کاریا رسول‌یا 6
6
هفت نفر سی خدمت انتخاب موئَن
1دِ ایی روزیا هِه کِه وِ شِمارِ شاگردیا اضافَه مِئی، یهودیُونِ یونانی‌زِوُو دِ یهودیُونِ عِبرانی‌زِوُو گِلِه‌ئی کِردِن کِه وِ آفِرَت‌یاشُو دِ جیرَه روزُونَه خوراک، بی‌مَحَلی موئَه. 2اوسِه او دُوازَه رسول، گِردِ شاگردیا نِه هِنا کِردِن وَ گُتِن: «یَه سی اِیما دُرِس نی کِه دِ موعظَه کلُومِ خدا دَس وِرداریم وَ بِفتیم وِ بَر کِردِه‌نِ خوراک. 3پس بِرارُو، بیایت دِ مینِ خُوتُو هفت پیا خُوشنُوم کِه پُر دِ روح‌القدس وُ حکمت بان سَوا بَکیت تا ایی کارِ نِه بِئیمُو وِ دَسِشُو. 4وَ اِیما خُومُو نِه وَخمِ دعا وَ خدمتِ کلُومِ خدا می‌کیم.»
5ایی قِصَه وِ دِلِ همَه‌شُو نِشِس. اوسِه اِستیفان نِه کِه پیائی بی پُر دِ ایمُو وَ روح‌القدس، واردِ فیلیپُس، پُرُوخُرُوس، نیکانُور، تیمُون، پَرمیناس وَ نیکُولائوس، کِه دِ یهودی‌بی‌یَه‌یا اَنطاکیَه بی، انتخاب کِردِن. 6ایی پیایا نِه وِ تِه رسول‌یا اُوِردِن وَ رسول‌یا دعا کِردِن وَ سی خدمت ریشُو دَس نِئان.
7وَ هِه چِنی کلُومِ خدا دِ همَه جا اِعلُوم مِئی وَ شِمارِ جمعیتِ شاگردیا دِ اورشلیم ری وِ زیادی مِی‌رَت، وَ بُری‌وُشُری دِ کاهِن‌یا هَم ایمُو اُوِردِن.
گرفتار بی‌یِه‌نِ اِستیفان
8اِستیفان پُر دِ فیض وُ قُوَت بی وَ معجزَه‌یا وَ نِشُونَه‌یا گَپی دِ مینِ مردِم می‌کِرد. 9اما قَری دِ اعضا کنیسِه‌ای کِه وِ کنیسَه آزاد‌بی‌یَه‌یا معروف بی، کِه دِ یهودیُونِ قیرَوان وَ اِسکندریَه وَ هَم قَری دِ مردِمُونِ کیلیکیَه وَ منطقَه آسیا بییِن، وِریسان وَ نِئان وِ بحث‌کِردِه واش. 10اما دِ بِرُووَرِ حکمت وُ روح‌القدس کِه اِستیفان وا وَه قِصَه می‌کِرد، نَتُونِسِن بِسَن. 11پس قَری نِه بی‌کِشکی آنتریک کِردِن تا بُوئَن: «اِیما اِشنَفتیم، کِه اِستیفان وِ موسی وَ خدا کِفِر می‌کِرد.»
12وِنُو مردِم وُ معلم‌یا تورات وُ عُلَما نِه آنتریک کِردِن وَ رِختِسِن وِ سَرِ اِستیفان، او نِه گِرِتِن وَ اُوِردِن وِ شُورا یهود. 13قَری شاهدِ دِروکِنی هَم اُوِردِن کِه می‌گُتِن: «ایی پیا گِری دِ قِصَه کِردِه وِ تیشکِ ایی جا مقدس وَ شریعتِ یهود نِمی‌کُمِئَه، 14سی یَکِه خُومُو اِشنَفتیم کِه می‌گُت عیسی ناصری ایچِه نِه خِرُو می‌کَه وَ آیین‌دایین‌یائی کِه موسی وِ اِیما سِپُردَه، عِوَض می‌کَه.» 15دِ ایی موقَع گِردِ حاضریا دِ شُورا گِز بُریئِن وِ اِستیفان وُ دیئِن ریش بی‌یَه هِه چی ری فرشتَه‌یا.
လက္ရွိေရြးခ်ယ္ထားမွု
کاریا رسول‌یا 6: NLB
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
@ 2024 Korpu Company