oMatiyu 16
16
Awofarisi ba tikpo ko oza ki igbashi
(oMak 8.11-13; oLuka 12.54-56)
1Ebeni ashishini ka Awofarisi kpa awo Sadukiya wa, ko mo Oyesu ma kweyi ado oka mo, ona shiya awa oyi oye shini ana gye mo bwi iso ebe ko Owuso. 2Oyesu kyogwu mo, <<Owoni eno sha ala mo, <Ebe sha neshi; koni okpowuso yu, ala mo oki ebe ya shoshi.> 3Kweyi owoni owo otukpokyi, <Ebe pya ya yu koni okpowuso pya tobi kweyi owuso ya yimu ko yiwo.> Ala gyi ipya ko okpowuso, ala ke gege ko gyi ishi lo. 4Obibi kpa awobeba kese mani ba labo ko oza ko ya abo byo, ake ba pyo oza ko ya abo byo lo, so oza ni oYunana yani.>>
Ebeni oshuwa bita kweyi ganu omoma.
Akpaha Pyopyi Ikweyi ko oza fofu labi
5Ishini awogboso fese ka anoni ni, aya mo anwanyi ko byo ikyoga. 6Ebeni Oyesu ka da awa mo, <<Ala gbera, ala yawu myo kpo oyisi ka Awofarisi kpa Awosadukiya.>>
7Ebeni adiyiwa oka mo, <<Koni aha byo ikyoga lo ni?>> 8Oyesu gyo otuwa kweyi ka da awa mo, <<Ala awine ko otuse gbayayi, oji ni ala baka kpiyi kala mo koni ala byo ikyoga lo ni? 9Ala gyelo kwikyikyeni? Ala nwanyi ko ikyoga eho kpase okpaku eho, ogwugwu ema ni ala kpo sho? 10Kwe ikyoga ahapa kpase okpaku ene, ogwugwu ema ni ala kpo? 11Kwikyikyeni ala gye lo? Nyya kela ikweyi ko ikyoga la lo, ke wi ikweyi ko ozafofu ka Awofarisi kpa Awosadukiya la.>> 12Ebeni agye mo oya kela kpa awa mo ana gbera kpo ikyoga lalo, ke wo ozafofu ka Awofarisi kpa Awosadukiya la.
Obitrus kamo Oyesu pini wo Okristi la
(oMak 8.27-30; oLuka 9.18-21)
13Ishini Oyesu wo okpagye ko Okeseriya Filibi ni, oda awogboso oka mo, <<Anoho ni ase ba mo Oyi ka Asuse we?>>
14Akamo, <<Ase shishini ba mo owo Oyohana ko yo batisma, ase shishini ba mo owi Iliya, ase shishini ba mo owi Irimiya, kwe ashe ipu kawo bane.>>
15Ebeni oduwo oka mo, <<Ala ke mo nwwa anoho?>>
16Obitrus kyogwu mo, <<Owo Okristi, Oyi ko Owuso ine ko gbo layi.>>
17Oyesu ka danu mo, <<Otunehe yo kpa awo Osimo, oyi ko Oyunana! Koni ofoza mani bwe ebe ka asuse la lo, ke bwe ebe ka Ada hin ni yi iso ni. 18Ami ke ya ka da awo, owo Obitrus, ikweyi ko okpo mani pini nyya mo oda ko Owuso la, ni ikwu gboshu ikweyi nu lo. 19Nyya da awo oba kofunu ko obula ki iso. Ozani oyi gbo ese mani, ayi gbo iso oma, oza ni oyi yi ese mani ke, aba yi yi iso.>>
20Ebeni Oyesu pya awogboso akpaha ko otata mo ana ka ka da ashishe mo anu wo Okristi lo.
Oyesu ke Edo ki Ikwu ni Oya Ga ni
(Omak 8.31-9.1; oLuka 9.22-27)
21Bwi ishi oni Oyesu kwotu ko ka da awogboso mo, owo otiri shini anu na go Ojerusele, naga mo owe gogo-gogo abo ka awanyakwase, kpa Oteyi ka awosapa kpa awofono, aki ba yo ngmo, eno ko me eta oki ya nyiso.
22Obitrus ke pyo go okoka kweyi kwotu ko ka danu mo, <<Adole! Owuso ya tasuwa yo oza ni ya gbodagye kpa awo lo!>>
23Oyesu ke pyiyi mo Obitrus kweyi kamo, <<Ga sho obutun, Ibiri! Owino ya ase shikawu la, koni oya yela bya asuse byoni wo Owuso ya ya ni lalo.>>
24Ebeni Oyesu ka da awogboso mo, <<Owoni ase ni ya yimu ko gbosun, na sho yimu ki iyinu bita na zo oshi nu shini na gbosun. 25Owoni ase ni ya yimu ko olayi nu oya pye lo. Ase ni ke pyo olayi nu lo ikweyin, oya pye. 26Oji ni ase ya pye, owoni opyi iyo kese mani kpiri kweyi opyo olayi nu lo? Kwe oje yaba ni ase yayi sha kpo olayi nu? 27Koni Oyi ka Asuse ya wa ipu ki igyashi ka Ada nu kpa ayoleho nu, kweyi oya da ananoho abola ko oza ni oya ni. 28Nyya kadala okwokwoshi, ashishini kase hagye ebeni, aba gekwu lo gbi ishini Oyi ka Asuse yawa ipu ki Igabo nu.>>
လက္ရွိေရြးခ်ယ္ထားမွု
oMatiyu 16: ALA
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
THE WORD FOR THE WORLD INTERNATIONAL, THE WORD FOR THE WORLD NIGERIA