2 Aba Kolinti 8
8
Ukupa umwakusita ukumamilizya
1 #
Lom. 15.26
Bakamu bitu, tukulonda mumanye nizya chisa icha Chala, chicho alanjizya muvipanga ivya mu Makedoniya. 2Napapo bakakomana ni njelo inkulu nkani, loli bakahoboka nkani, umwakuti bakapa umwakusita ukumamilizya, napapo bakaba bapina nkani. 3Pakuti nkubasimikizya ukuti bakapanga ukuyana na maka ghabo, sona lumo nukuchilapo amaka ghabo. Mubwighane ubwabo nu bwabo 4bakatulaba ukuti bope tubape ulusako ulwa kubavwa abantu abazelu aba Chala aba mu Yudeya. 5Bakabomba ukuchila namumo tukasubilagha. Ichakwanda bakiyipa bene kwa Mwene, ichabubili bakiyipa kukwitu mubwighane ubwa Chala. 6Po tukamulaba u Titi, yuyo akanda imbombo iyi ukuti endelele pakuyibomba, sona nukuyimalizya imbombo iya chisa iyi mumwinyu. 7#Ukf. 16.18Amwe mwe bakabi nkani muvintu vyosi. Mwe bakabi mulwitiko, na mukanenele, na mumahala, na mukwiyipa kwinyu pakutwavwa, sona na mulughano lwinyu papitu.#8.7 mulughano lwinyu papitu: Amasimbo ghamo aghakale ghasimbite ukuti ulughano lwitu papinyu. Polelo tukulonda ukuti namwe bulo mubanje mwe bapi pambombo iya lughano iyi.
8Pakunena zinizi intakubalamula, awe. Loli nkulonda pakubuyela ubwanaloli ubwa lughano lwinyu pakufwanikizya nu bwanaloli ubwa lughano ulwa bantu abanji. 9Pakuti muchimenye ichisa icha Mwene witu u Yesu Kilisitu. Napapo akaba mukabi, loli akaba mupina pachifukwa icha mwemwe, umwakuti ukwendela mu bupina bwache, amwe mubanje bakabi.
10Po inyinong'ono zyane pafundo iyi zyakuti chizapo ukuti mumalizye tasi imbombo yiyo mukanda mumwaka ghugho wamalagha. Amwe mukaba bakwanda, pate po pakubomba kwene, loli na pakubomba nu moyo ghosi. 11Losi ulu malizya imbombo iyi, umwakuti ukulonda kwinyu pakuyibomba kuyane nukulonda kwinyu pakuyimalizya ukuyana ni vintu vivyo muli navyo. 12Pakuti nanti umuntu akulonda pakupa chimo, u Chala akupokela ichabupi chilachila ukuyana na vivyo umuntu ali navyo, sona atakumubuzya pakupa ichintu chicho ate nacho, awe.
13Intakung'anamula ukuti bamo bapepukilwe, sona nukuti abanji bang'wamilwe, awe. Loli ukuti pabanje ukuyana bulo. 14Loli pakuti amwe muli navyo ivyinji pakabalilo aka, mubaghiye pakubavwa abapotwe, umwakuti bope muntazi nanti baba navyo ivyinji bangabavwa pavivyo mukusobelwa ukuti pabanje ukuyana bulo. 15Pakuti Amasimbo ghakuti, “Abantu babo bakaseba umwinji nkani batakaseba umwakuchilapo, sona abantu babo bakaseba munandi, batakaseba panandi nkani.”
Nizya Titi na bamwabo
16Nkumupalizya u Chala, yuyo akabika mwa Titi inyinong'ono izyakuyana na zizyo indi nazyo papinyu. 17Pakuti atakabomba zyene zizyo tukamulaba, awe, loli akabomba nukulonda kwache ukukulu nkani, umwakuti mubwighane ubwache nu bwache akadumula ukuti ize kukwinyu. 18Tukumutuma poka nu mukamu witu, yuyo ivipanga vyosi vikumupala pachifukwa icha mbombo yache iyakulumbilila Amazyu Amiza. 19Chite chene chinicho, loli akasaliwa ni vipanga ukuti ende naswe pambombo yiyo tukubomba iyakunyamula ivyabupi, umwakuti tumuchindike u Mwene, sona nukuti tulanjizye ukwiyipa kwitu pakwavwa.
20Tutakulonda ukuti umuntu yumo atwaghe ni chifukwa nizya mumo tukunyamulila ivyabupi ivyinji ivya ndalama ivi. 21#Ivy. 3.4Ifundo yitu yakuti tubombe chicho chigholosu, pate po pamaso pa Mwene pene, awe, loli na pamaso pabantu bulo.
22Sona poka na babo tukumutuma umukamu witu, yuyo akabalilo akinji twamuyela nukumwagha ukuti iyipiye nkani pavintu ivyinji. Polelo iyipiye nkani ukubavwa pakuti abasubiye nkani. 23Pakunena nizya Titi, umwene we mukamu witu, sona wamwitu pambombo iyakubavwa. Pakunena nizya bakamu bitu abanji babili bala, abene bo bimilili bulo aba vipanga, sona bo buchindamu ubwa Kilisitu. 24Polelo mubalanjizye ulughano lwinyu abantu aba, umwakuti ivipanga vyosi vyennye nukumanya ukuti ukwituvya kwitu mumwinyu kwanaloli.
လက္ရွိေရြးခ်ယ္ထားမွု
2 Aba Kolinti 8: LMB2024
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Lambya Bible © Bible Society of Malawi, 2024.