oMatiyu 2
2
Awoziyi Bwa Ahanokyi
1Ishini amo Oyesu, Obetalami agye ko Oyahudiya, ishi oni Ohiridus wo Ose, awoziyi bwa ahanokyi gogya ko Ojerusele, 2Adoka, <<Ebenya ni amo ose kase ko Oyahuda? Aminyiwo nu ahanokyi, awa ko geyagye danu.>>
3Ishini ose, Ohiridus pwela mani ni, otunu bya, mamani awase ni bo Ojerusele kpiri ni byotu. 4Oyo oteyi kawosapa kpa awofoza kpiri ogwu kweyi duwoka mo, <<Ebenya ni, aba mo Okristi?>> 5Akyogwu mo, <<Ipu kogya ko Obetalami agye ko Oyahudiya,>> byoni inobane tani:
6<Awo Obetalami agye ko Ojuda,
ala bama bya ala wogya leke okpagye ko Ojuda la,
oteyi ke yawa bose ipu kala,
ni yawa kpogwu kawase ki Izrayila.>>>
7Ebeni Ohiridus yawoziyi ogwu teba kweyi duwoka, ishi wonya ni inyiwo mani bose. 8Mani oni, otuwoleho go Obetalami kweyi kamo, ala doka koyi mani kpera. <<Owoni ala mo, ala yun na gye shini na gageyagye danu.>>
9Ishini apwela kose kweyi ni, agboso inyiwo gbishini oga hagye ebe ni oyi yanu ni. 10Ishini ami inyiwo ni, ashotunehe. 11Ishini agipwole ni, amoyi kpi inanu Omeremu, akwagye obutu nu kweyi ageyagye danu. Abyeshi kogye yoyu, ikwiri ka azurupa, ozakpeye. 12Ni ishi wa gye kokwikye gokpagye wani, abwowe oye hoha, ikweyi koni Owuso shuwana mo, anaka gebe ko Ohiridus kelo.
Agawa gi Ijip
13Ishini awoziyi gawa ni, oyoleho ka Adole webe ki Isu ipu kana. <<Yiso, zoyi kpi inanu shini ala gogya ki Ijip, shini ala bebeni gbishini nyya ka dala eno ko shebe ni bita! Ela koni Ohiridus ya labo kowe koyo oyi ngmo.>> 14Isu takpa nyiso, zoyi kpi inanu gogya ki Ijip otu. 15Abebeni gbishini Ohiridus gekwu. Omani gbodagye byoni Adole ka bwebe ki inobane mo <<Nyya yoyi hin ogwu bwi Ijip.>>
Ongmongmo ka Ayileke
(oMak 13.9-13; oLuka 21.12-17)
16Ni Ohiridus mamo awoziyi gyegya ni, okyanya. Odawo okwunu mana yayi nongo meme ngmo kpiri ogya ko Obetalami kpo ogya ni yo pee kpanu ni. Bwa ashayi epa weye, omani gbodagye ikweyi koza ni awoziyi ka danu ishini inyiwo bose ni. 17Mani, ozani inobane ko Owuso Irimiya kani na gbodagye mo,
18<<Aha pwegba shoshu Orama,
egba shoshu kotu byobya,
Orahila ya kyegba kayi nu,
Otanu kosha, koni agekwu ni.>>
Okwikye go Onazareti
19Ishini Ohiridus gekwu ni, oyoleho ka Adole bose waka di Isu, ipu kana ogya ki Ijip. 20Okadanu mo, <<Takpa nyiso, zoyi kpi inanu, shini ala gokpagye ki Izrayila, koni awase ni ba yimu koyo olayi koyi mani ngmo ni gekwu wa.>> 21Ni olemani Isu kwikye papa gokpagye ki Izrayila kpo Oyesu kpinanu. 22Ishini opwo mo Akilayu rogwu kada nu Ohiridus wose ko okpagye ko Oyahudiya ni, oya yoshi ko gebe ni. Aki shaana mo, ona gokpagye ko Ogalili. 23Ebeni aga bagye ogya ni ayogwu mo Onazareti ni. Omani gbodagye ikweyi kela ni awobane kamo, <<Aba yogwu mowase ko Onazareti ni.>>
လက္ရွိေရြးခ်ယ္ထားမွု
oMatiyu 2: ALA
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
THE WORD FOR THE WORLD INTERNATIONAL, THE WORD FOR THE WORLD NIGERIA