Dôm Bruk Ngak 23
23
1Phao-lô mong tapak tagôk Ginum Biai Mưdhir An thong đôm: “Pathau dei ai, di anak Pô Lingik, dahlak krung hu dok dang thong tung hatai hadah ka tal harei ni.” 2Tuk nan, gru mưliêng glong yatha A-na-nia pađar hadôm urang dang jek Phao-lô pah pabah ong. 3#Mat 23:27,28.Phao-lô đôm: “Hơic daning bah cur ƀông dêh, mưca Pô Lingik tong ong. Ong dok piêh jamrah dahlak tui hakum jakar bloh ôh ngak tui hakum jakar, thurah ka urang tong dahlak!” 4Dôm urang dang jek nan đôm: “Xaai dhao thah gru mưliêng glong yatha anưd Pô Lingik habar!” 5Phao-lô thuuk: “Pathau dei ai, dahlak ôh thau ong nan nạn gru mưliêng glong yatha; kaywa hu vak laic: ‘Jôi jhơk jhel kar pan akok bôl drei.’”
6 #
Bruk 26:5; Phil 3:5. Phao-lô thau hu tha thanôn dalam kavôm khol nhu nạn mưnuix Sa-đu-xê, tha thanôn pakan nạn mưnuix Pha-ri-si, nan ka đôm khang di anak Ginum Biai Mưdhir An: “Pathau dei ai, dahlak nạn mưnuix Pha-ri-si, anưk anưd mưnuix Pha-ri-si. Êng kaywa boh pachôm ka gruk diup vơk mưng lôg mưtai bloh dahlak gok ba tabiak pachang bican.” 7Ong birau đôm bloh, mưnuix Pha-ri-si thong mưnuix Sa-đu-xê raup jajek gaup thong Ginum biai gok klah nưh. 8#Mat 22:23; Mag 12:18; Lu 20:27.Kaywa mưnuix Sa-đu-xê đôm laic ôh hu gruk diup vơk, lijang ôh hu umat ngan yang libang halei trah; dok mưnuix Pha-ri-si yơ pakrưn abih. 9Gam bloh bruk kamlah cah prong xap brôk tagôk. Hadôm gru pato adat ka kavôm Pha-ri-si dang tagôk paraduh kati katang laic: “Khol dahlak ôh dwah ƀôh urang ni hu danuh khak haget trah. Thau min yang libang ngan umat krung hu đôm thong ong kabha haget?” 10Kaywa binhôr jajek bik gilaic hajiơng danưh, kar pan akok hôic di bôl bhap hak rup Phao-lô, birau mưng thurah ka rajabôl hwa ong tabiak truh di khol nhu thong ba tamư dalam hajai. 11Tapa mưlam hadei, Pô bhat mưrai tom Phao-lô thong bican: “Xang hatai tian! Hư krung hu ngak kaxan ka Ita tak Yê-ru-sa-lem yau halei yơ hư lijang xang ngak kaxan ka Ita tak Rô-ma yau nan.”
Mưnuix Yo Thaic padang anngak pamưtai Phao-lô
12Tal hadah, mưnuix Yo Thaic padang anngak thong hapah thong gaup laic khol nhu ôh ƀang ôh mưnhum ka tal tuk pamưtai bihu Phao-lô. 13Hu hơl pāk pluh urang krung hu tamưbha dalam anngak nan. 14Khol nhu mưrai tom dôm gru mưliêng prong thong dôm ginôr taha, đôm laic: “Khol dahlak krung hu hapah thong gaup ôh ƀang haget trah ka tal tuk pamưtai bihu Phao-lô. 15Ywa nan ka urak ni, likau di rakaya thong Ginum Biai Mưdhir An kanư di kar pan akok ba nhu trun, mưngak yau rakaya ưng athul ka atabha nhu ka raci hơl; dok khol dahlak thrap gap thudia piêh pamưtai nhu dahlau di tuk nhu mưrai tak ni.” 16Min, anưk likei xaai kamei Phao-lô thau bihu anngak nan, nan ka tamư dalam hajai brei thau dahlau ka Phao-lô. 17Phao-lô iêu tha kar puk ginôr thong đôm: “Xang ba urang dam ni mưrai tom ong pan akok kaywa nhu hu bruk ưng akhan.” 18Yau nan, kar puk ginôr ba pacei nao, mưrai tal kar pan akok thong pathau: “Radanuh Phao-lô hu likau di dahlak ba urang dam ni mưrai tom kwan kaywa nhu hu kabha haget ưng akhan.” 19Kar pan akok pan tangin urang dam, ba tabiak lingiu thong tanhi: “Hư hu bruk haget hajat akhan ka dahlak?” 20Nhu thuuk: “Dôm urang Yo Thaic krung hu tha anngak likau di kwan ba Phao-lô trun Ginum Biai Mưdhir An dalam harei paguh, mưngak yau khol nhu ưng thôi tanhi kabha ni ka tani tanat hơl. 21Min likau di kwan jôi dial khol nhu, kaywa hu hơl pāk pluh urang dalam khol nhu anngak utan Phao-lô. Khol nhu krung hu hapah thong gaup ôh ƀang mưnhum haget trah ka tal tuk pamưtai bihu Phao-lô ka; urak ni, khol nhu dok thudia, ciêt cang kwan he min.” 22Kar pan akok brei ka pacei dam nan nao thong kakei: “Jôi brei ka thei thau hư krung hu akhan kabha nan ka ita như!”
Phao-lô gok ba mưrai tom kwan pakrang nưgar Phê-lit
23Kar puk ginôr iêu dwa urang pan akok thong kakei: “Dalam thalipan tuk mưlam ni, xang thrap gap thudia dwa rituh rajabôl, tajuh pluh rajabôl đik atheh thong dwa rituh rajabôl tho hanrak piêh nao mưrai Sê-sa-rê. 24Lijang xang thrap gap atheh piêh ba Phao-lô mưrai kwan pakrang nưgar Phê-lit tha ganap throng iman.” 25Ong lijang vak ka kwan pakrang nưgar tha blah harak yau ni: 26“Kơ-lôt Li-si-a taka paywa ong kwan pakrang nưgar Phê-lit. Xalam ong kwan pakrang nưgar! 27Mưnuix Yo Thaic krung hu mưk urang ni, jarô pamưtai yơ dahlak thumu ba jabôl mưrai talơh taleh, kaywa thau laic nhu lijang nạn bôl Rô-ma. 28Dahlak ưng thau pajip gađi gadha khol nhu palek palam nan yơ ba nhu mưrai Ginum Biai Mưdhir An. 29Dahlak tôk ƀôh nhu gok palek palam ka dôm masalah baxa tal adat caƀat khol nhu, min ôh tanrok tha glaic halei đang mưtai ngan đang gok jam ô. 30Min dahlak hu hamit mưnuix urang padang anngak utan nhu nan yơ binhêt ba nhu mưrai pak kwan; thong dahlak lijang thurah ka dôm mưnuix batha xang mưrai pak anak kwan piêh yah yaic panôic hakum.”
31Yau nan, bôl bala pang gon, ba Phao-lô nao tuk mưlam, bloh ba mưrai An-ta-pa-tri. 32Harei hadei, rajabôl đik atheh kakal nao thong ong, dok dôm kavôm pakan gilaic mai hajai. 33Tuk tal Sê-sa-rê, khol nhu ba harak thong Phao-lô mưrai di anak kwan pakrang nưgar. 34Hadei di tuk pôic blah harak, kwan pakrang nưgar tanhi Phao-lô palei pak nưgar halei; tuk thau ong mưdok Si-li-si 35yơ đôm: “Tuk halei dôm urang pathau yak mưrai tak ni, mưca ita jamrah bruk hư.” Bloh kwan pakrang nưgar thurah jam Phao-lô dalam mưdhir Hê-rôt.
လက္ရွိေရြးခ်ယ္ထားမွု
Dôm Bruk Ngak 23: CJM2024
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2024 Bible Society Vietnam. All rights reserved.