu Foza Ikweyi Kono
17<<Ala kaze mo nwwa koyo ozafofu kono bya kwe ozafofu kawo bane lo; nwwa shini oza ni afu ni na gbodagye. 18Nyya ka dala okwokwoshi, kwiso kpese kweyi, titi kwe ofofa ipu kozafofu kono ya gebi lo sojoji kpiri gbodagye. 19Kpiri kase ni yoye ipu kono mani ni omo woleke yikyigbo kwe oki fawashe koya mani, Owuso ya yuwogwu mase leke obula kiso. Kpiri kase ni pwo ozafofu kono mani ki yoko kpanu oya wanyakwase obula kiso.
20Nyya ka dala, owoni ala yoza ni Owuso ya yimu ni nasha kawo Ofarisi kpa awofoza lalo alaba gobula kiso lo.>>
Ozafofu ko Oyesu ikweyi ka Onya kyokye
21<<Byoni ala pwo aka dawosokwu kaha nekye mo, <Ka ngmase lo, kpiri ka ase ni ngmase aba kwepwo.> 22Anani nke ya ka dala: ase ni kyanya kpo oyinanu aba kwepwo, kwikikyeni ase ni ka do oyinanu mo, <Awo shoshi yeye.> Aba byo gobutu ka awonongbo, kweyi ase ni ki yoyinanu ogwu mo, owase yeye kese oya gola ka Alekwu.
23Byoni olemani, owoni oya byeshi wa do Owuso okpe kweyi oya mo ogbela kpo oyene wo, 24Sheshi wo bita ohobu kokpe ko Ole ko Owuso. Kwikye ga yela gwo kpo oyene wo, ime owa zeshi wo do Owuso. 25Yela gwo kpo oyene wo papa ni ya byo goda kepwo ni. Yela gwo kpa anu ishini ala tayayo bowe ni, lalo oya byo gobutu kino kepwo, ino kepwo yayo nabo dino byase goruduru shini nayo toruduru. 26Nyya ka dawo okwokwoshi, oya bose lo sosore kikwiri kpiri nogbo ni.>>
Ozafofu ko Oyesu ikweyi Kebaboba
27<<Ala pwo akamo, <Ala ka beba lo> 28Nyya ka dala kpiri kase ni yiyi kwonya ki gbimoza ipu kotu nu, obeba kpanu ipu kotu nu piyoma. 29Owoni iyiwo ka abore ya byo gipu kozalabi, yo ngma tonu. Oya shoshi ko gbiyi oye shoni aba yi ikpiye kpiri atola kpiyi epa ni. 30Owoni abore wo ya byo gozalabi, yogo tonu, ashoshi shini oyo kpa abo oye, shoni agola kpa abo epa kpi ikpiye wo kpiri ni.>>
Ozafofu ko Oyesu ikweyi ko Kabo konya kpo Oba
31<<Aki kamo, <Ase ni kabo kpo onya nu kpiri na dano olobene kabo koko.> 32Ami ya ka dala mo, ase ni kabo kpo onya nu kpiri, owoni owela keba la lo, obeba piyoma, ase ni ki gbo onya oye ni kabo kpo obunu oya beba kpanu piyoma.>>
Kayo Owuso Ogwu yeye lo
33<<Ala ki pwo aka dawosokwu ka mo, <Ala ka yenegwogwa kala yi pya lo, ala byene nala gwa da Adole ni pya.> 34Ami ke yaka dala mo, ala ka gwene kpiso lo kpiri koni owebe kose Owuso, 35kwe, gwene kpo okpagye koni owebe ko hikpo nu ni, kwe gwene kpiye ko Ojerusele, koni owogya kose nyakwu ni. 36Ka gwene kpi ikweyi wo lo, oya gege ya pyo oya kikweyi wo oye yawo nehe kwe onobi lo. 37Kamo, <Ee> kwe <Aayi> ozani gogo kpo omani kpiri bwebe kobibi pini wala.>>
Ozafofu ko Oyesu ikweyi kore sosa
38<<Ala pwo akamo, <Ase ni yashe iyi ngma ana yakakanu yi ngma, ase ni yashe ahanu shu ana yakakanu shu mamani.> 39Ami ke yaka da ala, ozabibi ni ase yoni kasore lo. Owoni ashe labo akpaha kabore pya kaboshe danu naki labo anu. 40Owoni ashe ya yimu kobyo goda kepwo koyo opawo bize, yobagidi wo manu danu. 41Owoni ashe byo koshu mo ziyo kigbo oye, zega kpanu kigbo epa. 42Ase ni doka koza odanu, kweyi ka pyitikpi tase ni ya yimu ko kpoza ebewo ni lo.>>
Yimu ko Omonye-kwotu wo
43<<Ala pwo akamo, <Yimu kase ni wose wo ni kin kweyi otela kase ni wo omonyekwotu wo ni.> 44Nke ya ka dala, ala yimu ka awomonyekwotu kala, shini ala ki tinarigwu dawase ni ba dala owe ni, 45Shini ala wayi ka Ada kala ni yiso ni. Oyenose dase bibi kpase neshi, kweyi oki yo Owuso wa da aseneshi kpase bibi. 46Owoni, ala ba yimu ka awase ni ba yimu kala ni kin, ojiya wa abola kala? Awozegba ba yama ni lalo? 47Owoni oya toyene wo ogbogba kin, oji no oyaya ni yogogo kpa awase shishini? Awopeka baya mani lalo? 48Ni olemani, ala yojoji kpiri gyogye byoni Ada kala ni yiso ni yoza kpiri gyogye ni.>>
လက္ရွိေရြးခ်ယ္ထားမွု
oMatiyu 5: ALA
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
THE WORD FOR THE WORLD INTERNATIONAL, THE WORD FOR THE WORLD NIGERIA