II Kô-rir-tô 11
11
Phao-lô thong dôm xêh pachai baniai
1Cong haget dei ai dadôn gruk hanrôi taba dahlak tha xit! Njaup, dei ai hajiơng dadôn. 2Kaywa dei ai, dahlak mưrau thong boh mưrau anưd Pô Lingik, kaywa dahlak krung hu pakhing dei ai ka tha urang pathang ralai, biđang ƀok dei ai yau tha kamei kanưrup mưraci ka Dê Krist. 3Min dahlak hôic laic, yau Ê-va gok ula angui luic palwô pagat yau halei, yơ thangka dei ai lijang gok ragi, lihik gruk tapak tape [thong haci hacih]#11:3 [thong haci hacih]: Dalam tha thanôn blah vak tangin ôh hu dôm akhar ni. jom thong Dê Krist yau nan. 4Kaywa, mưyah hu thei mưrai lang yah ka dei ai tha Yê-su pakan thong Pô Yê-su bloh khol dahlak krung hu rao lang, ngan mưyah dei ai tôk tha yang pakan thong Pô Nưbi Ginrơh dei ai krung hu takabal tha khao siam pakan thong Khao Siam dei ai krung hu takabal, yơ kardak dei ai lijang thudia halar ciup! 5Dahlak xanưng laic, dahlak ôh nje haget dôm Xêh Pachai xagta jai dêh ô. 6Panôic đôm dahlak hu mưda nje đôic gor, min kalimah yơ ôh nje ô. Dahlak krung hu sahadah pajip kabha ni dalam graup atabha thong di krưh abih drei.
7Dahlak hu xwel haget tuk aneh drei trun piêh ka dei ai bihu papôk glong? Ngan tuk êng halar rao lang Khao Siam Pô Lingik ka dei ai min ôh đôk haget? 8Dahlak krung hu papơh mưk mưng dôm Nhom Nưbi pakan, mưng ganap tôk hadai pabrei anưd khol nhu piêh ragxa dei ai. 9#Phil 4:15-18.Dalam tuk vag mưdok thong dei ai, gōk tuk hal val, dahlak ôh ngak mưduh thei, kaywa dôm dei ai mưdok pak Ma-xê-đô-ni-a krung hu mưrai biyar tal dôm hanư jat anưd dahlak. Pathar pathar bruk haget, dahlak lijang khik piêh ôh ngak anong trak ka dei ai, thong mưca kưk ngak yau nan. 10Lijang yau tantu Dê Krist dok dalam dahlak, ôh thei dalam dôm bhum A-cai ni hu mưda ngak ka dahlak lôi mưyeh mưyom ka kabha ni. 11Ywa habar yau nan? Kaywa dahlak ôh anit ranam dei ai kaic? Hu Pô Lingik thau! 12Min kabha dahlak krưh dok ngak, mưca dahlak kakal ngak, piêh nưh klāk barat anưd dôm ra dwah barat mưyeh drei laic khol nhu lijang yau khol dahlak. 13Kaywa dôm ra yau nan nạn xêh pachai baniai, dôm urang ngak kong palwô pagat, baniai ngak Xêh Pachai Dê Krist. 14Halei hu crih haget, bahkan Sa-tan lijang baniai ngak umat hadah hadai. 15Ywa nan ka dôm halun nhu baniai ngak halun anưd gruk kahanôt yơ lijang ôh crih haget. Taluic mưca khol nhu tôk kamnat jhak lek thong bruk khol nhu krung hu ngak.
Gruk hit thong gruk raƀi raƀưp anưd Phao-lô
16Dahlak pahadar vơk, jôi thei xanưng ka dahlak nạn ra hanrôi taba; min mưyah dei ai krung hu xanưng yau nan, yơ xang halar ciup dahlak yau ra hanrôi taba, piêh dahlak lijang bihu mưyeh mưyom đơ xit. 17Kabha dahlak dok đôm ôh njaup nạn dôm haget Pô ưng dahlak đôm, min đôm yau tha urang hanrôi taba bak parcaya mưyeh mưyom. 18Kaywa hu ralô urang mưyeh mưyom tui jalan rilo darah yơ dahlak lijang mưca mưyeh mưyom. 19Kaywa dei ai brei ka drei nạn dôm urang jag karag, gilaic bui tian dadôn dôm ra hanrôi taba. 20Njaup, dei ai bhian dadôn mưyah mưnuix urang mưk dei ai ngak halun kloh, ƀang lôn dei ai, poh blah dei ai, paong ngan apah tamư ƀok dei ai. 21Dahlak mưk ngak tachaup ƀok bloh đôm laic khol dahlak krung hu hadah tabiak lateh dalam bruk ni. Min pathar pathar urang halei khin mưyeh mưyom ka kabha haget, yơ đôm yau tha urang hanrôi, dahlak lijang khin mưyeh mưyom ka kabha nan.
22Khol nhu nạn mưnuix Hê-ƀrơ kaic? Dahlak lijang yau nan. Khol nhu nạn mưnuix I-sra-ên kaic? Dahlak lijang yau nan. Khol nhu nan talei pajeh Ap-ra-ham kaic? Dahlak lijang yau nan. 23#Bruk 16:23.Khol nhu nạn dôm halun Dê Krist kaic? – Dahlak đôm yau tha urang hanrôi – dahlak dok hơl di khol nhu vơk! Dahlak krung hu ciup gleh glar ralô hơl, danuh glaic ralô hơl, ƀang havei ô hakê, ralô ƀang xit tra klāk rup. 24Limư ƀang gok mưnuix Yo Thaic tong mưng havei, yāup ƀang u tha havei bak pāk pluh; 25#Bruk 16:22. Bruk 14:19.klau ƀang gok tong; tha ƀang gok glam patau; klau ƀang gok karam gilai, tha mưlam tha harei thơk jai ngok tathik. 26#Bruk 9:23. Bruk 14:5.Dalam ralô binhôr adhwan, gōk ajandi ngok krong tathik, ajandi thong ra poh blah, ajandi thong bôl drei, ajandi thong mưnuix Bôl-Lingiu, ajandi dalam mưdin, ajandi pak lingiu bhum kamrang, ajandi ngok tathik prong, ajandi thong dôm ra baniai angan dei ai, 27ciup gleh ciup glar, ralô tuk mưdơh mưlam, ciup ơk ciup mưhu, dôm ƀang ưn di ƀang, ciup lian langoh, mưlun pun. 28Ô ka hakê dôm bruk pakan, bhian harei dahlak xang uh tarak ka abih Nhom Nưbi. 29Halei hu thei kre bloh dahlak ôh kre ô? Halei hu thei hanek jalơh bloh tian dahlak ôh yau am yau cuh ô?
30Mưyah xang mưyeh mưyom, mưca dahlak mưyeh mưyom ka dôm kre dahlak. 31Pô Lingik, Amư anưd Pô nạn Pô Yê-su, nạn Dê đang pôk mưyom rit rai, thau laic dahlak ôh đôm lor. 32#Bruk 9:23-25.Tak Đa-mac, kwan pakrang nưgar bha gon patao A-rê-ta brei khik mong dhan Đa-mac piêh mưk dahlak. 33Min dahlak krung bihu pateng trun dalam tha boh lii, mưng baƀang kathô thôi daning dhan, thong dahlak krung hu klah truh di tangin ong nan.
လက္ရွိေရြးခ်ယ္ထားမွု
II Kô-rir-tô 11: CJM2024
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2024 Bible Society Vietnam. All rights reserved.