انجیلِ یوحنا 11

مُردِه‌نِ ایلعازَر

1پیائی وِ نُومِ ایلعازَر مریض بی. او دِ مردِمِ بِیت‌عَنیا، آبادی مریم وَ خُووَرِش مارتا بی. 2مریم هِه او زنی بی کِه رِغُونِ خُوشبو رِخت وِ ری پایا خداوند، وَ وا گیس‌یاش پایا او نِه حُشک کِرد. ایسِه بِرارِش ایلعازَر مریض بی. 3پس خُووَریا ایلعازَر پِیغُوم کِل کِردِن سی عیسی، گُتِن: «اِ خداوند، دوسِ عزیزِت مریض اَ.» 4عیسی هِه کِه ایی خَوَرِ نِه اِشنَفت، گُت: «ایی مریضی عاقُوَتِش مرگ نی، بَلکم سی جِلالِ خدا اَ، تا کُرِ خدا وِ واسطَه وَه، جِلال پیا بَکَه.» 5عیسی، مارتا وَ خُووَرِش وَ ایلعازَرِ نِه دوس داشت. 6پس هِه کِه اِشنَفت کِه ایلعازَر مریض اَ، دو رو هَنی مَن دِ او جائی کِه بی.

7اوسِه وِ شاگردیاش گُت: «بیایت هَنی رِیمُو وِ یهودیَه.» 8شاگردیاش وِش گُتِن: «استاد، چیئی دِش نَرَتَه کِه یهودیُو می‌حاسِن سنگسارِت بَکَن، وَ تو هَنی می‌حای رُوئی وِ اوچِه؟» 9عیسی جُئُو دَه: «مَر روز، دُوازَه ساعت نی؟ اَر کسی دِ روز رَه رُوئَه، پاش وِ چیئی گیر نِمی‌کَه کِه بِفتَه، سی یَکِه نیرِ ایی دنیا نِه مِئینَه. 10اما اَر کسی دِ شُو رَه رُوئَه، پاش گیر می‌کَه وِ چیئی وَ مِی‌فتَه، سی یَکِه نیر دِ "شُو" نی.» 11دِما ایی قِصَه‌یا، وِشُو گُت: «دوسِمُو ایلعازَر حُفتیئَه، اما مِه مِی‌رِم، کِه دِ خُوو بیارِش بَکِم.» 12شاگردیاش وِش گُتِن: «آقا، اَر او حُفتیئَه، خو موئَه.» 13اما عیسی دِ مرگِ او قِصَه می‌کِرد، دِ حالیکِه شاگردیاش گِمُو می‌کِردن منظورِ عیسی یِنَه‌آ کِه ایلعازَر حُفتیئَه وَ استراحت می‌کَه. 14اوسِه عیسی آشکارا وِشُو گُت: «ایلعازَر مُردَه. 15وَ وِ سُنَه شِما خُشالمِ کِه اوچِه نِویئِم، تا ایمُو بیاریت. اما ایسِه رُوئیم وِ تِه‌ش.» 16توما، کِه معروف بی وِ لِفُونَه، وِ باقی شاگردیا گُت: «بیایت اِیما هَم رِیمُو تا وا او بَمیریم.»

مِه قیامت وَ حیات هیسِم

17هِه کِه عیسی رَسِس وِ اوچِه، فَمِس کِه چهار روز اَ کِه ایلعازَر نِه نِئانَه دِ قُور. 18بِیت‌ِعَنیا نِزیکِ نیم فَرسَخ وا اورشلیم فاصلَه داشت. 19بُری‌وُشُری دِ یهودیُو اُومایینی وِ تِه مریم وَ مارتا، تا وِنُو نِه سی مُردِه‌نِ بِرارِشُو ‌دِل‌گُوَه بِئَن. 20هِه کِه مارتا اِشنَفت کِه عیسی وِ اوچِه می‌آیَه، رَت وا نِهاش، اما مریم مَن دِ حُونَه. 21مارتا وِ عیسی گُت: «اِ خداوند، اَر ایچِه بیئی بِرارِم نِمی‌مُرد. 22اما دُونِم کِه هِه ایسِه هَم هَر چی دِ خدا باحای، خدا وِت مِی‌ئَه.» 23عیسی وِش گُت: «بِرارِت زِنَه موئَه.» 24مارتا وِش گُت: «دُونِم کِه دِ روزِ قیامت زِنَه موئَه.» 25عیسی گُت: «قیامت وَ حیات مِه‌نِم. وَه کِه وِ مِه ایمُو بیارَه، حتی اَر بَمیرَه، دُوارَه زِنَه موئَه. 26وَ هَر کَه زِنَه‌آ وَ وِ مِه ایمُو دارَه، هرگز نِمی‌میرَه. یَه نِه باوَر می‌کی؟» 27مارتا گُت: «بله، آقا، مِه ایمُو اُوِردِمَه کِه تو مسیحِ موعودی، کُرِ خدا، هِه وَه کِه بایِس مِی‌اُوما وِ دنیا.»

28یَه نِه گُت وَ رَت وَ خُووَرِش مریمِ نِه هِنا کِرد، دِ غَلوَت وِش گُت: «اُستاد ها ویچِه وَ تو نِه هِنا می‌کَه.» 29مریم هِه کِه یَه نِه اِشنَفت، دَرجا وِریسا وَ رَت وِ تِه عیسی. 30عیسی هَنی نِمایی وِ مینِ آبادی، بَلکم هَنی دِ او جاکَه بی کِه مارتا رَتی وِ دیئِه‌نِش. 31یهودیُونی کِه واردِ مریم دِ حُونَه بییِن وَ او نِه دِل‌گُوَه مِی‌دَن، هِه کِه دیئِن مریم دَرجا وِریسا وَ کِرد وِ دَر، دِ دُمِش اُفتان وِ رَه. گِمُو می‌کِردِن ها رُوئَه وِ سَر قُور، تا دِ اوچِه بَگِریوَه. 32هِه کِه مریم رَسِس وِ اوچِه کِه عیسی بی، وَ او نِه دی، اُفتا وِ پایاش وَ گُت: «آقا، اَر ایچِه بیئی بِرارِم نِمی‌مُرد.» 33هِه کِه عیسی دی کِه مریم ها می‌گِریوَه، وَ یهودیُونی کِه واردِش اُومایینی هَم ها می‌گِریوَن، دِ مینِ خُوش منقلب بی وَ سخت پَریشُو بی. 34پُرسی: «او نِه کجا نِئائیتَه؟» وِنُو وِش گُتِن: «آقا، بیا وَ سِیل کُو.» 35عیسی گِریوِس. 36اوسِه یهودیُو گُتِن: «سِیل بَکیت چَنی او نِه دوسِ داشتَه!» 37اما قَری دِشُو گُتِن: «مَه وَه کِه چَش‌یا او پیا کورِ نِه واز کِرد، نَتُونِس کاری بَکَه ایلعازر نَمیرَه؟»

زِنَه‌بی‌یِه‌نِ ایلعازَر

38اوسِه عیسی، دُوارَه منقلب بی، اُوما وِ سَرِ قُور. قُور، اِشکَفتی بی، وَ هُوگِلِه‌ای نِئائینی ری دَهَنَه‌ش. 39عیسی گُـت: «هُوگِلَه نِه وِرداریت.» مارتا خُووَرِ مُردَه گُت: «آقا، الان دَ بوگَن کِردَه، سی یَکِه چهار روز دِش رَتَه.» 40عیسی وِش گُت: «مَر وِت نَگُتِم کِه اَر ایمُو داشتوئی، جِلالِ خدا نِه مِئینی؟» 41پس هُوگِلَه نِه وِرداشتِن. اوسِه عیسی سیل کِرد وِ بالا وَ گُت: «بُوَه، تو نِه شکر می‌کِم کِه مِه نِه اِشنَفتی. 42مِه دُونِسِم کِه همیشَه مِه نِه می‌‌شنُوی. اما یَه نِه وِ سُنَه مردِمی گُتِم کِه اِیسانَه ایچِه، تا باوَر بَکَن کِه تو مِه نِه کِل کِردیَه.» 43یَه نِه گُت وَ اوسِه وِ دَنگِ بُلِن هِنا کِرد: «ایلعازَر، بیا وِ دَر!» 44اوسِه او مُردَه، دَس وَ پا بستَه دِ کَفِه وَ لَچِکی دُورِ ریش پیچِسَه، کِرد وِ دَر. عیسی وِشُو گُت: «او نِه واز بَکیت وَ بِئیلیت رُوئَه.»

نَشخَه کُشتِه‌نِ عیسی

45اوسِه بُری‌وُشُری دِ یهودیُو کِه اُومایینی وِ دیئِه‌نِ مریم وَ کارِ عیسی نِه دیئینی، وِش ایمُو اُوِردِن. 46اما قَری دِشُو رَتِن وِ تِه علما فِرقَه فَریسی، وَ وِنُو نِه دِ او چیئی کِه عیسی کِردی، واخَوَر کِردِن. 47پس سَرُونِ کاهِن‌یا وَ فَریسی‌یا نِشِسِن وِ شُور، گُتِن: «چی بَکیم؟ ایی پیا، نِشُونَه‌یا وَ معجزَه‌یا زیادی می‌کَه. 48اَر بِئیلیم هِه چِنی پیش رُوئَه، گِرد وِش ایمُو میارَن، وَ رومی‌یا میان، ایی جا وَ ایی ملت نِه دِ دَسِمُو دِرمیارَن.» 49اما یَکی دِشُو، وِ نُومِ قیافا، کِه دِ او سال کاهِنِ اعظم بی، وِ باقی گُت: «شِما هیچ نُئُونیت 50وَ فکر نِمی‌کیت کِه صِلاتُو دِ یِنَه‌آ کِه یِه نفر سی قوم بَمیرَه، تا یَه کِه گِردِ ملت نابود بوئَن.» 51اما ایی قِصَه دِ خُوش نِوی، بَلکم سی یَکِه دِ او سال، کاهِنِ اعظم بی، چِنی نبوت کِرد کِه عیسی سی ملت می‌میرَه، 52وَ نَه تَنیا سی ملت، بَلکم تا بَچُونِ خدا نِه کِه تَرفِه‌تین بینَه، دِ یِه بدن جمع بَکَه. 53پس دِ او روز وا دِما، نَشخَه‌یا کَشیئِن تا او نِه بَکُشَن.

54زوتا عیسی دَ آشکارا دِ مینِ یهودیُو آمَدوُشُد نِمی‌کِرد، بَلکم رَت وِ شهری وِ نُومِ اِفرایِم، دِ منطقه‌ای نِزیکِ بیاوُو، وَ وا شاگردیاش مَن دِاوچِه.

55هِه کِه عیدِ پِسَخِ یهودیُو نِزیک بی، بُری‌وُشُری دِ جایا جورواجور، رَتِن وِ اورشلیم، تا آدابِ پاکی وِرَز عیدِ پِسَخِ نِه بیارَن وِ‌جا. 56وِنُو مِنی عیسی می‌کِردِن، وَ هِه چِنُو کِه دِ صحنِ معبد اِیسایینی، وِ یَکتِری می‌گُتِن: «چی گِمُو می‌کیت؟ یعنی هیچ سی عید نِمیا؟» 57اما سَرُونِ کاهِن‌یا وَ فَریسی‌یا، دستور دِئینی کِه هِه کِه کسی بَفَمَه عیسی ها کجا، خَوَر بِئَه تا بِئیرَنِش.

လက္ရွိေရြးခ်ယ္ထားမွု

انجیلِ یوحنا 11: NLB

အေရာင္မွတ္ခ်က္

မၽွေဝရန္

ကူးယူ