Ukufuma 15
15
Ulwimbo ulwa Mozesi
1 #
Ubv. 15.3
Po u Mozesi naba Izilayeli bakamwimbila u Mwene ulwimbo ulwakuti,
“Nkwiza pakumwimbila u Mwene,
pakuti alanjizya ubupoti bwache ubukulu nkani
akazisumbila ifalasi poka na bendezya ingolo munyanja.
2 #
Mas. 118.14; Yes. 12.2 U Mwene we maka ghane,
nu lwimbo lwane,
sona aba bupoki bwane.
We Chala wane, po nkwiza pakumupala,
u Chala uwa tata wane,
sona nkwiza pakumukwezya.
3U Mwene wabwite uwamaka,
itabwa lyache we Mwene.
4“Akazisumbila ingolo izya bwite na basilikali aba Falabo munyanja,
akabibizya abasilikali bache abamaka mu Nyanja Inchesamu.
5Inyanja inyibizu yabakupikila
badwiba pasi ngati libwe.
6Wee Mwene, inyobe yako indilo,
yamaka nkani,
yabatizannya abalwani.
7Mubukulu bwako ubwamaka,
ukabasumbila pasi abalwani bako.
Nu bukali bwako ubwakwaka ngati moto,
ukabocha ngati lisote.
8Nu muyi uwa mumpuno zyako,
amizi ghakabungana poka.
Amizi aghakwenda ghakimilila ngati lubumba,
sona ghakakala nkani pasi panyanja.
9Umulwani yula akati,
‘Nkwiza pakubachimbizya nukubalema.
Nkwiza pakubugabannya ubukabi bwabo,
nukusenda vyosi vivyo nkuvilonda.
Nkwiza pakuwesa upanga wane,
nukubanangannya ni nyobe yane.’
10Ukaputila umuyi wako,
po inyanja yikabibizya,
bakadwiba ngati chela mu mizi aghamaka.
11“Wee Mwene, nkimba alipo u chala uyunji, yuyo ayanite nawe?
Nkimba wewenu ayanite nawe,
we muchindikiwa sona we muzelu?
Nkimba wewenu angayana nawe,
pakupela ivyika ni viswigho?
12Ukayigholosya bulo inyobe yako indilo,
po ichisu chikabamila abalwani bitu.
13“Mulughano lwako
lulo lutakupotwangapo nalumolumo,
ukabalongolela abantu bako
babo ukabatabula.
Na maka ghako amakulu, ukabalongozezya
kubuzilo bwako ubuzelu.
14Abantu aba inko izinji bivwa zinizi
sona bakutetema nubogha.
Ubogha ubukulu nkani bwabalema aba Filisiti.
15Abamwene aba mu Edomu ubogha bwabalema,
abalongozi aba mu Mowabu bakutetema nubogha.
Abantu bosi aba mu Kenani basunguluka nubogha.
16Ulutente nubogha ubukulu nkani vyabawila.
Pachifukwa icha maka ghako amakulu,
abene bali myee ngati libwe
mupaka abantu babo ukabatabula badumusannyepo.
17Ukubinjizya nukubikazya pighamba lyako,
ubuzilo bubo awe we Mwene ubusalite pakuba buzilo bwako,
Ubuzilo Ubuzelu
bubo awe ukabuzenga.
18U Mwene akwiza pakulaghilagha bwila na bwila.”
Ulwimbo ulwa Miliyamu
19Bo ifalasi izya Falabo, ni ngolo izya bwite, sona na bendezya ngolo badwiba munyanja, u Mwene akayinyosezya inyanja mubuzilo bwache. Loli aba Izilayeli bakaloboka inyanja pachisu ichumizu. 20U Miliyamu umulaghuzi umukolo, umuyemba uwa Aloni akasenda ichisekeseke chache, po bope abakolo bosi bakamukonka nukulizya visekeseke vyabo nukwimba. 21Po u Miliyamu akabimbila ulwimbo ulwakuti,
“Mwimbile u Mwene
pakuti alanjizya ukupota ukukulu nkani.
Ifalasi na bakukwelapo abasumbila munyanja.”
Nizya mizi aghakubaba
22Po u Mozesi akabalongolela aba Izilayeli ukwepapo pa Nyanja Inchesamu nukwinjila munkolongo iya Shuli. Bakenda amasiku matatu ukusita ukughagha amizi. 23Bo bafika pa Mala, bakapotwa pakung'wela amizi pabuzilo bulabula pachifukwa ichakuti amizi ghala ghakubabagha. Ichi cho chifukwa ubuzilo bula bukwitiziwanga ukuti Mala.#15.23 Mala: Itabwa ili mu Chihebeli kokuti, Ukubaba. 24Abantu bala bakilumbusya nu Mozesi nukumulalusya ukuti, “Nkimba tukwiza pakung'wela ichoni?”
25Po u Mozesi akamulilila u Mwene po u Mwene akamulanjizya akakwi. U Mozesi akakasumbila mumizi akakwi kala, po amizi ghakaleka pakubaba.
Palapala u Mwene akabapa abantu bala ululaghilo ulukafu nkani nukubayela 26akati, “Nanti mukunyivwila ane nukubomba zizyo ngolosu pakukonka indaghilo zyane nukwivwila akiza vyosi vivyo nkubalamula, ntakwiza pakubafunda nu bubine ukuyana namumo nkabafundila aba Ijiputi. Pakuti ane ne Mwene, yuyo akubapozya.”
27Pisinda pache bakafika pa Elimu, papo pakaba imbwibwi 12 sona namakwi 70 agha mabale. Palapala bakazengapo ivisakasa vyabo mulubazu ulwa mizi.
လက္ရွိေရြးခ်ယ္ထားမွု
Ukufuma 15: LMB2024
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Lambya Bible © Bible Society of Malawi, 2024.