2 Aba Kolinti 2
2
1Po nkadumula pa nemwene ukuti intakizeko sona kukwinyu ukuti intakabe nu bulendo ubunji ubwakubaba. 2Pakuti nanti ane ningabapela pakuba ni chitima, fwandi wewenu akwiza pakusyala ukuti ansangalusye? Nkimba bate bene babo nkabapela pakuba ni chitima? 3Ichi cho chifukwa nkabasimbila ukalata yula. Intakalondagha ukwiza kukwinyu ukuti abantu balabala, babo bangansangalusya batakampelela ichitima. Pakuti imenye akiza nkani ukuti bo ne muhobosu, namwe bulo mwe bahobosu. 4Bo nkubasimbila ukalata yula, umoyo wane ghukatamiwa nkani, sona nkaba ni chitima nkani, sona nkalila na masozi. Intakalondagha pakubapelela ichitima, loli ukuti muzimanye mumo imbaghaniye.
U Pabuli akubahobokela babo bakamunangila
5Nanti yumo akumupela uwamwabo pakuba ni chitima, atakumpela ane pakuba ni chitima, loli akubapela mwebosi pakuba ni chitima muzila zimo. Nanena zinizi ukuti intakabe mukafu nkani papache. 6Ulufundo lulo afundiwa nalo na bantu abinji muchipanga, lwamukwana. 7Polelo mubaghiye pakumuhobokela, sona nukumusangalusya, umwakuti atakabe ni chitima ichikulu nkani. 8Po nkubalaba ukuti mumulanjizye namumo mumughaniye. 9Ichi cho chifukwa nkabasimbila ukalata yula ukuti imbayele, sona nukuti imanye nanti mwe bakwivwila muvintu vyosi. 10Nanti mukumuhobokela umuntu yumo, nane bulo nkumuhobokela. Sona nanti nahobokela, nanti kalipo kamo akakuti ihobokele, nahobokela pamaso pa Kilisitu pachifukwa icha mwemwe, 11ukuti u Satana atakalwaghilepo ulusako papitu pakuti tubumenye ubuchevu bwache.
Ukupasya ukwa Pabuli mu Tulowa
12 #
Imbo. 20.1
Bo nafika mu Tulowa ukuti indumbilile Amazyu Amiza nizya Kilisitu, nkagha ukuti u Mwene anyighuliye kale izila ukuti imbombemo imbombo mulamula. 13Loli nkatamiwa nkani mumoyo wane pakuti intakamwagha umukamu witu u Titi kulakula. Po nkalaghana nabo nukubuka ku Makedoniya.
Ubupoti mwa Kilisitu
14Loli u Chala apaliwanje, yuyo mwa Kilisitu akabalilo kosi akutulongolela palusekelo ulwa bupoti, sona ukwendela mumwitu pakufumusya nizya Kilisitu posi na posi ngati gho munusi umwiza. 15Pakuti aswe tuli ngati gho munusi umwiza uwa Kilisitu uwakumuhobosya u Chala pakasi pabantu babo bakupokiwa, sona na babo bakusobela. 16Abantu babo basobelite, umunusi ughu bo bufwe. Loli abantu abanji, umunusi ughu bo bumi. Po nkimba wewenu angayikwanisya imbombo yiniyi? 17Aswe tutayanite na bantu abinji bamo, babo bakubwaghilapo ubukabi pa mazyu agha Chala, loli pakuti u Chala atutuma aswe, cho chifukwa tukunena nu moyo uwanaloli pantazi papache ngati twe babombi aba Kilisitu.
လက္ရွိေရြးခ်ယ္ထားမွု
2 Aba Kolinti 2: LMB2024
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Lambya Bible © Bible Society of Malawi, 2024.